Keta hasalak emikaan mamaluk sarani sia
14
Ema sarani balu fiar baa Na'i Yesus ti'an, mais sia sei la natene lia wa'in, tan siakaan fiar sei la biit dauk. Masik nunia moos, simu sia no keta hasalak sia baa lia oi-oik. 2 Ema sarani balu naneo na'ak, ema sarani bele naa saa dei. Mais balu mak fiar la biit, naneo na'ak, ema sarani musti naluli na'an nodi naa modo dei. 3 Mais rona! Ema mak noran bele naa sa-saa dei, keta nasalak ema mak naluli na'an. Nunia moos, ema mak naluli na'an, keta nasalak ema mak naa na'an. Tan Na'i Maromak simu sia hotu.4 Kalo o masalak ema seluk eman, o maneo o ne'e see? O moo beran saa atu tula sala baa nia? Nia lahoos okaan ema. Nfiakaan ulun dei mak noo beran atu nakotu saa mak nia nalo nia, kona ka lale. Niakaan ulun mak bele babilan nia to'o nia dadi di'ak.
5 Ema sarani balu naneo na'ak, loron ida di'ak liu nosi loron seluk sia. Balu naneo na'ak, loron hotu-hotu manesak. Ema ida-idak musti nakotu du'uk nosi lia nia. 6 Maluk mak naneo loron ida di'ak liu nosi loron seluk, nodi loron nia nakneter itakaan Na'in. Maluk mak naa na'an, naa nodi nakneter itakaan Na'in, tan nia sera dodan baa Na'i Maromak. Maluk mak naluli na'an, nia moos nakneter itakaan Na'in, tan nia moos sera dodan baa Na'i Maromak.a
7 Baa oras ita moris, ita la moris tuir itakaan beer du'uk. Nunia moos baa oras ita mate, la mate tuir itakaan beer du'uk. 8 Kalo ita sei moris, ita talin malu ho itakaan Na'in. Kalo ita mate, ita sei talin malu ho Nia. Dadi, masik ita moris ka, mate ka, ita sei dadi Niakaan ema. 9 Kristus mate hotu moris nikar atu dadi Na'in bodik ema mak mate no ema mak sei moris.
10 Dadi tan saa o foti aan nu'u ema makotu lia, modi masalak okaan maluk sarani? Tan saa o titu maraik nia? Keta malu'a ma'ak, ita ida-idak musti baa hataa Na'i Maromak baa oras Nia leno itakaan hahalok ida-idak.b 11 Hori uluk Yesaya nakerek iha Hakerek Moon na'ak,
“Itakaan Na'in katak na'ak,
‘Ema hotu-hotu atu nakni'a
lo'u-sudur baa Ha'u.
Ema hotu-hotu atu nodi ibun du'uk katak sain na'ak,
Ha'u mak siakaan Na'in,
tan Ha'u ne'e, Maromak.’”c
12 Tan lia nia, keta malu'a ma'ak, ita ida-idak musti hataa baa oras Na'i Maromak nusu lia nosi itakaan hahalok.
Keta hahonu emikaan mamaluk sarani sia
13 Uluk emi iha Roma tula sala baa malu. Mais oras ne'e, keta ona. Di'ak liu, ita hakotu nune'e: ita keta halo itakaan mamaluk sia sidi ain. Ita keta buka malu ain atu hahonu sia baa sala.
14 Tan ha'u ktalin malu ko Na'i Yesus, ha'u katene fukur no kfiar iha ha'ukaan neon nune'e: la noo saa mak luli iha Na'i Maromak oin. Mais kalo ema ida naneo na'ak, saa ida bele nalo nia sasobo to'o nia la bele namulak tenik, habusik nia naluli baa. 15 Kola knaninuk kosi haa na'an. O maa na'an, mais okaan maluk neon susar tan okaan hahalok nia. Kalo o maa naan bei-beik, ne'e na'ak, o la madomi nia. O musti metu neon! Keta maa naan kalo hahalok nia nahaat okaan maluk! Keta malu'a ma'ak, Kristus moos mate bodik nia. 16 Kalo metu neon nunia, ema la nasalak o baa lia mak o du'uk moran di'ak.
17 Hanoin di'a-di'ak! Na'i Maromak mak itakaan Na'in. Mais ita la dadi Niakaan renu, tan ita tuir ukun-badu haa-hemu. Lale. Mais ita dadi Niakaan renu, tan ita talin malu ho Niakaan Kmalar Lulik. Ita bele moris loos no dame malu no neon di'ak. 18 Ema mak moris nodi serwisu tuir Kristus nunia, nalo Na'i Maromak neon di'ak. Ema raiklaran moos mose nia.
19 Tan baa nia, ita musti harui aan atu moris dame malu, hodi hakbiit malu neon. 20 Keta, tan baa lia haa-hemu dei, o mahaat saa mak Na'i Maromak serwisu iha ema seluk neon. Na'i Maromak na'ak ti'an, ema bele naa sa-saa dei, tan sa-saa nia, hotu-hotu moos. Mais kalo o malo lia mo okaan maluk tan lia haa-hemu, ne'e na'ak, o sala ti'an. Keta nunia! 21 Di'ak liu, o metu neon keta maa na'an, keta memu anggor ween, keta malo sa-saa seluk, kalo hahalok nia nalo okaan maluk monu baa sala.
22 Lia badak nune'e: kalo o makotu lia ti'an mo Na'i Maromak ma'ak, o bele maa-memu saa, rai baa neon dei. Lalika ma'ak baa ema. O moos lalika buka tenik atu matene lia nia loos, ka lale, tan o makotu ti'an. 23 Mais kalo o maa buat ida modi neon ruak tan moran sala, Na'i Maromak tula sala baa o, tan o la malo tuir saa mak o fiar iha okaan neon laran. Kalo o atu malo sa-saa, mais o fiar ma'ak hahalok nia la loos iha Na'i Maromak oin, ne'e na'ak, o malo sala.