Masik ema Yahudi simu Na'i Maromak mamenon moos, lia nia la sori sia
3
Arumak emi haneo ha'ak, “Kalo nunia, ema Yahudi netan sotir saa? Kalo hamane aan, netan liu nosi ema seluk ka?” 2 Tebes! Ema Yahudi netan sotir wa'in. Dala uluk, sia sotir tan Na'i Maromak boi siakaan bei uluk sia, nebee sia mak nakerek no daka Niakaan Manfatin. 3 Mais arumak emi hanoin ha'ak, ema Yahudi balu la fiar baa Na'i Maromak. Nu'unabee? Na'i Maromak la tuir Niakaan mamenon, tan ema Yahudi balu la fiar baa Nia ka? 4 Lale! Na'i Maromak nanis nala'ok Niakaan mamenon. Masik ema raiklaran hotu-hotu tolek, Na'i Maromak la naktolek! Iha Hakerek Moon noo lia nosi Na'i Maromak na'ak,“Ema balu tula sala na'ak,
Nia nakotu lia la nodi moon.
Mais sia atu naree na'ak,
saa mak Nia dale, Nia nanis nala'ok.
Kalo ema nalo lia no Nia, sia nanis monu,
tan Nia la dale sala.”a
5 Kalo ita ema raiklaran hatudu lisan aat hodi hahalok kale'uk, lia nia nalore baa ema na'ak, Na'i Maromak lisan mak loos. Noo ema balu na'ak, kalo Na'i Maromak kastikar ita, Nia la moon. Sia dale nia tebes ka? Lale! 6 Sia dale nia la kona! Lia makonak mak ne'e: Na'i Maromak moon. Nia kastikar ita, la sala. Tan Nia mak kaer beran atu kastikar ema mak nalo sala iha raiklaran.
7 Arumak emi hanoin ha'ak, “Kalo ha'u kaktolek, ha'u katudu Na'i Maromak mak loos. Tan katudu Niakaan kabaas nunia, Nia sala ti'an kalo nakotu na'ak, ha'u ema mak sala.” 8 Keta hanoin nunia! Tan hanoin nunia tuir ema lian na'ak, “Ita halo aat, nebee di'ak moos mai!” Ema mak dale nunia, nanis kona kastikar. Mais ema balu dale nahaat ha'ukaan naran na'ak, ha'u mak kanorin lia nia.
La noo ema ida mak loos iha Na'i Maromak oin, tan ema hotu-hotu noo sala
9 Nu'unabee? Arumak emi haneo ha'ak, “Ita mak ema Yahudi, ita di'ak liu ema seluk ka?” Keta haneo nunia! Tan ha'u katudu baa emi ti'an ka'ak, ema hotu-hotu monu baa sala. Masik sia, ema Yahudi ka, ema seluk ka, ema hotu-hotu nalo sala. 10 Hakerek Moon na'ak,
“La noo ema mak moris loos.
Ida moos, la noo!
11 La noo ema mak natene tebes lia nosi Na'i Maromak.
La noo ema mak nakara buka Na'i Maromak.
12 Ema hotu-hotu sees ti'an nosi dalan moris mak loos.
Tan lia nia, sia la noo folin ona.
La noo ema mak natudu laran di'ak.
Ida moos, la noo!b
13 Siakaan dalen, nuhar dois,
hanesan rate mak ema ke'e nikar.
Siakaan ibun nakonu no tolek.
Lia fuan nosi siakaan ibun,
hanesan samea rason.c
14 Siakaan ibun nadois ema naran dei,
to'o ema seluk laran moras,
tan lia fuan mak sai nosi siakaan laran dois nia.d
15 Sia la nata'uk no'o ema.
16 Sia baa nabee dei,
sia tokar lauk iha nia,
no nasusar ema iha nia.
17 Sia la natene moris dame malu.
Sia la natene moris nodi neon mamatek.e
18 Sia la bele netu neon,
tan la nata'uk Na'i Maromak.”f
19 Ita hatene ha'ak, Na'i Maromak natuun Ukun-badu Bei Musa baa ema mak musti tuir Ukun-badu nia. Tan lia nia, sia la noo krarain tenik atu naloos aan iha Na'i Maromak oin. Kalo rai falu fila, ema raiklaran hotu-hotu musti nataa baa Na'i Maromak, nebee Nia nakotu na'ak, sia sala ka, sia loos. 20 Etuk, la noo ema ida mak bele na'ak “Ha'u ne'e, ema loos, tan tuir hotu Na'i Maromak Ukun-badu.” Keta nunia! Tan Na'i Maromak Ukun-badu natudu na'ak, ita hotu-hotu hoo sala.g
Ita musti fiar uluk baa Yesus lai, foin Na'i Maromak nafoli ita na'ak ema loos
21 Keta benar tan lia Na'i Maromak dalan atu naloos ema maksalan. Masik ita ema raiklaran hotu-hotu halo sala moos, Nia loke dalan ti'an atu naloos ita. Mais dalan nia, lahoos tan ita halo tuir Ukun-badu. Na'i Maromak Ukun-badu du'uk na'ak nunia. Niakaan mako'an uluk aan sia moos, nakerek nunia. 22 Na'i Maromak naloos ita, surak ita fiar Yesus Kristus. Nia la fihir oin, tan Nia naloos ema hotu-hotu mak fiar Yesus Kristus.h
23 Ita hotu-hotu halo sala. Ita la hatene moris tuir Na'i Maromak hakaran kabaas. 24 Masik nunia moos, Na'i Maromak du'uk natudu laran di'ak nodi nakotu na'ak, ita la hoo sala ona. Nia nafoli ita nunia, tan Yesus Kristus sori nola ita nosi itakaan salan.
25-26 Na'i Maromak boi Yesus dadi baa sera atu selu nola itakaan tate, nodi kasu mohu itakaan salan. Mais ita musti fiar lia nune'e: Yesus simu itakaan kastikar nodi naduar raan to'o mate atu selu nola ita. Uluk, Na'i Maromak netu neon baa ema raiklaran salan, no nakotu atu nalu'a lakon sala nia sia. Mais kalo Nia la kastikar ema raiklaran salan, Nia la moon. Tan nunia, Nia loke dalan nebee ema raiklaran siakaan kastikar tula baa Yesus nodi selu nola sia. Hodi nunia, Na'i Maromak natudu na'ak, Nia nakotu lia nodi moon. Kalo ema ida fiar na'ak, Yesus selu nola nia ti'an, Na'i Maromak nakotu na'ak, ema nia, ema loos.
27 Dadi, nunabee? Tan Na'i Maromak simu emi, arumak emi haneo emi bele dale wa'in ka? La bele! Tan ita la halo sa-saa. Na'i Maromak simu ita, lahoos tan itakaan hahalok. Nia simu ita, tan itakaan fiar.
28 Dale badak dei, Na'i Maromak naloos ema raiklaran, lahoos tan tuir Ukun-badu, mais tan fiar baa Yesus Kristus.
29 Oras ne'e, ha'u atu kusu nune'e: Na'i Maromak simu ema Yahudi dei ka, Nia moos simu ema seluk? Tebes! Nia simu ema hotu-hotu!
30 Na'i Maromak, mesak dei. Nia naloos ema raiklaran hotu-hotu. Masik sia ema Yahudi ka, lahoos Yahudi ka, Nia naloos sia hotu-hotu, surak sia fiar baa Yesus Kristus.i
31 Kalo ita fiar baa Yesus Kristus nunia, ne'e na'ak, ita ho'as lakon Na'i Maromak Ukun-badu ka? Lale! Mais ita hametis tan.