Paulus natene malu no Priskila no Akila iha kota Korintus
18
1-3 Baa oras nia, na'i fohorai Roma naran Klaudius. Nia krakat no ema Yahudi mak nein iha kota Roma iha rai Italia, to'o nia nalatu sai sia. Hotu sia nalai keen karin malu baa fatin hotu-hotu. Nosi ema Yahudi nia sia, noo ema ida naran Akila no feen naran Priskila. Sia rua tuir nalai sai nosi rai Italia, baa kota ida naran Korintus. Akila huun nosi rai Pontus. Nia serwisu nalo batane nosi kulit.Baa oras nia, Paulus moos la'o nela kota Atena, baa kota Korintus. Iha nia, nia nasoru Akila no Priskila, tan nia moos serwisu nalo batane nosi kulit. Sia nein namutuk, serwisu namutuk.
4 To'o ema Yahudi loron boot, Paulus tama baa siakaan uma hamulak. Nia namaus ema Yahudi no ema seluk sia, nebee fiar baa Yesus.
5 Oras Silas no Timotius mai ti'an nosi rai Makedonia, Paulus nanawa serwisu kulit. Sura loron nia serwisu maka'as nodi nanorin ema Yahudi na'ak, “Kristus mak Na'i Maromak nameno atu solok mai, mak ita hotu-hotu hein hori uluk, Nia mai ti'an. Nia mak Yesus!”
6 Rona Paulus dale nunia, ema Yahudi hira sakar bei-beik nia no dale naraik nia. Paulus moos nakbaas ahukresan nosi niakaan tais, nalo baa tadak na'ak nia la no'uk ulun kalanuk tenik no sia ona, tan sia la no'uk simu nia. Nia katak na'ak, “Emi ne'e liu resik! Emi hodi neon no laran hadiuk aan. Mais so'in! Emi mak hatiu emikaan salan du'uk. Ha'u la kataa bodik emi ona. Nahuu oras ne'e, ha'u la koo lia ko emi ema Yahudi ona. Ha'u atu kbaa klubun seluk, kanorin ema mak lahoos Yahudi.”
7 Dale hotu nunia, Paulus sai nela ema Yahudi nia sia. Iha uma hamulak nia sorin, noo uma ida. Uma na'in, naran Titius Yustus. Nia lahoos ema Yahudi, mais nia beer Na'i Maromak. Oras Paulus sai, nia tama baa Titius uman.
8 Uma hamulak ulun iha kota nia naran Krispus. La kleur, Krispus moos fiar baa Na'i Yesus. Niakaan ema uma laran tomak moos fiar, namutuk no ema Korintus seluk sia mak rona Paulus ti'an. Paulus moos sarani sia hotu-hotu.
9 Baa kalan ida, Paulus nu'u me'i. Nia rona Na'i Maromak dale baa nia na'ak,“Paulus! Lalika mata'uk no neon todan baa serwisu ne'e, tan okaan serwisu la mohu dauk. O musti manorin bei-beik Ha'ukaan Manfatin baa ema ne'e sia. 10 Manoin! O la serwisu mesan, tan Ha'u kamalu o. Masik ema nasusar o moos, Ha'u kariik metin ko o. Ha'u moos ta'an matan baa o kalan no loron. Keta malu'a iha kota ne'e, noo Ha'ukaan ema wa'in.”
11 Rona nola nunia, Paulus nein to'o kleur iha kota Korintus. Nia nanorin Maromak Manfatin iha nia, to'o tinan ida no balun.
12 Oras nia, ukunrai Roma foti gubernur foun iha rai Akaya, naran Galio.a Haree nunia, ema Yahudi sia ko'a kabuar lia fuan atu dada nodi Paulus baa gubernur iha moon-metan. 13 Sia duu baa Paulus iha gubernur oin na'ak, “Ema ne'e namaus nola ema wa'in ti'an, nebee tuir hanorin foun. Mais hanorin nia, hanorin kale'uk.”
