Ukun-badu la kona baa ema mak mate ti'an
7
Mamaluk sia! Oras ne'e, ha'u katak baa emi mak hatene lia ukun-badu. Emi nanis hatene ha'ak, ema ukunrai ida musti tuir ukun-badu nosi ukunrai nia. Mais kalo ema nia mate ti'an, ukun-badu nia la kona baa nia ona. 2 Ha'u kola kaninuk kosi ukun-badu feen-la'en. Tuir ukun-badu feen-la'en, kalo feto ida noo la'en ti'an, sia rua talin malu to'o mate. Mais kalo la'en mate ti'an, feto faluk nia la kona ona ukun-badu nia. Nia bele noo seluk la'en. 3 Mais tuir ukun-badu feen-la'en, kalo noo seluk la'en baa oras la'en uluk sei moris, feto nia nakur biti-kluni. Mais kalo la'en mate ti'an, ukun-badu feen-la'en la kona baa nia ona. Masik noo seluk la'en, la nakur biti-kluni.4 Nunia moos bodik ita, mamaluk sia! Uluk ita talin malu ho Ukun-badu. Mais tan ita mate hamutuk ho Kristus ti'an, Ukun-badu nia la kona baa ita ona. Oras ne'e, ita hanesan feto kfaluk mak noo seluk la'en, tan ita talin malu ti'an ho Kristus. Nia moris nikar ti'an nosi mate, nebee ita bele moris hodi halo hahalok mak foo kneter baa Na'i Maromak.
5 Uluk, ita moris tuir itakaan hakara du'uk. Ita hatene Ukun-badu, mais ita hakur luku hodi halo sala. Hotu, Na'i Maromak se'i kotuk baa ita, tan sala nia. 6 Tebes. Uluk, ita kona Ukun-badu. Mais oras ne'e, la kona ona tan itakaan moris tuan lakon mohu ti'an. Tuir dalan tuan, Ukun-badu mak babilan ita. Mais tuir dalan foun, Na'i Maromak Kmalar Lulik mak babilan ita. Nia moos nakara nebee ita serwisu bodik Na'i Maromak.
Na'i Maromak Ukun-badu nalore a'aat iha itakaan neon laran
7 Kalo nunia, ita atu dale saa tenik? Arumak emi haneo ha'ak, “Na'i Maromak Ukun-badu nia, sala!” Lale! Kalo ha'u la katene Ukun-badu nia sia, ha'u la koran aat iha ha'ukaan neon. Ha'u kola knaninuk nosi Ukun-badu ida mak na'ak, “Keta beer hola ema sasoin.” Oin nunabee ha'u kbele katene hahalok nia sala, kalo la katene niakaan ukun-badu nia dauk? La kbele!a 8 Mais tan noo ukun-badu nunia, a'aat iha ha'ukaan neon laran nalo ha'u kbeer kola ema sasoin oi-oik. Kalo la noo ukun-badu mak badu lia ida, ha'u la kbeer kakur kodi kalo sala.
9 Uluk, ha'u la katene Na'i Maromak Ukun-badu dauk. Baa oras nia, ha'u kmoris koran aan ema di'ak. Kleu-leur, foin katene noo Ukun-badu mak badu lia sia. Hotu, a'aat iha ha'ukaan neon laran nakfodak sai, to'o ha'u kakur Ukun-badu nia, kodi kalo sala. 10 Tan sala nia, ha'u kfatan kona Na'i Maromak hahibun to'o mate. Ha'ukaan neon dodok tan katene ka'ak, masik ha'u karui aan atu moris tuir Ukun-badu nia moos, ha'u la kbele. Tuir loos, Ukun-badu nia musti babilan ema baa dalan moris loos. Mais bodik ha'u du'uk, Ukun-badu nia nahaat ha'u, to'o Na'i Maromak nahibu ha'u. 11 Tebes. Ukun-badu nia musti natudu dalan moris loos. Mais a'aat iha ha'ukaan neon laran tolek ha'u, to'o ha'u kanoin sala ka'ak, Na'i Maromak simu ha'u, surak moris tuir Ukun-badu. Hodi nunia, a'aat iha ha'ukaan neon laran nodi Ukun-badu atu natuun kastikar mate baa ha'u.b
12 Kalo ohin nia emi ha'ak, “Na'i Maromak Ukun-badu nia, sala,” ha'u kataa ka'ak, “Lale! Na'i Maromak Ukun-badu nia, moon! Nia naruka loos lia mak moon, lia mak loos, no lia mak di'ak.”
