Ita musti la'o hela itakaan salan, nebee moris loos tuir Na'i Maromak
6
Oras ne'e, ita atu dale saa tenik? Arumak emi haneo ha'ak, “Na'i Maromak kasu itakaan salan tan Nia laran di'ak. Di'ak liu halo sala bei-beik, nebee Nia hetak natudu laran di'ak baa ita.” Nunia ka? 2 La bele nunia! La kona kalo ita halo sala bei-beik. Ita se'i kotuk la'o hela itakaan salan ti'an, tan ita la talin malu ho a'aat ona. Lia nia, nu'u ita mate ti'an! Kalo ema mate ti'an, nia la bele nalo sala ona. Kalo ita la talin malu ho a'aat ona, oin nunabee ita bele moris hodi halo sala tenik? La bele!3 Arumak, emi la hatene ha'ak, baa oras ita simu sarani, sarani nia dadi tadak na'ak, ita talin malu ho Yesus Kristus ti'an. Sarani nia moos foo tadak na'ak, ita mate hamutuk ho Nia ti'an. 4 Baa oras Kristus mate, ema nakoi Nia. Oras ita simu sarani, hanesan ita moos mate, hotu ema nakoi ita. Lia nia natetek na'ak, ita la talin malu tenik ho itakaan moris tuan ona. Mais hanoin, tan Kristus la nein iha mate fatin. Ama Maromak nodi Niakaan beran boot nalo Nia moris nikar nosi mate, no foo moris foun baa Nia. Nunia moos, Ama Maromak nodi Niakaan beran foo moris foun no lisan foun baa ita.a
5 Ita nu'u mate hamutuk ho Yesus Kristus. Tan lia nia, nu'u ita moos moris hikar hosi mate ti'an hanesan Nia, tan ita talin malu ho Nia.
6 Uluk, ita moris tuir a'aat iha itakaan neon laran. A'aat nia mak naruka ita atu halo sala. Mais itakaan moris uluk nia mohu ti'an, nu'u ema nedi no'o baa ai karuus hamutuk ho Kristus. Oras ne'e, ita la talin malu ho a'aat nia ti'an. A'aat la kaer beran iha itakaan moris ona. Uluk, a'aat ukun ita hanesan ata. Mais oras ne'e, ita sai hosi ata ti'an. A'aat la bele ukun ita ona. 7 Kalo ema ida mate, nia la kona ukun ti'an. La noo sa-saa mak bele ukun nia atu nalo tenik sala.
8 Tan ita nu'u mate hamutuk ho Kristus, ita fiar ha'ak, ita moos moris hamutuk ho Nia. 9 Ita hatene ha'ak, Kristus moris nikar nosi mate ti'an. Oras ne'e, Nia la mate tenik ona, tan la noo beran ida kois mak bele nalo Nia mate tenik. 10 Nia mate dala ida nia nodi kasu mohu a'aat beran hotu-hotu. Oras ne'e, Nia moris nodi nakneter Na'i Maromak.
11 Emi ida-idak musti hafolin aan hodi dale iha neon laran du'uk ha'ak, “Ha'u nu'u kmate ti'an ko Yesus Kristus. Ha'u la ktalin malu ona ko a'aat mak uluk ukun ha'u atu kalo sala. Oras ne'e, ha'u kmoris tuir Na'i Maromak beer, tan ha'u ktalin malu ko Yesus Kristus ti'an.”
12 Keta foo leet baa a'aat iha okaan neon atu ukun o. Keta tuir okaan isin lolon beer modi malo aat. Tan nosi ikus o mate, hotu ema nakoi okaan isin. 13 Keta sera isin lolon modi malo lia mak la loos, tan lia nia sala. Mais sera baa Na'i Maromak dei, nebee Nia mak babilan o. Nu'u o mate ti'an, mais moris mikar. Modi okaan isin lolon tomak, malo lia loos bodik Na'i Maromak. 14 A'aat la bele ukun tenik o hanesan ata ona! Oras ne'e, o la moris tenik tuir Ukun-badu nebee Na'i Maromak simu o. O moris loos, tan Nia natudu laran di'ak baa o ti'an.
Ita dadi ata mak serwisu tuir itakaan ulun beer
15 Nu'unabee? Arumak emi haneo ha'ak, “Tan Ukun-badu la kona tenik baa ita ona, di'ak liu ita halo sala bei-beik, nebee Na'i Maromak hetak natudu laran di'ak baa ita!” Nunia ka? Keta hanoin nunia! 16 Kola knaninuk kosi ata no ulun. Kalo ema boi atu serwisu bodik ulun ida, ema nia musti nanono nodi serwisu tuir niakaan ulun beer. Nunia moos, emi bele boi atu tuir nabee. Boi atu hanono baa a'aat iha neon laran ka, boi atu hanono baa Na'i Maromak. Kalo boi atu hanono baa a'aat, emi dadi ata baa a'aat. Emi moos la talin malu ho Na'i Maromak. Mais kalo boi atu hanono baa Na'i Maromak, Nia simu emi no nafoli emi na'ak, ema loos.
17 Uluk, emi hanono baa a'aat iha neon laran. Mais oras ne'e, emi hanono baa hanorin loos iha neon laran mak ema nanorin baa emi ti'an. Tan baa nia, ha'u kamulak sera dodan baa Na'i Maromak. 18 Nia nasai emi ti'an nosi a'aat beran, to'o a'aat la bele ukun emi atu halo sala tenik. Oras ne'e, Na'i Maromak mak ukun emi atu halo lia loos.
19 Ha'u kdale ne'e, kodi knaninuk loron-loron nosi ata no ulun, nebee emi maus hatene ha'ukaan hakara. Uluk, emi dadi ata mak hanono baa a'aat, to'o emi sakar Na'i Maromak hodi halo lia sasobo iha Niakaan oin. Oras ne'e, emi musti dadi ata tenik. Mais emi musti hanono baa Na'i Maromak hanorin loos, to'o emi moris moos iha Niakaan oin.
20 Uluk, baa oras a'aat naruka emi halo sala, la noo ida mak naruka emi halo lia loos. Emi halo hahalok aat dei. 21 Mais ha'u atu kusu nune'e: Emi hetan folin di'ak saa hosi hahalok nia sia? La hetan! Hetan loos folin mak namoe emi dei. Tuir loos, hahalok nia folin, mak Na'i Maromak se'i kotuk baa emi.
22 Mais oras ne'e, Na'i Maromak nasai emi ti'an nosi ulun tuan nia. Emi lalika halo sala tenik. Oras ne'e, emikaan ulun foun mak Na'i Maromak. Emi musti serwisu bodik Nia. Hahalok nia folin, mak emi moris moos iha Niakaan oin, hodi hetan moris to'o nima-nimak. 23 Ema mak nalo sala, niakaan folin nodi ema baa mate, no Na'i Maromak se'i kotuk baa nia to'o nima-nimak. Mais dadi'ak mak Na'i Maromak foo loos baa ita, niakaan folin nodi ema baa moris nima-nimak hamutuk ho Nia. Ita bele simu moris nia, tan talin malu ho itakaan Na'in, Yesus Kristus.