Na'i Maromak dodan ema Isra'el sia
11
Arumak emi haneo ha'ak, “Tan ema Isra'el sia la nanono baa Na'i Maromak, etuk Nia dudu sai sia ti'an.” Nunia ka? Lale! Tan ha'u du'uk, ema Isra'el. Ha'u ne'e, kosi uma huun Benyamin. Benyamin aman, naran Isak. Isak aman, naran Abraham. Abraham nia, mak ema Isra'el hotu-hotu siakaan bei uluk fohon.a 2 Na'i Maromak la dala ida dudu sai ema Isra'el mak Nia boi kedan hori uluk aan. Emi sei hanoin lia nosi Maromak mako'an Elia ka? Nia naksuhuk baa Na'i Maromak, nodi nakro'an nebee Na'i Maromak kastikar ema Isra'el sia 3 na'ak,“Ama Maromak! Ema ne'e sia no'o mohu Ama mako'an sia
mak Ama solok mai.
Sia moos sobu karin taroman
mak ema nodi lo'u-sudur baa Ama.
Nosi Ama mako'an hotu-hotu,
ha'u kmesan dei mak sei moris.
Mais ema moos buka dalan
atu no'o ha'u!”b
4 Mais Na'i Maromak nataa Elia na'ak, “O dale nia, la kona! Sei noo ema rihun hitu mak lo'u-sudur baa Ha'u. Sia naterus aan bei-beik no la lo'u baa ai'oi lulik Ba'al.”c
5-6 Nunia moos, baa oras ne'e. Lahoos ema Yahudi hotu-hotu se'i kotuk baa Na'i Maromak. Sei noo amikaan ema balu mak Na'i Maromak boi ti'an atu sori, tan Nia nakara natudu laran di'ak baa ami. Kalo Nia nokbiit natudu laran di'ak nodi sori ami tan amikaan hahalok di'ak, ne'e na'ak, Nia la boi atu sori ami. Tan kalo ema nokbiit natudu laran di'ak, ne'e na'ak nia la boi atu nalo nunia.d 7 Lia rohan nune'e: ema Yahudi wa'in buka dalan atu di'a-di'ak no Na'i Maromak. Balu netan dalan, tan sia mak Na'i Maromak boi kedan ti'an. Mais wa'in la netan dalan, tan neon monas to'o sia la nanono Na'i Maromak. 8 Hakerek Moon na'ak,
“Na'i Maromak foo baa sia,
matan mak la bele naree,
tilun mak la bele rona,
no kakutak tomak mak la bele nanoin.
Tan baa nia, sia la natene lia loos to'o baa ohin loron ne'e moos.”e
9 Na'i Daud moos nakerek nosi lia ema Yahudi na'ak,
“Habusik sia nadahur iha siakaan fatin du'uk.
Siakaan dahur nia atu kesi fila sia,
tan sia naneo hotu-hotu di'ak.
No siakaan sasoin du'uk atu nalo sia sidi ain.
10 Habusik siakaan matan nakukun,
to'o sia la titu-naree sa-saa!
Habusik sia natiu naha todan bei-beik,
to'o siakaan kotuk ruin tu'an kato'uk!”f
Na'i Maromak nakara sori ema hotu-hotu
11 Ema Yahudi sia sidi ain tan la fiar baa Yesus. Tebes. Mais ha'u atu kusu nune'e: Sia nakloti to'o la bele nadeer tenik ka? Lale! Mais tan sia la no'uk nanono baa Na'i Maromak, siakaan salan nia loke dalan nebee Na'i Maromak simu ema seluk. Na'i Maromak nalo nunia, nebee ema Yahudi sia laran moras, hotu sia fila nikar baa Nia. 12 Malorek ti'an na'ak, ema Yahudi sia se'i kotuk baa lia mak di'ak. Mais tan siakaan salan nunia, ema seluk nosi raiklaran tomak bele noran Na'i Maromak laran di'ak. Ne'e na'ak, ema Yahudi sia lakon boot. Ema lahoos Yahudi sia sotir boot. Mais nosi ikus, kalo ema Yahudi sia moos fila nikar di'a-di'ak no Na'i Maromak, ne'e mak di'ak kaliuk!
