Na'i Maromak nahibu ema Yahudi no ema lahoos Yahudi
2
Emi rona ti'an lia hahalok aat oi-oik ohin nia ka? Arumak emi haneo ha'ak, “Adeei! Ema nia sia aat liu resik!” Mais sintidu, tan emi ida-idak moos aat nunia. Masik o ne'e see, o la moo krarain atu maloos aan. Kalo maneo ma'ak ema seluk fatan kona kastikar, o soe sala baa isin lolon du'uk.a 2 Mais ita musti hatene, kalo Na'i Maromak kastikar ema, Nia nakotu siakaan lia nodi moon. 3 Nu'unabee? Arumak o maneo ma'ak, “Ema mak nalo aat, sia fatan kona Na'i Maromak kastikar.” Tebes. Mais hanoin, tan o moos malo aat hanesan sia. Mais o maneo ma'ak, “Ha'u la kona Na'i Maromak kastikar.” Lia nia, o metan mosi nabee?4 Na'i Maromak natudu nohuun laran di'ak baa o. Nia moos netu neon baa okaan hahalok. Tan saa o titu Nia modi matan sorin dei? Arumak la matene ma'ak, Nia natudu laran di'ak baa o, nebee la'o mela okaan salan, modi fila mikar baa Nia.
5 O ema ulun fatuk! La mo'uk rona! La mo'uk la'o mela okaan salan! Hodi nunia, okaan kastikar hetak todan tenik. Oras rai falu fila, Na'i Maromak atu tetu ema hotu-hotu ida-idak siakaan moris, hotu nakotu siakaan lia nodi moon. Baa oras nia, Nia natuun kastikar todan baa o, tan Nia la simu okaan hahalok nia. 6 O moris nunabee, Na'i Maromak moos selu tuir nunia.b
7 Ema mak nalo di'ak bei-beik, Na'i Maromak foo moris nima-nimak. Sia simu kneter, naran di'ak, no moris to'o nima-nimak. 8 Mais ema mak nalo aat, Na'i Maromak nahibu nodi taa ukun baa sia. Sia naneo loos isin lolon du'uk, no basak lerek lia loos.
9 Ema hotu-hotu mak nalo aat atu kona susar no dinu. Masik sia ema Yahudi ka, lahoos ema Yahudi ka, hotu-hotu kona. 10 Mais ema hotu-hotu mak nalo di'ak atu simu kneter nosi Na'i Maromak to'o moris manek no dame. Masik sia ema Yahudi ka, lahoos ema Yahudi ka, hotu-hotu simu. 11 Tan Na'i Maromak la fihir oin!c
12 Ema lahoos Yahudi la natene Ukun-badu mak Na'i Maromak natuun baa ema Yahudi siakaan bei uluk Musa. Masik nunia moos, kalo sia nalo sala, Na'i Maromak kastikar nodi nabu'a sai sia, tan siakaan salan nia. Mais kalo ema Yahudi mak natene Na'i Maromak Ukun-badu nalo sala, Nia kastikar nodi nabu'a sai sia, tan sia nakur Ukun-badu. 13 Ema mak Na'i Maromak nafoli na'ak, ema loos, lahoos ema mak rona Ukun-badu dei, mais ema mak nala'ok.
14 Masik ema lahoos Yahudi la natene Na'i Maromak Ukun-badu isin, sia moris tuir, tan siakaan neon du'uk dada sia baa saa mak loos. 15 Lia nia natudu na'ak, Na'i Maromak Ukun-badu iha ti'an iha siakaan neon, hanesan kabas lahon mak Na'i Maromak soru iha siakaan neon. Siakaan neon du'uk mak tetu siakaan hahalok. Kalo sia nalo sala, siakaan neon du'uk nasalak sia. Kalo sia nalo loos, siakaan neon du'uk naloos sia. 16 Oras rai falu fila, Na'i Maromak atu foti Yesus Kristus dadi Ema Makotu Lia. Nia atu leno lotu-lotuk lia subar sia mak nakfunin iha ema neon laran. Lia ne'e, Manfatin Di'ak isin mak ha'u keke baa ema.
Masik ema Yahudi sia natene Na'i Maromak Ukun-badu, lia nia la sori sia
17 Emi ema Yahudi sia, nunabee? Emi haksa'ek aan tan emi talin malu ho Na'i Maromak. Emi ibun boot tan kaer Ukun-badu mak Nia natuun baa Bei Musa. 18 Tebes! Emi ema Yahudi hatene Na'i Maromak beer no lia mak di'ak kaliuk sia, tan emikaan ema manorik sia nanorin ti'an Na'i Maromak Ukun-badu baa emi. 19 Tan lia nia, emi fiar du'uk aan ha'ak, emi bele hatudu dalan baa ema mak la'o sala. Emi filak aan nu'u kroman mak naksinak bodik ema mak moris iha makukun laran. 20 Tan emi kaer Ukun-badu nia, emi haneo ha'ak, emi hatene hotu-hotu, no kaer lia loos hotu-hotu! Emi haneo ha'ak, emi bele hanorin ema beik no lawarik oan mak la natene sa-saa.
21 Mais ha'u atu kusu nune'e: Emi hanorin ema seluk. Mais tan saa emi du'uk la tuir hanorin nia?! Emi hariik iha uma hamulak hodi katak ha'ak, “Keta mana'o!” Mais tan saa emi du'uk hana'o?! 22 Emi hanorin ha'ak, “Keta hakur biti-kluni!” Mais tan saa emi du'uk hakur biti-kluni?! Emi hirus tebe-tebes ai'oi lulik sia. Mais tan saa emi du'uk lemas hola buat nosi ai'oi lulik sera fatik?! 23 Emi ibun boot tan kaer Na'i Maromak Ukun-badu. Mais tan saa emi du'uk hakur Ukun-badu nia hodi hamoe Na'i Maromak?! 24 Hakerek Moon na'ak, “Tan emi ema Yahudi halo aat, ema seluk sia nahaat Na'i Maromak naran.”d
Masik ema Yahudi sia namane aan, lia nia moos la sori sia
25 Emi ema Yahudi namane aan tuir Na'i Maromak Ukun-badu. Tebes. Lahan nia dadi tadak na'ak, Na'i Maromak simu emi. Mais kalo emi hakur Na'i Maromak Ukun-badu, Nia la simu emi. Hodi nunia, emi dadi nu'u ema lahoos Yahudi mak la namane aan. 26 Tuir loos, kalo ema mak la namane aan moris loos tuir Na'i Maromak Ukun-badu, Na'i Maromak simu ema nia. Hodi nunia, ema nia dadi nu'u ema Yahudi mak namane aan ti'an! Tebes. 27 Mais sintidu! Kalo ema lahoos Yahudi mak la namane aan moris loos tuir Na'i Maromak Ukun-badu, sia natudu saa? Sia natudu emikaan salan. Tan masik hori uluk emi simu Ukun-badu hodi hamane aan moos, emi hakur Ukun-badu nia.