2 To'o fatik mak noo uma hamulak, sura loron boot Paulus tama namulak iha nia. Nunia moos iha Tesalonika. Paulus tama uma hamulak, hotu taruka lia fuan no ema nosi lia Hakerek Moon. Nia tuir namulak no sia nunia, sura loron boot to'o domiku tolu tuir malu. 3 Nia nalore na'ak, “Kalo ita leno di'a-di'ak Hakerek Moon nosi lia Ema mak Na'i Maromak nameno atu solok mai, ita bele hatene ha'ak nia atu netan susar wa'in to'o mate. Mais Na'i Maromak nodi Niakaan beran, nalo Nia moris nikar. Rona! Oras ne'e ita hatene ti'an ha'ak, Ema mak Na'i Maromak nameno nia, mak Yesus!”

4 Rona nola nunia, ema wa'in moos fiar, hotu tuir Paulus sia. Sia, balu ema Yahudi, balu ema Yunani mak beer Na'i Maromak, no balu ferik boot na'in hira nosi kota nia.

5 Mais ema boot Yahudi balu iha kota nia hirus no laran moras. Oras ema lear naklibur ti'an, sia sasuku ema labuk teen sia atu tokar lauk. Sia buka Paulus no Silas, nebee dada nodi baa ema lear mak nakrakat aan. Hotu sia nababu ema ida naran Yason uman, tan Paulus no Silas nein iha nia. 6-7 Mais sia la netan Paulus no Silas. Tan baa nia, sia dada nodi Yason no ema makfiar seluk na'in hira, baa hakotu lia fatin. Sia duu baa sia na'ak, “Oras ne'e, ema mai iha itakaan kota. Sia baa nabee dei, sia tokar lauk. Yason ne'e, mak simu sia iha niakaan uma. Sia mai sobu itakaan ukun, seluk nodi siakaan ukun. Sia sakar itakaan rai Roma ukun hotu-hotu, tan sia la simu itakaan Na'i rai Roma. Sia simu loos siakaan Na'in ida, naran Yesus!”

8 Rona nola nunia, ema boot sia no ema lear nia nahuu benar. 9 Hotu ema boot sia naruka Yason sia selu osan kakaer, nebee dadi tadak na'ak sia la tokar lauk ona. Selu hotu ti'an, sia moos nabusik Yason sia.

10 Baa kalan nia, mamaluk sarani mak iha kota Tesalonika naneo na'ak, di'ak liu solok Paulus no Silas baa fatin seluk. Hotu sia solok sia rua baa kota ida naran Berea. To'o nebaa, Paulus no Silas tama baa uma hamulak Yahudi. 11 Sia naree ema Yahudi iha kota Berea seluk nosi ema Yahudi iha kota Tesalonika. Ema Yahudi iha kota Berea beer rona lia nosi Yesus. Sura loron sia leno Hakerek Moon to'o lotu-lotuk atu nodi natene Paulus dalen nia tebes ka lale. 12 Tan baa nia, ema Yahudi wa'in fiar baa Yesus iha kota nia. Ferik boot Yunani na'in hira, no mane Yunani wa'in moos fiar.

13 Mais baa oras ema Yahudi sia iha kota Tesalonika rona na'ak, Paulus no Silas nanorin Maromak Manfatin iha Berea, sia tuir mai. To'o ti'an, sia sasuku ema atu tokar lauk tenik iha nia. 14 Haree nunia, mamaluk sia iha Berea solok kedan Paulus baa tasi tehen. Mais Timotius no Silas sei iha Berea. 15 Mamaluk sia no nela Paulus to'o kota boot ida naran Atena, hotu sia fila. Mais sia nodi lia mamenon nosi Paulus, nebee Silas no Timotius mai lai-lais namutuk no nia iha kota Atena.