14 Rona nola nunia, Paulus atu naloos aan, mais gubernur tesi kedan niakaan dale nodi de'an ema nia sia na'ak, “Hei! Emi ema Yahudi! Rona! Kalo emi hakara hodi lia halo aat, lale, lia ho'o ema, ha'u kbele krona. 15 Mais lia mak emi hodi ne'e, emikaan lia uma laran! Emi toe malu tan emikaan ukun-badu, emikaan lia fuan no emikaan naran du'uk! Ukunrai iha ne'e, la leno lia oin nunia!”
16 Hotu gubernur te'ur sai sia nosi moon-metan nia. 17 Mais ema lear iha nia kohi nola ema ida naran Sostenes. Nia uma hamulak Yahudi ulun. Sia dada nodi nia baa, tuku lisuk nia iha gubernur oin. Mais gubernur la titu kois.
Nosi Korintus, Paulus baa nikar kota Antiokia iha rai Siria
18-19 Nunia hotu, Paulus nein tenik iha kota Korintus. Mais la kleur, nia moos tami baa mamaluk sia iha nia atu la'o. Hotu nia no Priskila no Akila baa kota ida naran Kengkrea atu nein roo tasi. Oras nia, Paulus koi molik ulun dadi tadak na'ak, saa mak uluk nia nameno baa Na'i Maromak atu nala'ok, oras ne'e nala'ok mohu ti'an.b Hotu sia sa'e roo baa kota Efesus. To'o baa, sia tuun. Paulus moos la'o nela Priskila no Akila iha nia. Hotu Paulus tama baa ema Yahudi siakaan uma hamulak. Iha nia, nia taruka lia fuan no sia. 20 Dale no malu nunia, sia moos nusu Paulus nein kleur oda tenik no sia. Mais nia la simu. 21 Nia tami luku na'ak, “Mamaluk sia, keta neon ki'ik! Kalo Na'i Maromak nakara, ha'u kmai karee kikar emi.” Hotu nia sa'e roo, la'o nela Efesus.c
22 To'o kota Kaisarea, nia moos tuun. Hotu nia liu baa Yerusalem, foo tabe baa Yesus eman sia iha nia. Hotu nia fila nikar baa kota Antiokia. 23 Nia nein iha nia kleur oda, hotu nia baa la'o nasirin rai Galatia no rai Frigia. Iha nebaa, nia nakbiit Yesus eman sia neon.
Apolos baa kota Efesus no kota Korintus
24 Baa oras Priskila no Akila iha Efesus, ema Yahudi ida mai iha nia. Ema nia naran Apolos. Nia nosi kota Aleksandria iha rai Mesir. Nia, ema matenek dale. Nia moos natene Hakerek Moon isin. 25 Nia rona lia nosi Yesus ti'an, hotu nia dale natutan tenik bodik ema seluk. Nia dale knakas basuk. Mais nia sei dauk natene mohu lia hotu-hotu nosi Yesus. Nia natene loos na'ak, Yohanis sarani ema mak la'o nela siakaan salan. 26 Baa dala ida, Apolos nanorin iha uma hamulak Yahudi iha kota Efesus. Priskila no Akila moos tuir rona. Hamulak hotu, sia tene nia baa siakaan uma. To'o uma, sia nalore lotu-lotuk baa nia oin nunabee Na'i Maromak loke dalan atu sori ema.
27 Nunia hotu, Apolos nakotu atu baa rai Akaya. Mamaluk sarani iha kota Efesus moos nakara nunia. Sia nalo hakerek bodik mamaluk sia iha Akaya, nodi nusu nebee sia simu Apolos di'a-di'ak. Kaer nola hakerek nia, Apolos moos la'o. To'o Akaya, nia tulun tebe-tebes mamaluk mak tuir Yesus iha nia. 28 Nia moos taruka lia fuan no ema Yahudi sia iha ema lear oin. Nia dale knakas to'o ema la bele dale sa-saa. Nia nanorin nodi Hakerek Moon na'ak, “Kristus mak Na'i Maromak nameno kedan hori uluk atu solok mai, mak ita hein kleur ti'an nia, Ema nia mak Yesus!”