Paulus iha rai Malta
28
Ami hotu-hotu to'o rai maran ti'an, foin hatene rai maran nia naran Malta. 2 Ema rai nia simu ami di'a-di'ak. Tan udan no anin malirin resik, sia nahoris ha'i boot iha tasi tehen, hotu bolu ami mai haniruk. 3 Oras nia, Paulus nili ai hotu tau baa ha'i. Teki-tekis samea mahoo raso ida sai nosi ai mak Paulus nodi mai nia. Tan la terus ha'i manas, samea nia tata nodi nakri'it baa Paulus liman. 4 Naree nunia, ema Malta sia dale baa malu na'ak, “Nanis ema ne'e, ema haat. Keta arumak nia maho'o ema. Masik nia nakbudi sai nosi maufinu tasi moos, niakaan sotir atu mate. Tan see nalo aat, natiu sotir aat.” 5-6 Ema nia sia naneo na'ak, la kleur ona Paulus liman bubu, hotu nakloti, mate teki-tekis.
Mais Paulus la noran moras. Nia firuk tama samea nia baa ha'i laran. Ema nia sia nein atu naree saa mak atu dadi baa Paulus, mais la noo saa ida. Naree nunia, sia naneo tenik na'ak, “Arumak nia ne'e, ema kukun!”
7 Ema boot ida iha rai nia, naran Publius. Rain no uman la dook nosi nia. Nia mai nasoru ami iha tasi tehen, hotu tene ami mai niakaan uma. Nia naliku ami loron tolu.
8 Baa oras nia, Publius aman moras kiki no sai luan boot la nanawa. Paulus baa naree nia iha ke'an laran. Hotu nia rai liman baa, nodi namulak. Ema nia moos di'ak kedas. 9 Naree Publius aman di'ak ti'an, ema moras seluk sia moos mai nusu tulun baa Paulus. Hotu, nia nadi'ak nola sia. 10a Ema nia sia natudu laran dadomin, to'o loi nodi naha wa'in foo baa ami.
Paulus la'o nela Malta baa Italia
10b-11 Ami hein iha Malta fulan tolu laran, to'o laloran no anin nanawa. Roo ida nosi Aleksandria moos naknamon iha nia to'o laloran no anin nanawa. Roo nia naran, Oa Karuak, tan iha roo oin noo ai'oi lulik karuak.a Hotu ami sa'e roo nia atu baa Roma. Oras ami sa'e, ema Malta sia nodi bakae no naha seluk sia, bodik ami.
12 Hotu ami la'o to'o kota Sirakusa iha rai Sisilia. Ami hanawa iha nia loron tolu laran. 13 Hosi nia, ami la'o halolon tasi tehen Sisilia to'o kota Regium. Baa awan, ami lai-lais la'o, tan anin lorokbelan maka'as basuk. Baa wainrua, ami to'o kota namon ida, naran Putioli. 14 Iha nia ami tuun, hotu baa buka mamaluk mak fiar sia. Hasoru ti'an, sia tene ami atu hein ho sia. Ami moos hein ho sia domiku ida. Hotu ami la'o rai baa kota Roma. 15 Oras mamaluk sia iha Roma rona ami atu baa nebaa, sia mai saka ami iha dalan klaran. Balu toma ami iha leo Apius; balu seluk toma ami iha fatin uma seba tolu.b Naree nola sia, Paulus moos neon biit nodi sera dodan baa Na'i Maromak.
