10
Mamaluk sia! Ha'ukaan neon ain, beer bodik ema Yahudi nune'e: Ha'u kakro'an kodi neon no laran, nebee sia foo leet baa Na'i Maromak atu sori sia nosi sala. Kalo dadi nunia, foin ha'u neon di'ak.2 Ha'u katak kasain ka'ak, sia madinas tebes buka Maromak. Mais sia la natene dalan mak loos 3 nebee Na'i Maromak naloos sia. Sia na'in loke dalan du'uk, tan la no'uk rona baa Nia.
4 Kalo ema buka nebee Na'i Maromak naloos sia tan sia tuir Ukun-badu, lia nia la to'o dauk. Mais fiar baa Kristus, foin tetuk. Tan Na'i Maromak naloos ema hotu-hotu mak fiar baa Kristus.
Na'i Maromak beer sori ema Yahudi no ema lahoos Yahudi
5 Uluk, Bei Musa natudu dalan nebee Na'i Maromak naloos ema, surak halo tuir Niakaan Ukun-badu hotu-hotu. Nia nakerek na'ak, “See mak tuir Ukun-badu hotu-hotu atu netan moris mak loos.”a
6 Mais oras ne'e Na'i Maromak natudu dalan seluk ti'an nebee naloos ema, surak fiar baa Yesus Kristus. Dalan nia, iha ti'an. Tan Hakerek Moon na'ak, “Lalika husu ha'ak, ‘See mak bele sa'e baa lale'an?’” (Lia fuan nia isin na'ak, “Ita ema raiklaran musti sa'e baa lale'an atu bolu Kristus, nebee namaan aan tuun atu sori ita ka?”) 7 Hakerek Moon moos na'ak, “Lalika husu ha'ak, ‘See mak atu tuun baa kuak naraka, baa ema maten fatin nia?’” (Lia fuan nia isin na'ak, “Ita ema raiklaran musti tuun baa hasa'e hikar Kristus nosi mate, nebee sori ita ka?”)
8 Lahoos nunia! Ita lalika sa'e baa lale'an, lale tuun baa naraka, atu buka Maksorin. Tan Hakerek Moon na'ak, “Maromak Manfatin kre'is baa o, tan iha okaan ibun no neon ti'an.” Manfatin nia mak ita hodi katak baa ema ha'ak, “Kalo o makara buka Maksorin, fiar baa Kristus dei!”b 9 Kalo o katak sain modi ibun du'uk ma'ak, ‘Yesus Kristus, ha'ukaan Na'in,’ no fiar modi neon no laran ma'ak, Na'i Maromak nalo Yesus moris nikar ti'an nosi mate, Na'i Maromak nanis sori o nosi okaan salan. 10 Kalo fiar modi neon, Na'i Maromak nanis naloos o. Kalo katak sain modi ibun ma'ak, ‘Yesus Kristus, ha'ukaan Na'in’, Na'i Maromak nanis sori o nosi okaan salan. 11 Hakerek Moon na'ak, “Ema mak fiar baa Na'i Maromak la neon ki'ik kedan, tan hotu-hotu mak Na'i Maromak nameno ti'an, Nia nanis nalo dadi.”c 12 Ema Yahudi no ema lahoos Yahudi manesak, tan Na'in ida dei bodik ema klubun hotu-hotu. Nia moos beer fakar laran di'ak bodik ema hotu-hotu mak nusu tulun baa Nia. 13 Ita hatene lia nia tan Hakerek Moon na'ak, “Ema hotu-hotu mak nusu tulun baa Na'i Maromak, Nia nanis sori sia.”d
14 Mais kalo ema sei la natene Nia dauk, oin nunabee sia bele nusu tulun baa Nia? La bele! Kalo sia sei la rona lia nosi Nia dauk, oin nunabee sia bele fiar baa Nia? La bele! Kalo sei la noo mak baa katak lia nosi Nia baa sia, oin nunabee sia bele rona Niakaan lia nia? La bele! 15 Kalo sei la noo mak solok ema dauk, oin nunabee ema bele baa katak Niakaan lia baa sia? La bele! Tan Hakerek Moon na'ak, “Ema mak nodi lia di'ak mai, niakaan mamain nia kabaas basuk!”e
16 Mais emi hatene ti'an ha'ak, noo ema Isra'el balu mak la no'uk rona Lia Di'ak. Maromak mako'an Yesaya nakerek na'ak,
“Ama Maromak!
Ema sia la no'uk fiar Ama Manfatin
mak sia rona ti'an nosi ami!”f
17 Ema musti rona uluk lia nosi Kristus, foin sia bele fiar. Musti noo ema mak katak uluk Niakaan lia nia baa sia, foin sia bele rona.
18 Ha'u kusu kokon nune'e: arumak emi hanoin ha'ak, ema Isra'el sia la dala ida rona nosi lia Kristus ka? Sia rona nanis ti'an! Tan Hakerek Moon na'ak,
“Maromak mako'an siakaan lia mamenon
keke lema raiklaran tomak ti'an.
Siakaan lia fuan
to'o raiklaran lidun no sikun sia ti'an.”g
19 Ha'u atu kusu tenik lia ida ka'ak, “Ema Isra'el sia natene Na'i Maromak dalan, ka lale?” Sia nanis natene! Bei Musa nakerek uluk nosi lia nia ti'an. Baa oras nia, Na'i Maromak katak baa ema Isra'el na'ak,
“Ha'u atu kalo lia di'ak
bodik ema klubun seluk sia.
Tan lia nia, emi atu hirus.
Ha'u atu kalo lia di'ak
bodik ema mak emi temi ha'ak kakutak tomak.
Tan lia nia, emi atu ruun ne'an.”h
20 Nosi ikus, Bei Yesaya moos nakerek malorek nosi ema lahoos Yahudi na'ak,
“Noo ema mak uluk la buka Ha'u,
mais oras ne'e sia nasoru nola Ha'u ti'an.
Noo ema mak uluk la nusu atu naree Ha'u,
mais oras ne'e Ha'u katadu aan baa sia ti'an.”i
21 Mais Na'i Maromak katak nosi ema Isra'el nune'e:
“Loron-kalan Ha'u kein ema Isra'el sia mai baa Ha'u.
Ha'u kbeer simu sia kodi liman rua.
Mais sia la no'uk mai.
Sia la nanono baa Ha'u nodi sakar Ha'u.”j