Ema Yahudi sia mai nalo lia no Paulus iha Kaisarea
24
Loron lima liu ti'an, foin ema Yahudi sia mai to'o kota Kaisarea atu nalo lia no Paulus. Nosi sia, noo na'ilulik ulun boot naran Ananias no ulun seluk sia. Sia moos nodi ema ida naran Tertulus. Nia ema matenek dale, mak sia nalo baa ibun-nanaan sakar Paulus. 2-3 Ema hotu-hotu naklibur iha moon-metan ti'an, gubernur naruka sondadu natama Paulus. Hotu Tertulus nariik, nahuu dale nahonu Paulus. Nia foo tabe baa gubernur na'ak,“Ama gubernur, mak ha'u kakneter! Kleur ti'an, ita boot kaer ukun di'a-di'ak iha ne'e. Ita boot hatene saa mak di'ak bodik renu. Ita boot moos babilan lia wa'in, to'o ami ema Yahudi bele moris manek no dame. Tan nunia, ami hodi leet ne'e sera dodan baa ama gubernur. La noo ema ida nu'u ita boot mak bele halo lia di'ak wa'in nune'e. 4 Mais ha'u lalika dale wa'in ona. Ha'u kdale malorek baa lia isin dei. Ha'u kusu ita boot bele rona di'a-di'ak saa mak ha'u atu katak nosi lia Paulus ne'e.
5 Nune'e, ama boot. Tuir ami ema Yahudi, Paulus ne'e hanesan moras malaik mak lori nosi fatin ida baa fatin ida. Nia sakar amikaan ukun-badu, no tokar lauk amikaan ema Yahudi iha fatin hotu-hotu. Nia ne'e, ulun nosi partee ema Nasaret, mak ami temi ‘partee Nasarani’. Ami la simu siakaan hanorin. 6 Ami moos kohi nia ti'an, tan nia atu nadoor amikaan Uma Hamulak Huun. [Ami hakara taa ukun baa nia hodi amikaan ukun du'uk. 7 Mais sondadu ulun boot Lisias mai nadau nola nia. 8 Hotu nia naruka na'ak, kalo ema nakara nalo lia no Paulus, sia musti mai nasoru ama gubernur iha Kaisarea ne'e. Nia nakara nebee ita boot du'uk mak leno lia ne'e.]a Tan nunia, ami mai iha ne'e nebee ita boot bele hakotu saa mak ami dale ne'e, loos ka lale.
Nunia dei, ama boot.”
9 Tertulus dale hotu nunia, ema Yahudi seluk sia moos tane tu'an niakaan lia fuan na'ak, “Nunia tebes, ama!”
Paulus naloos aan iha Gubernur Feliks oin
10 Tertulus dale hotu ti'an, gubernur naruka Paulus na'ak, “Oras ne'e, ha'u kfoo leet baa o maloos aan.”
Hotu Paulus nariik, dale na'ak, “Ama gubernur! Kleur ti'an ita boot kaer ukun iha rai ne'e. Tan nunia, ita boot du'uk hatene tebes ami ema Yahudi tuur-hariik. Dadi, ha'u la kata'uk kaloos aan iha ita boot oin. 11 Loron sanulu resin rua mak foin liu ne'e, ha'u kbaa kamulak iha Uma Hamulak Huun iha Yerusalem. Ita boot bele husu du'uk baa ema mak tuir hamulak baa oras nia. 12 Ha'u la isin ida dauk toe ko ema iha Uma Hamulak Huun. Iha uma hamulak seluk no fatin seluk sia iha Yerusalem moos, ha'u la tokar lauk ema.
