Hanono baa ema makaer ukun
13
Ema ida-idak musti nanono baa ema makaer ukun sia, tan sia mak kaer beran. Sia noo beran nunia, tan Na'i Maromak mak foo. Makaer ukun oras ne'e kaer ukun, tan Na'i Maromak mak foti sia. 2 Kalo ema sakar makaer ukun, ne'e na'ak, nia sakar ema mak Na'i Maromak foti. Kalo ema sakar nunia, nanis Na'i Maromak kastikar.3 Kalo halo loos, lalika hata'uk makaer ukun sia. Mais halo aat, foin hata'uk sia! Dadi kalo emi hakara moris la ta-ta'uk, daka aan hodi halo loos nebee makaer ukun sia tonun emi. 4 Na'i Maromak boi makaer ukun sia atu lituk emi. Mais kalo emi halo aat, sintidu! Tan siakaan beran nia, noo folin. Sia hanesan Na'i Maromak ain-liman mak Nia naruka atu kastikar ema mak nalo aat. Tan Na'i Maromak nahibu ema mak nalo aat.
5 Tan baa nia, emi musti hanono baa makaer ukun sia. Emi du'uk hatene ha'ak, lia nia mak loos. Emi moos hatene ha'ak, Na'i Maromak nahibu kalo ita la halo lia loos.
6 Nunia moos, emi musti selu bea tuir loos, tan ema makaer ukun sia nala'ok Na'i Maromak Niakaan serwisu. 7 Foo baa ema hotu-hotu saa mak fatan sia simu. Selu bea baa maksisi bea sia. Foo kneter baa ema mak fatan netan kneter. Foo tonun baa ema mak fatan simu tonun.a
Moris hadomi malu
8 Selu halo mohu emikaan tusan sia, nebee keta moris ho tusan. Tan ita musti hatusan loos baa lia ida dei. Ne'e mak, lia hadomi malu. Kalo ita hadomi ema, ita hala'ok Na'i Maromak Ukun-badu hotu-hotu. 9 Ukun-badu nia sia na'ak, “Keta halo lia kfo'er; keta ho'o ema; keta hana'o; keta beer hola ema niakaan sasoin.” Noo tenik Ukun-badu seluk sia. Kalo hakara hala'ok Ukun-badu sia hotu-hotu, hala'ok Ukun-badu ida ne'e mak na'ak, “Hadomi ema seluk, hanesan hadomi isin lolon du'uk.”b 10 Kalo ita hadomi ema seluk, ita la halo aat baa nia. Lia nia na'ak, kalo ita hadomi malu nohuun, ita hala'ok Na'i Maromak Ukun-badu hotu-hotu.
La kleur ona, Kristus atu namaan aan mai nikar
11 La kleur ona, Yesus Kristus atu namaan aan mai nikar sori ita nosi a'aat raiklaran ne'e. Emi hatene Niakaan oras sori ita, kre'is ti'an. Dadi, emi musti harui aan moris hadomi malu. Uluk, ita toba. Mais oras ne'e, ita musti hadeer ona! 12 La kleur, kalan mohu ona, loron atu mai. Keta moris hanesan ema mak nalo aat iha makukun, tan nanoin la noo ema mak naree nia. Oras ne'e, ita musti dadi nu'u sondadu mak moris iha kroman, nodi ro'at-meik nariik metin nalo di'ak. 13 Ita musti moris loos, nebee ema naree itakaan hahalok di'ak. La di'ak kalo ita hemu bele-bele to'o lanu. La di'ak kalo ita halo lia kfo'er. La di'ak kalo ita hakaat malu. La di'ak kalo ita hirus ema tan la beer sia liu ita. 14 Di'ak liu, filas neon dadi hanesan itakaan Na'in Yesus Kristus. Ita keta tuir a'aat iha neon laran mak naruka ita halo sala, mais ita musti hetu neon.