13 Oras ne'e, ha'u katak baa emi mak lahoos Yahudi sia. Na'i Maromak solok ha'u hanesan Kristus klosan bodik emi. Ha'u kaka'as aan kodi kala'ok serwisu kabaas ne'e, 14 tan kaneo kalo ha'u kala'ok di'a-di'ak serwisu ne'e bodik emi mak lahoos Yahudi, arumak ha'ukaan ema Yahudi du'uk laran moras, to'o balu netan moris tan fila nikar baa Na'i Maromak. 15 Baa oras Na'i Maromak dudu sai ema Yahudi sia, Nia loke dalan nebee ema seluk bele tama dadi baa Niakaan ema. Mais nosi ikus, kalo ema Yahudi sia fila nikar baa Na'i Maromak, lia nia kabaas kaliuk, nu'u sia moris nikar nosi mate!
16 Kalo ema sera to'os isin uluk fohon baa Na'i Maromak, ne'e na'ak, to'os isin hotu-hotu dadi baa Na'i Maromak Niakaan. Kalo ema mak nalo tubi, sera tubi uluk fohon, tubi hotu-hotu dadi baa Na'i Maromak Niakaan. Kalo ema sera ai abut ida, ai sorun hotu-hotu moos dadi baa Na'i Maromak Niakaan.
17 Ha'u kanesa ema Yahudi baa ai huun saitun ida mak Na'i Maromak kuda iha to'os laran. Nunia moos, kanesa emi mak lahoos Yahudi sia baa ai saitun fuik iha to'os luan. Na'i Maromak taa kotu ai sorun balu iha to'os laran nia, hotu Nia taa nola ai fuik sorun balu, tubir baa ai huun iha to'os laran nia. Hodi nunia, sorun nosi ai huun iha to'os luan, simu nola moris nosi ai huun iha to'os laran. Ne'e na'ak, Na'i Maromak foo moris baa ema Yahudi bele-bele no emi mak lahoos Yahudi. 18 Mais sintidu! Keta kakaku aan haneo ha'ak, emi hosi luan nia di'ak liu ai sorun mak to'os na'in taa kotu iha to'os laran nia! Kalo atu maksa'ek aan, keta malu'a tan o ne'e sorun loos dei! Lahoos o mak malo ai huun nia biit, mais abut mak nalo biit.
19 Arumak o ma'ak, “Na'i Maromak taa kotu sorun ida nosi ai huun mak moris iha Niakaan to'os laran, nebee tubir nikar ha'u baa, nodi seluk sorun tuan nia.” 20 Tebes. Mais keta malu'a ma'ak, Na'i Maromak taa kotu sorun nia sia tan sia la fiar baa Yesus. O bele seluk sia, tan fiar baa Nia. Tan lia nia, o la bele kakaku aan! Di'ak liu, daka aan! Keta malo oi-oik. 21 Ema Yahudi sia nu'u sorun isin mak tubu uluk iha to'os laran. Mais Na'i Maromak la nabusik sia naterus aan kleur iha nia. Dadi, kalo o la fiar baa Yesus nohuun, keta maneo ma'ak Na'i Maromak atu nabusik o materus aan iha nia!
22 Hanoin di'a-di'ak! Na'i Maromak laran di'ak. Mais Nia moos laran moon. Nia natene natuun kastikar todan baa ema mak la nanono no se'i kotuk baa Nia. Bodik emi mak lahoos Yahudi sia, Na'i Maromak natudu laran di'ak surak emi moris talin malu bei-beik ho Nia, nebee bele simu Niakaan dadi'ak nia. Kalo emi la moris nunia, Nia nanis taa kotu emi nosi Niakaan ai huun. 23 Kalo ema Yahudi sia nalo neon aat hotu fiar baa Yesus, nanis Na'i Maromak tubir nikar sia baa ai huun isin nia. Tan Nia mak noo beran atu nalo nunia! 24 Mais emi mak lahoos Yahudi sia, nu'u sorun nosi saitun fuik mak uluk tubu karin iha to'os luan. Na'i Maromak boi nola emi nodi tubir baa ai huun saitun mak Nia kuda iha to'os laran. Kalo Na'i Maromak nalo nunia bodik emi mak lahoos Yahudi, saa tenik bodik ema Yahudi. Kabaas kaliuk kalo Nia tubir nikar sia baa siakaan ai huun du'uk.
