Paulus la nanorin nodi matenek raiklaran
2
Mamaluk sia! Uluk, oras ha'u kmai baa emi, ha'u kanorin kodi katak kalore Na'i Maromak Niakaan lia subar mak uluk ema raiklaran sei la natene dauk. Mais ha'u la kodi ha'ukaan dalen nia atu kamina aan. Ha'u moos la kodi katudu matenek du'uk. 2 Oras nia ha'u kanorin emi kodi lia ida dei, ne'e mak, lia Yesus Kristus. Na'i Maromak solok Nia mai ti'an, mais ema nedi no'o Nia baa ai karuus. Ha'u katene loos lia ne'e dei.3 Oras ha'u kanorin emi, koran la kbele, to'o kata'uk no kiki.a 4 Ha'u kanorin emi hodi lia fuan loron-loron dei. Ha'u la kodi lia fuan oi-oik atu kamaus emi. Oras nia, Kmalar Lulik mak babilan ha'u. Niakaan beran moos tuun baa ha'u. 5 Hodi nunia, emi fiar baa Kristus, lahoos tan rona baa ema raiklaran matenek, mais tan Na'i Maromak du'uk natudu Niakaan beran baa emi.
Paulus nanorin lia matenek nosi Na'i Maromak
6 Masik ami hanorin emi hodi dalan nunia, baa oras ami dale baa ema mak fiar biit ti'an sia, ami hanorin hodi lia matenek. Mais lahoos matenek nosi raiklaran no makaer ukun sia. Tan sia la oras lakon mohu. 7 Ami hanorin hodi matenek nosi Na'i Maromak. Uluk, lia nia sei subar. Mais oras ne'e, Na'i Maromak nakotu ti'an atu nalore baa ita, tan hori uluk aan, Nia nakotu kedan na'ak, ita moos simu fafa'ek hosi Niakaan maka'as. 8 Makaer ukun oras ne'e sia la natene Na'i Maromak Niakaan matenek. Kalo sia natene, nanis sia la nedi no'o itakaan Na'in maka'as nia baa ai karuus.
9 Iha Hakerek Moon, noo hakerek nosi Na'i Maromak Niakaan matenek mak uluk sei lia subar na'ak,
“Noo lia sia mak ema raiklaran matan sei la naree dauk.
Noo lia sia mak ema raiklaran tilun sei la rona dauk.
Noo lia sia mak ema raiklaran kakutak sei la nanoin dauk.
Mais Na'i Maromak nadi'a kedan lia nia sia
bodik ema mak nadomi Nia.”b
10 Tebes. Uluk, ema la natene lia nia sia, mais oras ne'e Na'i Maromak nodi Niakaan Kmalar nalore ti'an baa ita.
Na'i Maromak Kmalar natene lia hotu-hotu. Nia moos natene Na'i Maromak neon laran to'o neon ain. 11 Tebes! See mak natene fukur ema ida neon laran? Ema nia mesan. Nunia moos Na'i Maromak Kmalar natene fukur Na'i Maromak neon laran.
12 Na'i Maromak foo Niakaan Kmalar nia baa ita ti'an. Etuk ita la moris tuir raiklaran ona. Tan Niakaan Kmalar moris iha itakaan neon, ita bele hatene lia di'ak hotu-hotu mak Na'i Maromak nalo bodik ita.
13 Na'i Maromak Kmalar nalore ti'an lia nia sia baa ami, hotu ami hanorin hatutan baa emi. Lia nia sia la mai nosi matenek raiklaran. Mais mai nosi Na'i Maromak Kmalar, bodik ema mak talin aan no Nia. 14 Ema mak la talin aan no Nia, sia la simu amikaan dalen. Sia na'ak, “Dalen nia la tama baa kakutak!” Mais tuir loos, sia du'uk la natene lia nia sia, tan la talin aan ho Na'i Maromak Kmalar. 15 Ema musti talin aan no Na'i Maromak Kmalar lai, foin bele natene lia nia sia. Ema seluk sia nanis benar, tan la bele natene itakaan neon. 16 Atu bele nunabee? Hakerek Moon na'ak:
“See mak bele natene Maromak Niakaan hanoin?
See mak bele foo tate'an baa Maromak?”c
Ema raiklaran nanis la bele natene Maromak Niakaan hanoin. Mais ita bele, tan Kristus nalo ita hatene hanoin tuir Kristus hanoin.