Ema mak talin malu no Kristus, lisan musti makonak no moris foun
12
Mamaluk sia mak ha'u kadomi! Tan Na'i Maromak natudu ti'an dodan boot baa ita, ha'u kusu nebee emi latan aan baa Nia nu'u sera mak sei moris. Foo leet baa Nia atu babilan emi to'o emikaan lisan dadi moon. Kalo emi halo nunia, foin emi lo'u-sudur baa Nia halo loos. Nia nanis simu nodi neon di'ak. 2 Keta tuir ema raiklaran oras ne'e lisan oi-oik. Keta foo leet baa sia atu babilan emi. Emikaan neon keta naktomak tuir siakaan hanoin, siakaan moris, no siakaan adat. Di'ak liu, foo leet baa Na'i Maromak atu babilan emi to'o nafou emikaan kakutak. Hodi nunia, emi bele hatene lia hotu-hotu tuir dalan foun. Emi moos bele hatene saa mak Na'i Maromak nakara emi hala'ok bodik Nia. Lia mak Nia nakara nia, nanis lia di'ak, lia tetuk, no lia mak nalo Nia neon di'ak.3 Tan Na'i Maromak natudu laran di'ak ti'an nodi foti ha'u baa klosan, ha'u kbele katak baa emi nune'e: Leno aan halo lo-loos! Keta haksa'ek aan liu kladik. Na'i Maromak fa'e babelen baa ita ida-idak, tuir itakaan fiar. Tetu di'a-di'ak okaan babelen nia.
4 Ha'u kola knaninuk nosi ema isin lolon. Isin lolon ida noo niakaan fafa'ek oi-oik. Fa'ek ida-idak noo du'uk niakaan serwisu. 5 Nunia moos ita. Masik ita ema wa'in, ita hotu-hotu talin malu dadi nu'u Kristus isin. Mais ita ida-idak hoo du'uk serwisu, nu'u ema isin lolon fafa'ek nia. Ita hotu-hotu hakrai aan baa malu.a
6 Na'i Maromak natudu laran di'ak nodi fa'e babelen baa ita ida-idak atu hala'ok Niakaan serwisu oi-oik. Kalo Na'i Maromak fa'e babelen baa o, nodi foo lia mamenon baa o, o musti mato'o lia mamenon nia tuir okaan fiar. 7 Kalo Na'i Maromak fa'e babelen baa o, to'o o matene maliku ema seluk, o musti maliku. Kalo Na'i Maromak fa'e babelen baa o, to'o o matene manorin ema, o musti manorin. 8 Kalo Na'i Maromak fa'e babelen baa o, to'o o matene makbiit ema neon, o musti makbiit. Kalo Na'i Maromak fa'e babelen baa o, to'o o bele tulun ema modi okaan sasoin, foo baa. Kalo Na'i Maromak fa'e babelen baa o, to'o o matene lituk ema, mala'ok serwisu nia modi laran maluak. Kalo Na'i Maromak fa'e babelen baa o, to'o o matene tulun ema susar, o musti tulun modi neon boot.b
Kristus Niakaan ema dalan moris
9 Keta asufanu hadomi ema. Hadomi halo loos. Keta oin-kotuk. Se'i kotuk baa lia aat hotu-hotu, hodi kaer hola lia di'ak hotu-hotu. 10 Ita mamaluk sarani musti hadomi malu. Hariik metin nebee hakneter malu. 11 Kalo serwisu, serwisu hodi neon tomak. Keta neon ruak. Serwisu hodi neon boot bodik itakaan Na'in. 12 Neon di'ak loron-kalan, hodi hanoin hotu-hotu mak Na'i Maromak atu nalo bodik emi. Haterus aan baa oras susar. Hamulak loron-kalan, keta horan kole. 13 Hodi sasoin hato'o mamaluk sarani mak susar. Loke liman hodi foo haa-hemu no toba fatik baa ema matak. Hodi nunia, ita hadomi sia.
14 Kalo ema nasusar ita, keta haloon aat bodik sia. Mais haloon nebee Na'i Maromak nalo di'ak bodik sia.c 15 Kalo ema neon di'ak, ho sia neon di'ak bele-bele. Kalo ema tanis tan neon todan, ho sia tanis bele-bele. 16 Moris neon ida, hodi hadomi malu. Keta loko aan. Di'ak liu, hamalu ho ema mak la noo folin sia. Keta haksa'ek aan hodi haneo ha'ak, ita mesan mak matenek.d
17 Kalo ema nalo aat baa o, keta selu aat. Mais buka dalan mak di'ak kaliuk, mak ema hotu-hotu bele mose. 18 Kalo bele, buka dalan atu moris dame malu mo ema hotu-hotu.
19 Mamaluk sia mak ha'u kadomi! Keta selu aat baa ema. Habusik Na'i Maromak mak selu baa sia. Tan Nia nahibu kalo ema nalo aat. Hakerek Moon na'ak,
“Itakaan Na'in du'uk mak dale na'ak,
Ha'u mak koo beran atu selu aat baa ema.
Tan Ha'u mak koo beran atu katuun kastikar baa ema.”e
20 Di'ak liu, halo tuir lia iha Hakerek Moon na'ak,
“Kalo okaan funu salaen,
mahaan nia.
Kalo okaan funu nanroo,
maroo nia.
Tan kalo o malo nunia, nia atu noran moe,
nodi nakneter fila o.”f g
21 Keta foo leet baa a'aat ukun o. Di'ak liu, foo leet baa lia di'ak mak ukun o. Hodi nunia, o bele matoba mola lia aat sia.