3 Masik ita tuir hotu Na'i Maromak Ukun-badu moos, ita la bele sai hosi a'aat beran, tan ita ema raiklaran mak neon la biit. Mais Na'i Maromak loke dalan nodi solok Oan du'uk dadi ema raiklaran nu'u ita. Ema raiklaran seluk sia nalo sala oi-oik, mais Yesus du'uk la dala ida nalo sala. Hotu, Nia dadi baa sera atu kasu mohu sala nosi ema maksalan sia. 4 Tan lia nia, ita bele moris loos tuir Na'i Maromak Ukun-badu. Ita la moris tuir itakaan beer du'uk ona, mais moris tuir Na'i Maromak Kmalar Lulik beer.

5 Ema mak moris tuir beer du'uk, naneo loos lia aat. Mais ema mak moris tuir Kmalar Lulik beer, naneo loos lia mak nalo Kmalar Lulik neon di'ak. 6 Ema mak foo leet baa a'aat atu babilan niakaan kakutak, nia la nanono kois baa Kmalar Lulik. Nia nalo sala mak nodi nia baa mate. Mais ema mak foo leet baa Kmalar Lulik atu babilan niakaan kakutak, nia netan moris mak loos. Nia moos neon noku.

7 Ema mak tuir a'aat iha neon laran, sakar Na'i Maromak. Nia la nanono baa Na'i Maromak ukun, tan neon la biit. 8 Hanoin! Tan ema mak foo leet baa a'aat iha neon laran atu babilan nia, nanis nia la bele nalo Na'i Maromak neon di'ak.

9 Mais emi la moris tuir a'aat iha neon laran ona. Kalo tebes Kmalar Lulik mak babilan emikaan neon, emi nanis halo lia mak nalo Nia neon di'ak. Hanoin! Kalo Kristus Kmalar Lulik la moris iha ema neon, ema nia lahoos Kristus eman. 10 Mais tan Kristus moris iha emikaan neon ti'an, masik emi mate tan hahalok sala, emikaan kmalar atu moris no Na'i Maromak to'o nima-nimak. Lia nia bele dadi tan Na'i Maromak simu emi ti'an no nafoli emi na'ak, ema loos. 11 Na'i Maromak, mak nalo Yesus moris nikar nosi mate. Dadi, masik ita mate ti'an, kalo Niakaan Kmalar Lulik moris iha itakaan neon, Nia nalo ita moris hikar. Ne'e na'ak, Nia atu nalo ita moris hikar, nu'u nalo Kristus moris nikar.^a

12 Nune'e, mamaluk sia! Ita ne'e hoo tusan boot baa Na'i Maromak, tan Nia fakar mohu Niakaan dadi'ak wa'in baa ita ti'an. Oras ne'e ita musti selu tusan nia hodi moris tuir Niakaan hakaran. Ita la moris tuir a'aat iha itakaan neon laran ona. 13 Kalo ita moris tuir a'aat iha neon laran, nanis Na'i Maromak se'i kotuk no kastikar ita! Mais kalo ita foo leet baa Kmalar Lulik nadodok a'aat iha itakaan neon laran, ita bele moris loos.

14 Ema mak nanono baa Kmalar Lulik babilan, sia mak Na'i Maromak oan. 15 Kalo ita foo leet baa Kmalar Lulik babilan, Nia la nalo ita baa ata mak moris ta'uk teen. Uluk, ita moris nunia tebes. Mais tan ita simu Kmalar Lulik babilan, ita dadi Na'i Maromak oan ti'an. Na'i Maromak nanis rona ita, kalo ita bolu Nia ha'ak, “Ama!”^b

16 Ita hatene iha neon laran du'uk ha'ak, ita dadi Na'i Maromak oan sia. Kmalar Lulik moos natudu na'ak nunia. 17 Tan ita dadi Na'i Maromak oan ti'an nunia, ita nanis simu sasoin nosi itakaan Ama. Kalo Ama Maromak latan sasoin baa Oan Kristus, ita moos simu bele-bele ho Kristus. Mais sei noo lia ida tenik: Ita moos musti hetan susar, hanesan Kristus netan susar, nebee Na'i Maromak foti-nahaas ita, hanesan Nia foti-nahaas Kristus.^c

18 Tuir ha'u, susar mak ita hetan baa oras ne'e, oan ida dei kalo ita sura-hanesa no kabaas mak Na'i Maromak nameno atu foo baa ita. 19 Raiklaran no sasoin hotu-hotu mak Na'i Maromak nase'i ti'an, sei hei-hein saa mak Nia atu natudu baa Niakaan oan sia. 20 Uluk aan, raiklaran no sasoin hotu-hotu kona kastikar to'o sia la no folin. Lia nia, lahoos siakaan beer, mais tan Na'i Maromak natuun kastikar nunia. Masik nunia moos, sia sei neo-neon baa,^d 21 tan Na'i Maromak nameno atu sori sia nosi mate. Hotu, Nia atu foo kabaas baa sia, hanesan Nia nameno foo baa Niakaan oan sia.

