Harui aan hodi hakbiit ema seluk siakaan fiar
15
Ita mak fiar biit musti haterus aan ho maluk mak sei la fiar biit dauk. La furak kalo ita moris halo itakaan neon di'ak dei. 2 Ita ida-idak musti harui aan moris halo neon di'ak bodik maluk sarani sia, nebee siakaan fiar hetak biit. 3 Yesus Kristus la moris nalo Nia du'uk neon di'ak, mais Nia moris nalo Na'i Maromak neon di'ak. Lia nia hakerek ti'an iha Hakerek Moon na'ak,“Siakaan lia fuan kasalak baa O,
kona no baa Ha'u.”a
4 Hotu-hotu mak Na'i Maromak naruka ema nakerek iha Hakerek Moon dadi hanorin bodik ita. Hanorin nia natudu dalan nebee ita haterus aan no neon boot. Ita moos bele haloon baa Na'i Maromak hodi neon metin.
5 Na'i Maromak nakbiit itakaan neon, nebee ita bele haterus aan. Ha'u kamulak kodi kakro'an baa Nia, nebee nalo emi moris neon ida, tuir Yesus Kristus beer. 6 Nebee, emi hotu-hotu tonu-haboot Na'i Maromak bele-bele. Tan Nia mak itakaan Na'in Yesus Kristus, Niakaan Ama.
Ita musti hafoli malu
7 Ita musti hafoli malu, hanesan Kristus nafoli ita. Kalo ita moris nunia, ema foti-nahaas Na'i Maromak naran. 8 Lia nune'e: Kristus nalo aan hanesan ema ain-liman atu natetuk lia hotu-hotu mak Na'i Maromak nameno ti'an bodik ema Yahudi siakaan bei uluk sia. Hodi nunia, ema hotu-hotu bele natene na'ak, Na'i Maromak dale loos. 9 Etuk, ema klubun seluk mak lahoos Yahudi sia moos tonu-naboot Na'i Maromak. Tan sia natene na'ak, Nia dodan ita hotu-hotu. Uluk, Na'i Daud nakerek kedan lia nia iha Hakerek Moon na'ak,
“Ha'u atu kfoti-kahaas Maromak naran
iha ema klubun seluk oin.
Ha'u atu kananu kananuk tonun baa Maromak
iha ema klubun seluk oin.”b
10 Bei Musa moos nakerek na'ak,
“Hei! Emi mak ema matak hosi fatin seluk sia!
Haboot neon hamutuk ho
Na'i Maromak eman sia.”c
11 Na'i Daud nakerek tenik na'ak,
“Emi hosi klubun seluk sia!
Baa katak ema hotu-hotu nosi lia Maromak Niakaan maka'as,
nebee sia tuir tonun itakaan Na'in.”d
12 Bei Yesaya moos nakerek na'ak,
“Isai oan Daud niakaan husar-binan ida
atu tadu mai.
Nia atu kaer ukun baa ema klubun seluk sia.
Sia natene ti'an na'ak, Nia atu mai.
Sia no'i nein Nia,
tan sia natene ti'an na'ak, Nia ne'e, see.”e
13 Ita haloon baa Na'i Maromak, mak abut nosi hotu-hotu. Nebee, emi foo leet baa Niakaan Kmalar Lulik, nodi Niakaan beran, nalo emi hetak fiar baa Nia, to'o emi neon di'ak no metin.
Paulus nakerek nosi niakaan serwisu bodik Na'i Maromak
14 Mamaluk sia! Ha'u katene tebe-tebes ka'ak, emikaan neon nakonu no lia di'ak sia. Emi hatene lia wa'in to'o bele foo lia tate'an baa malu. 15 Ha'u kaberan aan kalo hakerek ne'e to'o malorek, tan kakara foo katene baa emi dala ida tenik nosi lia oi-oik. Ha'u kalo nune'e, tan Na'i Maromak natudu laran di'ak baa ha'u, 16 baa oras foti ha'u dadi baa Yesus Kristus ain-liman. Hotu, Nia naruka ha'u kbaa keke Manfatin Di'ak baa ema mak lahoos Yahudi sia. Kala'ok ha'ukaan serwisu ne'e baa sia, hanesan na'ilulik nala'ok niakaan serwisu atu foo sera baa Na'i Maromak. Hodi nunia, Kmalar Lulik nalo sia dadi moos, to'o Na'i Maromak simu sia.