Paulus iha Roma
16 To'o Roma ti'an, [sondadu sia natama ema bui sia baa bui laran].c Mais sia la natama Paulus. Sia namamar nia atu seba uma. Nia nein iha uma nia no sondadu ida, mak daka nia bei-beik. Ema kesi namutuk sondadu nia liman no Paulus liman nodi besi talik.d
17 Loron tolu liu ti'an, Paulus naruka ema namata nola fukun Yahudi sia iha Roma nia, nebee mai nasoru nia. Sia namutuk ti'an, nia nahuu nalore na'ak, “Mamaluk sia hotu-hotu! Ha'u kmai iha ne'e, tan ema Yahudi sia kohi ha'u iha Yerusalem. Hotu sia latan ha'u baa ukunrai Roma, mais ha'u la koo sala! Ha'u la ksakar itakaan ema du'uk. Ha'u moos la sakar itakaan adat hosi itakaan bei uluk sia. 18 Ukunrai leno ha'ukaan lia iha nebaa ti'an, mais la netan ha'ukaan salan mak kona baa ukun mate. Tan nunia, sia nakotu nabusik ha'u. 19 Mais ulun Yahudi sia sakar ukunrai kakotun nia. Tan baa nia, ha'u kasa'e luku ha'ukaan lia ne'e mai huun. Tuir loos, ha'u la kakara kalo lia ko ha'ukaan ema du'uk.e 20 Tan lia nia, ha'u klibur kola emi iha ne'e. Nebee ita bele dale ho malu hosi lia mak ita ema Yahudi ho'i hein. Tan ita hotu-hotu hein Na'in ida mak Na'i Maromak nameno atu solok mai, sori ita. Lia nia mak nalo ema to'o kesi ha'u nodi besi talik ne'e.”
21 Rona nola nunia, ema Yahudi sia nataa na'ak, “Mau! To'o oras ne'e, ami sedauk hetan hakerek ida nosi Yudea mak katak mau lian ne'e. Mamaluk sia mak mai nosi nebaa, moos la dale nosi lia ne'e. 22 Mais ami hakara rona du'uk saa mak mau fiar. Ami rona ti'an ema sakar hanorin foun iha fatin hotu-hotu. Mais hanorin nia isin nunabee, ami la hatene dauk. Tan nunia, ami husu nebee mau katak hanorin nia isin baa ami lai.”
23 Hotu sia nola leet atu nasoru malu tenik. Loron nia to'o ti'an, ema wa'in libur malu iha Paulus uman. Hotu Paulus nahuu katak oin nunabee ema bele dadi baa Na'i Maromak eman. Nia nanorin nosi Bei Musa no Maromak mako'an seluk siakaan hakerek, nebee sia fiar na'ak Yesus nia, ema mak Na'i Maromak nameno hori uluk atu solok mai. Nia nanorin hori seisawan to'o loraik.
24 Rona Paulus dale nunia, balu fiar, balu lale. 25 Sia toe malu, to'o balu atu la'o nela fatin nia. Mais Paulus dale na'ak, “Emi toe malu nune'e, tuir saa mak Kmalar Lulik katak kedan hori uluk baa Bei Yesaya 26 na'ak,
‘O baa katak baa klubun Yahudi nia ma'ak,
“Emi rona bei-beik Ha'ukaan dalen,
mais emi la kohi kokon.
Emi titu-haree bei-beik lia saa mak Ha'u kalo,
mais emi la mana kokon.”
27 O musti dale baa sia nunia, tan siakaan neon nakfatuk.
Sia nadiuk tilun.
Sia nadelek matan.
Mais so'in! Habusik siakaan tilun lalika rona tenik ona.
Habusik siakaan matan lalika naree tenik ona.
Habusik siakaan neon lalika nakloke tenik ona.
To'o sia la natene dalan mai nikar baa Ha'u ona.
Hodi nunia, Ha'u la kadi'ak tenik sia ona.’”f
28 Hotu Paulus taka dalen na'ak, “Mamaluk sia! Kalo emi la hakara simu Na'i Maromak laran di'ak, loos emi dei. Mais emi musti hatene, Na'i Maromak moos nakara sori ema lahoos klubun Yahudi sia. Sia mak atu rona baa Nia.” 29 [Paulus dale nunia ti'an, ema nia sia moos fila. Mais sia la kona malu.]g
30 Nunia hotu, Paulus nein iha uma seba nia to'o tinan rua. Nia simu di'a-di'ak ema hotu-hotu mak mai nasoru nia.
31 Hodi nunia, Paulus netan leet atu nanorin oin nunabee ema bele dadi Na'i Maromak eman. Nia moos la natauk nanorin nosi lia Na'i Yesus dalan moris, na'ak Yesus nia, mak Kristus. La noo ema ida mak saseni nia.
Ama Teofilus mak di'ak. Ha'ukaan hakerek narohan baa ne'e.
Lukas