Knaninuk nosi Bei Abraham, mak Na'i Maromak naloos tan nia fiar
4
Oras ne'e, hola knaninuk hosi ami ema Yahudi bei uluk fohon, naran Abraham. Nia nalo saa, to'o Na'i Maromak naloos nia?2 Kalo Na'i Maromak naloos Abraham, tan Abraham niakaan hahalok du'uk, Abraham bele dale wa'in iha ema raiklaran oin, mais la bele dale sa-saa iha Na'i Maromak oin. 3 Tuir loos, Hakerek Moon na'ak:
“Tan Abraham fiar Na'i Maromak,
Na'i Maromak nafoli nia na'ak, ema loos.”a
4 Ema serwisu, musti simu kansera. Osan mak nia simu nia, lahoos osan mak ulun foo loos baa nia, mais osan selu kolen. 5 Ita ema maksalan la bele halo sa-saa nebee Na'i Maromak naloos ita. Mais kalo ita fiar, Nia foo loos Niakaan dadi'ak baa ita, nodi nafoli ita na'ak, ema loos.
6 Uluk Na'i Daud nakerek nosi ema mak neon boot. Masik sia la nalo lia di'ak kois, Na'i Maromak nafoli sia na'ak, ema loos. Hakerek nia, nune'e:
7 “Masik ema nakur Na'i Maromak Ukun-badu moos,
Nia kasu mohu siakaan salan.
Etuk, sia neon boot!
Masik ema nalo aat,
Na'i Maromak nalu'a lakon siakaan salan.
8 Kalo Na'i Maromak la sura ema salan,
ema nia sotir tebes!”b
9 Na'i Daud nakerek kedan nunia. Mais arumak emi haneo ha'ak, “Ema mak netan sotir nunia, ema Yahudi mak namane aan dei. Ema seluk la netan.” Hanoin nunia la kona! Tan ita hatene ha'ak, Na'i Maromak nafoli Abraham na'ak, ema loos, tan Abraham fiar baa Nia. 10 Hori hirak Na'i Maromak nafoli Abraham nunia? Baa oras namane aan ti'an ka, baa oras sei la namane aan dauk? Tuir loos, Na'i Maromak nafoli Abraham na'ak, ema loos, baa oras Abraham sei la namane aan dauk.
11 Tebes! Baa oras Abraham sei la namane aan dauk, Na'i Maromak nafoli nia ti'an na'ak, ema loos. Kleu-leur lai, foin Abraham namane aan atu dadi tadak na'ak, nia ema makfiar baa Na'i Maromak. Hodi nunia, Abraham loke dalan bodik ema hotu-hotu mak fiar baa Na'i Maromak. Masik ema namane aan ka, la namane aan ka, Na'i Maromak simu sia hotu-hotu.c 12 Abraham moos loke dalan ti'an bodik ami ema Yahudi. Mais lahoos ami hala'ok lahan hamane aan, mais tan ami fiar Kristus, hanesan Abraham fiar Na'i Maromak baa oras nia sei la namane aan dauk.
Kalo ita fiar baa Na'i Maromak, nanis ita simu saa mak Nia nameno ti'an atu foo baa ita
13 Na'i Maromak namate menon no Abraham no niakaan husar-binan na'ak, kleu-leur raiklaran tomak dadi baa siakaan bein sasoin. Na'i Maromak nameno nunia, lahoos Abraham moris tuir Ukun-badu, mais tan Abraham fiar baa Nia. Tan lia nia, Nia nafoli Abraham na'ak, ema loos.d
14 Kalo ita bele simu bein sasoin tan tuir Ukun-badu, ne'e na'ak, itakaan fiar baa Na'i Maromak butan dei. Na'i Maromak mamenon moos, la noo folin.e 15 Na'i Maromak Ukun-badu kona baa ema, foin ema nakur. Sia nakur ti'an, Na'i Maromak moos nahibu to'o kastikar sia. Mais kalo Ukun-badu la kona baa ema, ne'e na'ak, sia moos la nakur.
16 Tan lia nia, ita hatene ha'ak, itakaan fiar mak folin kaliuk. Masik ita ema Yahudi mak tuir Ukun-badu ka, ema seluk ka, Na'i Maromak nakara foo loos saa mak Nia nameno ti'an baa ita. Kalo ita fiar Nia hanesan Abraham, ita simu Niakaan mamenon. Hodi nunia, ita hotu-hotu mak fiar baa Na'i Maromak dadi Abraham husar-binan.f 17 Iha Hakerek Moon, Na'i Maromak nameno baa Abraham na'ak, “Ha'u kakotu ti'an, nebee o dadi bei uluk bodik ema klubun lear.” Rona nola nunia, Abraham fiar baa Na'i Maromak. Na'i Maromak nia, Maromak mak bele nalo ema mak mate ti'an moris nikar. Nia moos Maromak mak bele nase'i saa mak la iha, dadi kedas.g
18 Abraham fiar na'ak masik nia sei la noo oan dauk, Na'i Maromak atu foo husar-binan baa nia. Tan Nia fiar baa Na'i Maromak nunia, Na'i Maromak nala'ok Niakaan mamenon nia, nalo Abraham dadi “bei uluk bodik ema klubun lear.” Iha Hakerek Moon, Na'i Maromak moos katak baa Abraham na'ak, “Husar-binan lear atu mai nosi o.”h 19 Abraham fiar biit baa Na'i Maromak, masik nia du'uk katuas hela mesan ruin, no otas tinan atus ida ti'an. Feen Sara moos, ferik karin ti'an. Knotak moos, maran ti'an.i 20 Mais Abraham niakaan fiar la nawae. Nia la dala ida naneo na'ak Na'i Maromak la bele nala'ok Niakaan mamenon nia. Nia fiar biit baa Na'i Maromak nohuun, nodi foti-nahaas Niakaan naran. 21 Abraham fiar tebe-tebes na'ak, Na'i Maromak noo beran atu nalo tuir saa mak Nia nameno nela ti'an baa nia. 22 Tan baa nia, Hakerek Moon na'ak, “Na'i Maromak nafoli Abraham na'ak, ema loos.”