17 Tan ha'u ktalin malu ko Yesus Kristus, ha'u kbele foti oin dale kosi ha'ukaan serwisu bodik Na'i Maromak. 18 Ha'u la kaksakar aan dale lia seluk. Ha'u kdale loos lia Kristus no serwisu mak Nia latan baa ha'u. Ha'u kdale ka'ak, ema lahoos Yahudi sia nanono baa Kristus ti'an, tan ha'ukaan dalen no ha'ukaan hahalok mak natudu dalan baa sia. 19 Kristus moos latan beran baa ha'u nosi Maromak Kmalar Lulik, nebee ha'u kbele kalo tadak blaar oi-oik. Nia latan beran nia, nebee ha'u kbele katudu ka'ak, Kristus nia, see. Kodi nunia, ha'u keke lia hotu-hotu nosi Kristus Manfatin Di'ak baa ema iha fatin hotu-hotu. Ha'u keke kasirin kosi kota Yerusalem, to'o rai Ilirikum mak kre'is baa Italia. 20 Hori uluk aan, ha'u kanoin ka'ak, “Ha'u kmusti kanorin lia Kristus baa ema mak sei la dala ida dauk rona Niakaan Manfatin Di'ak!” La di'ak kalo ha'u kanorin iha fatin mak ema seluk nanorin ti'an. 21 Tan Hakerek Moon na'ak,
“Ema mak sei la dala ida dauk rona lia nosi Nia,
nosi ikus, sia atu naree Nia.
Ema mak sei la dala ida dauk natene sa-saa nosi Nia,
nosi ikus, sia atu natene lia nosi Nia.”f
Paulus nakotu lia atu baa kota Roma
22 Tan ha'u kserwisu kasirin rai, ha'u ksei la baa karee emi dauk.g 23 Mais oras ne'e, ha'ukaan serwisu iha ne'e mohu ti'an. Kleur ti'an, nosi tinan baa tinan, ha'u kbeer baa karee emi. 24 Ha'u atu kbaa rai Spanyol, dadi ha'u kbeer tuli karee emi. Kalo ha'u ktuli heik ti'an iha emi, kaloon emi moos bele tulun ha'u hodi selu osan dalan bodik liu baa Spanyol.
25 Mais ha'u kakara baa uluk Yerusalem atu kaliku Na'i Yesus eman makfiar sia iha nebaa. 26 Itakaan mamaluk sia iha rai Makedonia no rai Akaya foo osan ti'an atu hodi tulun ema makfiar mukit sia iha Yerusalem.h 27 Sia nakara nalo nunia, tan sia noran natusan baa itakaan mamaluk sia iha Yerusalem. Ema raiklaran tomak simu ti'an lia di'ak mak uluk Kmalar Lulik foo baa ema Yahudi. Dadi, fatan kalo mamaluk sarani nosi fatin seluk, nodi siakaan sasoin, tulun mamaluk Yahudi.i
28 Kalo ha'u kala'ok serwisu nia kodi foo tulun baa itakaan mamaluk iha Yerusalem ti'an, ha'u ktuli karee emi baa oras ha'u kbaa Spanyol. 29 Ha'u kmai ne'e, ha'u kodi matak-malirin kosi Kristus.
30 Mamaluk sia! Ita talin malu ho itakaan Na'in Yesus Kristus. Kmalar Lulik moos nalo ita hadomi malu. Etuk, ha'u kakara emi hamulak tebe-tebes, nebee Na'i Maromak tulun ha'u. 31 Nebee, Nia daka ha'u iha rai Yudea, nebee ema mak la fiar baa Na'i Yesus keta nalo aat baa ha'u. Nebee, baa oras ha'u kbaa kaliku mamaluk sarani iha Yerusalem, sia simu ha'u. 32 Kalo Na'i Maromak nakara, ha'u kbele mai karee emi kodi neon di'ak, nebee ha'u kbele kanawa sala-sala lai hodi hakbiit malu neon. 33 Ha'u moos kamulak kodi kakro'an, nebee Na'i Maromak namutuk no emi. Tan Nia mak foo moris manek no dame. Tebes!