13 Arumak emi haneo ha'ak, Ukun-badu mak nalo Na'i Maromak natuun kastikar mate baa ha'u ka? Lale! Masik ha'u katene ti'an Ukun-badu nia, ha'u krona baa a'aat iha ha'ukaan neon laran, to'o kalo sala. Ha'ukaan salan nia mak nalo Na'i Maromak natuun kastikar mate baa ha'u. Ukun-badu nia du'uk, di'ak, tan nalore a'aat iha itakaan neon laran. Hotu a'aat nia mak nahonu ita baa sala, to'o Na'i Maromak nahibu. Natoon baa oras Na'i Maromak nodi Ukun-badu nalore dalan moris loos, Ukun-badu nia moos nalore a'aat iha itakaan neon laran.
Lia di'ak no lia aat sakar malu iha itakaan neon laran
14 Ita hatene ha'ak, Ukun-badu mak Na'i Maromak natuun nosi lale'an, mai nosi Niakaan Kmalar Lulik. Mais ha'u ne'e, ema raiklaran mak neon la biit. Ha'u krona baa a'aat iha neon laran, hotu kalo sala. Kodi nunia, a'aat ukun ha'u, nalo ha'u baa ata. 15 Ha'u kbenar tan ha'ukaan lisan ne'e. Lia di'ak mak kakara kalo, ha'u la kalo. Mais lia aat mak la kakara kalo, ha'u kalo luku.c 16 Tan lia nia, ha'u ksimu ka'ak, Na'i Maromak Ukun-badu nia, di'ak. 17 Tan lahoos ha'u mak babilan aan du'uk, mais a'aat iha ha'ukaan neon mak babilan ha'u to'o kalo sala.
18 Ha'u katene du'uk ka'ak, la noo lia di'ak kois iha ha'ukaan neon. Tan ha'u ne'e, ema raiklaran lisan aat. Masik ha'u karui aan kalo lia di'ak moos, la kbele. 19 Ha'u kbeer kalo lia di'ak, mais la kalo. Ha'u la kbeer kalo lia aat, mais kalo luku. 20 Nune'e. Kalo ha'u kalo lia aat mak la kakara kalo, lahoos ha'u du'uk, mais tan a'aat moris iha ha'ukaan neon.
21 Lia huun nune'e: Ha'u kakara kalo lia di'ak, mais noo a'aat iha ha'ukaan neon mak sakar bei-beik. 22 Kalo ha'u kanoin kola Na'i Maromak Ukun-badu, ha'ukaan neon di'ak tebes. 23 Mais nu'u noo beran iha ha'ukaan neon laran mak nahaat ha'u. Ha'u kakara kalo lia di'ak, mais la dadi. Nu'u beran nia kohi nola ha'u, nodi seten ha'u atu tuir nia. 24 Aa! Ha'u ne'e susar tebes! See mak bele sori ha'u nosi a'aat beran iha ha'ukaan neon laran mak nodi ha'u baa mate ne'e?
25 Adeei! Na'i Maromak loke dalan ti'an atu nasai ha'u nosi a'aat beran nia. Ha'u ksera dodan baa Nia, tan itakaan Na'in Yesus Kristus bele sori ha'u! Tuir loos, ha'u kakara moris tuir Na'i Maromak Ukun-badu. Mais ha'u ksusar, tan noo a'aat iha ha'ukaan neon mak koen ha'u bei-beik atu kalo sala.