Nosi ikus, Na'i Maromak atu sori ema Yahudi sia
25 Mamaluk iha Roma sia! Emi musti hatene lia ne'e mak uluk sei lia subar. Mais kalo hatene ti'an, keta kakaku aan hodi haneo ha'ak, emi matenek. Lia subar nia nune'e: oras ne'e, ema Yahudi sia neon monas no la no'uk fiar baa Yesus. Mais la nunia bei-beik. Tan kalo ema seluk hotu-hotu fiar baa Yesus ti'an, ema Yahudi sia moos fiar baa Nia. 26 Kalo oras nia to'o ti'an, Na'i Maromak atu sori ema Yahudi hotu-hotu. Na'i Maromak du'uk katak kedan nunia ti'an iha Hakerek Moon na'ak,
“Kalo niakaan oras to'o ti'an,
Maksorin ida atu mai
nosi Foho Sion iha kota Yerusalem.
Oras ne'e, Isra'el husar-binan sia la nanono baa Ha'u.
Oras ne'e, sia se'i kotuk baa Ha'u.
Mais kalo ema nia to'o mai ti'an, Nia atu namoos siakaan neon.g
27 Hotu, Ha'u kasu mohu siakaan salan,
tan uluk kamate menon ko sia nunia.”h
28 Sura oras ema Yahudi sia dudu Yesus Manfatin Di'ak, sia nalo aan nu'u funu mak sakar Na'i Maromak. Hodi nunia, sia foo leet baa emi mak lahoos Yahudi sia. Mais Na'i Maromak nadomi sia nohuun, tan nadomi siakaan bei uluk, no boi nola sia ti'an dadi baa Niakaan ema. 29 Kalo Na'i Maromak latan buat ida ti'an, Nia la dada nikar ona. Kalo Nia bolu nola ema atu dadi baa Niakaan ema ti'an, Nia la nabusik ona.
30 Uluk, emi mak lahoos ema Yahudi la hanono baa Na'i Maromak. Mais oras ne'e, emi simu Niakaan dodan tan ema Yahudi sia la nanono baa Nia. 31 Oras ne'e, sia mak la nalo tuir Na'i Maromak beer. Tan baa nia, Na'i Maromak natudu nikar dodan baa emi. Mais Nia sei nakara foo dodan baa sia tenik. 32 Lia ne'e na'ak, ema Yahudi no ema lahoos Yahudi, Na'i Maromak nafoli manesak. Sia hotu-hotu la tuir Niakaan hakara. Mais Nia nabusik nunia, nebee bele natudu dodan baa ema hotu-hotu.
Tonu-haboot Maromak
33 Adeei! Ha'u ktonu-kaboot Maromak tan Nia matenek kaliuk!
Nia nodi Niakaan matenek nia, nalo lia kabaas.
La noo ema ida mak bele natene tebe-tebes Maromak moris dalan.
La noo ema ida mak bele natene fukur nosi Maromak nakotu lia.
La noo ema ida mak bele natene
tan saa Maromak nalo lia ida.i
34 Tebes! Iha Hakerek Moon ema nusu na'ak,
“See mak bele natene fukur Maromak Niakaan hanoin?
See mak bele foo lia tate'an baa Nia?j
35 See mak bele foo sa-saa baa Nia, to'o Nia natusan baa ema raiklaran?
La noo ema ida kois mak bele.”k
36 Hotu-hotu nahabut baa Maromak.
Hotu-hotu, Nia mak babilan.
Hotu-hotu bodik Nia.
Ita tonu-haboot Nia
to'o nima-nimak!
Nunia tebes!l