13 Oras ne'e, ema ne'e sia beer nahonu ha'u. Mais siakaan dalen ohin nia, la noo lia kakaer. 14 Nune'e, ama gubernur. Ha'u atu kalore lia ida. Ha'u ne'e, tuir partee foun ida naran, ‘Yesus Dalan Moris.’ Uluk ha'ukaan bei sia namulak baa Maromak. Oras ne'e, ha'u moos sei kamulak baa Maromak nia. Ha'u moos fiar Bei Musa Ukun-badu no lia hotu-hotu mak Maromak mako'an uluk sia nakerek nela ti'an bodik ami. 15 Ha'u kaloon baa Na'i Maromak manesak nu'u ema ne'e sia mak mai sakar ha'u. Ha'u ko sia fiar bele-bele ha'ak baa oras rai falu fila, Na'i Maromak atu nalo ema mak mate moris nikar. Masik ema di'ak ka ema aat, Nia nalo moris nikar. 16 Tan nunia, ha'u karui aan bei-beik atu moris loos iha Na'i Maromak oin no iha ema raiklaran oin. Hodi nunia, ha'u kbele katene malorek ha'u la koo sala.
17 Ha'u kserwisu tinan hira iha rai seluk, foin da-dauk ne'e, ha'u kfila kikar baa Yerusalem. Ha'u kmai kodi osan mak ema libur nola bodik amikaan ema susar. Ha'u moos mai atu kamulak iha Uma Hamulak Huun kodi katetu sera baa Na'i Maromak. 18 Oras ha'u kala'o adat hamoos aan iha Uma Hamulak Huun, noo ema mak naree ha'u. Mais ha'u la kodi ema wa'in. Ha'u moos la tokar lauk.b 19 Baa oras nia, ema Yahudi na'in hira nosi rai Asia dei mak namulak iha nia. Tuir loos, kalo ema nakara nalo lia no ha'u, ema Asia nia sia mak nalo, tan sia mak naree ha'u. Lahoos ema ne'e sia! 20 Mais sia la mai. Dadi, ita boot husu kokon baa ema mak sakar ha'u ne'e sia, ha'u sala saa? Hori hirak nia sia leno ha'ukaan lia iha moon-metan, sia la netan sala. Ita boot husu baa dei! 21 Mais arumak no lia ida mak nalo sia krakat ha'u. Ne'e mak, oras ha'u kdale maka'as iha siakaan oin ka'ak, ‘Emi hakara taa ukun baa ha'u, tan ha'u kfiar Na'i Maromak bele nalo ema mak mate moris nikar!’”c
22 Paulus dale nunia, mais gubernur Feliks natene wa'in ti'an lia nosi ‘Yesus Dalan Moris.’ Hotu nia taka moon-metan nia na'ak, “Nune'e! Ha'u kmusti bolu sondadu ulun boot Lisias nebee krona nosi nia lai, foin ha'u kbele kakotu lia ne'e.” 23 Hotu gubernur naruka sondadu ulun ida nodi nikar Paulus. Mais gubernur naruka sondadu sia foo leet nebee Paulus niakaan mamaluk sia bele mai naliku nia.
Paulus dale baa Gubernur Feliks no feen Drusila
24 Gubernur Feliks feen ema Yahudi, naran Drusila. Sia rua nakara dale mesan no Paulus. Loron hira liu ti'an, gubernur naruka ema nodi Paulus mai baa sia. Hotu Paulus nalore baa sia oin nunabee ema bele fiar baa Yesus Kristus. 25 Nia moos nalore dalan nebee ema bele moris loos no dalan nebee ema bele daka aan keta monu baa sala. Nia moos nalore nosi lia Na'i Maromak tetu ema hotu-hotu moris dalan oras rai falu fila.
Rona nola nunia, gubernur Feliks moos nata'uk tebes. Hotu nia dale baa Paulus na'ak, “Paulus! To'o ona. Leet seluk, foin ha'u kbolu kikar o.” 26 Tuir loos, gubernur Feliks nakara Paulus selu osan baa nia, nebee nabusik Paulus. Tan baa nia, nia bolu Paulus mai bei-beik atu dale no nia.
27 Gubernur Feliks moos nakara nola na'ilulik ulun sia neon. Tan nunia, nia la nakotu lai-lais lia ne'e. Tinan rua liu ti'an, ema foti gubernur foun naran Porkius Festus atu seluk nia iha rai nia. Baa oras foti gubernur foun, sia sei neti natoos Paulus.