Na'i Maromak naloos ema, surak fiar baa Nia
5
Tan ita fiar baa Yesus Kristus, Na'i Maromak nafoli ita na'ak, ema loos. Hodi nunia, ita bele talin malu ho Na'i Maromak, tan itakaan Na'in Yesus Kristus loke dalan ti'an. 2 Nia nalo nunia, nebee ita bele simu Na'i Maromak laran di'ak, surak ita fiar baa Nia. Hodi nunia, itakaan fiar hetak biit. Ita moos neon boot, tan ita hatene ha'ak, ita bele horan Na'i Maromak Niakaan kabaas.3 Masik ita hetan susar oi-oik, ita bele neon boot nohuun. Tan ita hatene ha'ak, ita bele hanorin aan hosi susar nia, nebee ita haterus aan hetak biit. 4 Kalo ita haterus aan, ita la monu baa sala. Na'i Maromak moos neon di'ak baa itakaan moris. Tan lia nia, ita bele fiar ha'ak, Nia beer atu natudu laran di'ak bei-beik baa ita. 5 Kalo ita fiar nunia, ita la neon ki'ik ona. Tan Na'i Maromak foo Niakaan Kmalar Lulik baa ita, nebee ita bele horan Niakaan dadomin boot iha itakaan neon no laran.
6 Niakaan dadomin nia, nune'e: natoon baa oras ita ema maksalan la bele halo sa-saa, Na'i Maromak boi leet ti'an atu solok Kristus mai, nebee mate bodik ita. 7 Hanoin di'a-di'ak! Iha raiklaran ne'e, dala ida-idak dei ema simu mate atu seluk belun mak moris moon. Kalo belun nia tebe-tebes ema laran di'ak, arumak noo ema mak simu mate atu seluk nia. 8 Mais Na'i Maromak dadomin lahoos nunia. Tan oras ita sei halo sala bei-beik moos, Kristus mate selu nola ita ti'an.
9 Na'i Maromak naloos ita, tan Kristus naduar raan to'o mate, selu nola ita. Tuir loos, Na'i Maromak nahibu ema mak noo sala. Nia atu kastikar sia baa oras rai falu fila. Mais tan Kristus selu nola ita ti'an, ita la kona hahibun nia ona.
10 Uluk, ita funu Na'i Maromak. Mais Niakaan Oan du'uk mate, nalo Na'i Maromak laran malirin, to'o ita bele dame hikar ho Nia. Liu tan tenik, Niakaan Oan moris nikar ti'an. Baa oras rai falu fila, Nia atu sori ita hosi Na'i Maromak hahibun. 11 Lahoos nia dei! Ita moos bele neon boot tan oras ne'e ita talin malu hikar ho Na'i Maromak ti'an. Lia nia bele dadi, tan itakaan Na'in Yesus Kristus mate selu nola ita.
Kalo ita hanesa Adam no Kristus, ita hetan lia manesak no lia makseluk
12 Hori uluk aan, sala moris iha raiklaran tan ema ida nakur Na'i Maromak ukun. Ema nia, naran Adam. Tan Adam nalo sala, nia mate. Hotu, ema raiklaran hotu-hotu moos tuir nalo sala. Etuk, sia moos musti mate, hanesan Adam.a 13 Uluk aan, baa oras Na'i Maromak sei la natuun dauk Niakaan Ukun-badu, ema raiklaran tomak nalo sala. Mais tan la noo Ukun-badu dauk, la noo mak sura siakaan salan. 14 Masik nunia moos, sia hotu-hotu mate, nahuu nosi Adam to'o Bei Musa simu Na'i Maromak Ukun-badu. Masik sia la nakur ukun uluk fohon mak Adam nakur nia, sia nalo sala seluk sia. Etuk, sia moos mate, hanesan Adam.
Ita bele hanesa bei Adam no Yesus Kristus mak mai nosi ikus, tan Adam nu'u ilas ida mak natudu Yesus ilas. Nosi siakaan ilas ida-idak, ita hetan lia manesak no lia makseluk. 15 Adam niakaan hahalok oin seluk nosi Yesus Niakaan hahalok. Adam nalo sala nodi nakur Na'i Maromak ukun. Tan sala nia, ema raiklaran hotu-hotu musti mate. Mais Ema ida tenik, naran Yesus Kristus, nalo lia di'ak mak atu foo loos baa ema hotu-hotu. Nia la buka ema selu nikar Niakaan dadi'ak nia, tan saa mak Nia nalo nia to'o ti'an bodik ema hotu-hotu. Hodi nunia, Na'i Maromak natudu laran di'ak baa ema hotu-hotu. 16 Saa mak Na'i Maromak foo baa ita, seluk nosi saa mak Adam nalo. Adam nalo sala, hotu Na'i Maromak nakotu na'ak, “O sala! O musti kona kastikar.” Mais oras ne'e Na'i Maromak natudu laran di'ak baa ita ti'an. Masik ita halo sala butuk bein moos, Nia naloos ita nodi nakotu na'ak, “O la sala. O la kona kastikar.” 17 Tan ema ida nalo sala, ema hotu-hotu iha raiklaran musti mate. Mais Ema ida tenik naran Yesus Kristus nalo di'ak. Dadi, ita bele simu Na'i Maromak laran di'ak mak Nia foo loos baa ita to'o naloos ita. Nosi ikus, ita moos bele moris hodi kaer ukun hamutuk ho Yesus Kristus.
18 Ema ida niakaan hahalok sala loke dalan nebee ema hotu-hotu kona kastikar nosi Na'i Maromak. Ema ida tenik Niakaan hahalok loos, loke dalan nebee Na'i Maromak naloos ema hotu-hotu no foo moris nima-nimak baa sia. 19 Kanoin nune'e: Adam nia, ema ida mak la no'uk rona Na'i Maromak to'o nakur Na'i Maromak ukun. Hotu, ema lear moos tuir nalo sala. Mais Yesus nia, Ema ida mak rona Na'i Maromak nodi nalo tuir Niakaan hakara. Hodi nunia, Nia loke dalan nebee Na'i Maromak naloos ema lear.
20 Na'i Maromak natuun Ukun-badu baa Bei Musa, nebee ema raiklaran bele natene aan na'ak, sia nalo sala wa'in. Masik ema nalo sala hetak wa'in, Na'i Maromak natudu laran di'ak liu tan tenik. 21 Uluk, a'aat mak iha ema neon laran ukun sia, to'o sia nalo sala mak nodi sia baa mate. Mais oras ne'e, Na'i Maromak mak ukun ita, nodi natudu laran di'ak baa ita. Nia naloos ita no foo moris nima-nimak baa ita, tan ita fiar baa itakaan Na'in Yesus Kristus.