16 Oras Paulus sei nein Silas no Timotius mai kota Atena, nia neon susar tan nia naree noo taroman wa'in iha kota nia.

17 Iha kota nia moos, noo ema Yahudi no ema lahoos Yahudi na'in hira mak namulak baa Na'i Maromak. Paulus tama baa siakaan uma hamulak, hotu taruka lia fuan no sia. Sura loron nia moos taruka lia fuan no ema iha dalan-dalan. 18 Nia moos taruka lia fuan no ema matenek iha kota nia mak tuir hanorin nosi Epikuros no hanorin nosi Stoa.^a Mais baa oras Paulus dale nosi lia Yesus na'ak, Yesus moris nikar nosi mate ti'an, ema sia nakmulis ibun nodi katak na'ak, “Keta nia bula arumak!” Balu moos naleuk na'ak, “Keta arumak ema ne'e atu nalo ita lo'u-sudur baa kukun seluk sia!”

19-21 Kalo ema Atena no ema seluk mak nein iha kota nia netan hanorin foun, siakaan ema matenek nanis tuur namutuk taruka lia fuan naru-naruk iha foho ki'ik ida naran Areopagus. Loron ida, ema nodi Paulus baa nebaa, hotu sia nusu na'ak, “Ama Boot halore kokon hanorin foun nia baa ami, tan hanorin foun nia nabenar ami oda. Ami husu ama halore tu'an tenik, nebee ami bele hatene.”

22-23 Rona nola nunia, Paulus nariik hotu katak na'ak, “Ema Atena sia! Ha'u kasiri emikaan kota ne'e ti'an, kodi karee emi madinas lo'u-sudur. Ha'u karee emikaan taroman noo iha fatin hotu-hotu! Ha'u moos karee taroman ida mak noo hakerek na'ak, taroman ne'e ‘bodik kukun mak ami la hatene.’ Ne'e na'ak, masik emi sei la hatene dauk moos, emi lo'u-sudur ti'an baa Na'i Maromak. Nia ne'e, mak ha'u ko'i kalore baa emi.

24 Nia mak nase'i lale'an no raiklaran no sasoin hotu-hotu. Hotu-hotu iha lale'an no raiklaran nana'i baa Nia. Nia la nein iha uma sera mak ema raiklaran nalo. 25 Nia la naloon baa ema raiklaran, tan Nia mak moris huun. Nia mak foo hotu-hotu.^b 26 Nia mak nase'i ema klubun hotu-hotu iha raiklaran tomak. Nia mak fa'e rai foo baa ida-idak. Nia moos mak nahulin hutun ida-idak moris sa'e-tuun, tuir niakaan oras.

27 Nia nalo nunia, tan Nia nakara nebee ita ema raiklaran buka Nia to'o ita hasoru Nia. Mais tuir loos, Nia la dook nosi ita. 28 Dala ida, ema dale na'ak,

Emikaan ema matenek kananuk moos dale ti'an na'ak,

29 Tebes! Ita hotu-hotu ne'e, Na'i Maromak husar-binan. Keta haneo Nia manesak no ai'oi lulik mak ema nalo nosi mean, lale, mutin, lale, fatuk, tuir siakaan beer. 30 Uluk, ema sei la natene lia nia. Kalo ema lo'u-sudur baa ai'oi lulik nunia, Na'i Maromak nabusik sia moris nunia dei. Mais oras ne'e, Nia la no'uk ona. Nia naruka ita la'o hela ai'oi lulik sia, hotu tuir Nia. 31 Nia nahulin kedan leet ida atu kastikar ema raiklaran tomak, tan siakaan salan. Nia moos natudu kedan Ema ida dadi Niakaan Ema Makotu Lia. Ema nia atu nakotu lia nodi moon. Oras ne'e, malorek ti'an Ema Makotu Lia nia, see ida. Nia, Ema mak mate ti'an, mais Na'i Maromak nalo Nia moris nikar.”

32 Baa oras ema nia sia rona Paulus dale nosi lia ema moris nikar nosi mate, sia moos nanasa. Mais ema na'in hira rona di'a-di'ak. Sia katak baa Paulus na'ak, “Ami hakara rona ama dale tenik. Mais loron seluk dei ona.” 33 Nunia hotu, Paulus la'o nela fatin nia. 34 Mais ema balu namutuk no nia, tan fiar baa Yesus ti'an. Nosi sia, noo makotu lia ida nosi Areopagus, naran Dionisius. Noo feto ida, naran Damaris. No ema na'in hira tenik mak tuir namutuk no sia.