22 Ita hatene ha'ak, iha raiklaran ne'e noo susar lear. Hori uluk aan to'o oras ne'e, raiklaran no sasoin hotu-hotu nahoron tan moras nodi neo-neon baa hotu-hotu atu dadi foun. Sia, nu'u feto mak nahoron tan moras nodi neo-neon atu nahoris. 23 Lahoos raiklaran no sasoin mesan dei mak neo-neon, mais ita hotu. Na'i Maromak foo uluk Kmalar Lulik baa ita. Mais ita sei neo-neon nebee Na'i Maromak moos foti ita dadi baa Niakaan oan, nodi sori itakaan isin lolon nosi a'aat hotu-hotu.^e

24 Baa oras ita fiar baa Yesus atu sori ita, Na'i Maromak moos nameno atu foti ita nalo baa Niakaan oan. Mais oras ne'e, ita sei neo-neon, tan sei la dadi dauk. Ema neo-neon baa lia mak dadi ti'an ka? Lale! Kalo ema ida naree lia ida mak dadi ti'an, nia lalika neo-neon ona. 25 Mais kalo ita sei neo-neon baa lia ida mak sei la dadi dauk, ita musti haterus aan hodi hein bei-beik.

26 Oras ita sei hein, Kmalar Lulik tulun ita, tan itakaan neon la biit no ita la hatene hamulak tuir loos. Masik ita hamuu loos iha neon laran tan la hatene atu hamulak hodi lia fuan saa, Kmalar Lulik namulak seluk ita. 27 Na'i Maromak natene hotu-hotu mak ita beer hamulak iha neon laran. Nia moos natene Kmalar Lulik beer, tan manesak no Niakaan beer. Tan lia nia, Nia natene lia hotu-hotu mak Kmalar Lulik beer namulak bodik ita ema makfiar. Saa mak Kmalar Lulik namulak, nanis kona baa Na'i Maromak beer.

28 Ita hatene ha'ak, Na'i Maromak nalo hotu-hotu dadi di'ak bodik ema mak nadomi Nia no boi kedan atu tuir Niakaan hakara. 29 Hori uluk aan, Nia natene see mak atu dadi baa Niakaan oan. Nia moos boi nola sia nebee siakaan lisan dadi hanesan Niakaan Oan Kristus. Kristus nia, mak oan ulun. Rumak sia, mak alin. 30 Ema mak Na'i Maromak boi kedan, Nia bolu nola sia atu dadi baa Niakaan oan. Ema mak Nia bolu nola ti'an, Nia nafoli sia na'ak ema loos. Ema mak Nia naloos ti'an, nosi ikus Nia moos foti-nahaas nodi foo kabaas baa sia.

31 Oras ne'e, ita atu dale saa tenik nosi lia nia sia? Kalo Na'i Maromak nariik nosi ita, see mak bele sakar ita? La noo! 32 Na'i Maromak la natoos Oan du'uk, mais latan nebee mate dadi sera atu tulun ita hotu-hotu. Tan Nia la natoos Oan nunia bodik ita, ita bele hatene ha'ak, Nia moos atu foo di'ak hotu-hotu baa ita. Tebes.

33 Arumak emi haneo ha'ak, sei noo ema mak bele tula sala baa ita ka? La noo! La noo ema ida mak bele tula sala baa ita, tan Na'i Maromak boi nola ita ti'an. Nia du'uk nafoli ita na'ak, ema loos. 34 Arumak emi haneo ha'ak, sei noo ema mak bele dale na'ak, Na'i Maromak musti kastikar ita ka? La noo! Na'i Maromak la kastikar ita ona, tan Nia boi ita ti'an, no Yesus Kristus mate selu nola ita. Liu tan tenik, Na'i Maromak nalo Yesus moris nikar, hotu foti Nia nebee nabesi aan baa fatin kneter kaliuk iha Na'i Maromak sorin kwana. Iha nia, Yesus namulak bodik ita.

35 Arumak emi haneo ha'ak, noo ema mak bele seten Kristus to'o Nia la nadomi ita tenik ka? La noo! La noo ida kois mak bele! Masik ita hetan susar ka, mukit ka, salaen ka, la noo tais ka, dinu ka, ema atu no'o ita ka, Kristus nadomi ita nohuun. La noo ida kois mak bele taa kotu ita nosi Niakaan dadomin! 36 Hakerek Moon na'ak,

37 Masik ita hetan susar oin nunabee moos, ita sai luku tan Kristus nadomi ita.

38 Ha'u kfiar nune'e: la noo ida kois mak bele saseni Na'i Maromak to'o Nia la nadomi ita. Ita moris ka, ita mate ka, Nia nadomi nohuun. Makbukar lale'an ka, diabu ka, makaer beran seluk ka, la noo ida mak bele seten Na'i Maromak to'o Nia la nadomi ita. Masik baa oras ne'e ka, baa loron ikus ka, la noo. 39 La noo ida iha lale'an, la noo ida iha raiklaran. Nosi sasoin hotu-hotu mak Na'i Maromak nase'i moos, la noo ida mak bele sasa fa'e ita nosi Na'i Maromak dadomin, tan ita talin malu ti'an ho itakaan Na'in Yesus Kristus.