2 Nia nusu baa sia na'ak, “Mamaluk sia! Hori hirak nia, oras emi hahuu fiar baa Yesus, emi moos simu ti'an Maromak Kmalar Lulik ka lale?”

Sia nataa na'ak, “Lale! Ami la hatene noo Maromak Kmalar nunia.”

3 Paulus moos nusu tenik na'ak, “Kalo nunia, sia sarani emi nodi sarani nabee?”

Sia nataa na'ak, “Sia sarani ami tuir Yohanis dei.”

4 Paulus nataa na'ak, “Yohanis sarani ema atu nalo tadak na'ak, sia soe lakon sala ti'an. Mais hanoin! Sura loron nia du'uk nanorin ema Isra'el na'ak musti fiar baa Yesus, tan Nia mak Na'i Maromak nameno hori uluk atu solok mai.”^a

5 Rona nola nunia, sia nusu Paulus sarani sia, nebee sia tama dadi baa Na'i Yesus eman. 6 Oras Paulus namulak nodi rai liman baa siakaan ulun, Maromak Kmalar Lulik moos tuun baa sia. Sia nahuu dale lia oi-oik mak sia du'uk la natene. Na'i Maromak moos babilan sia katak kedan lia saa mak atu dadi. 7 Sia hotu-hotu, ema na'in sanulu resin rua.

8 Oras Paulus iha kota Efesus, nia tama baa ema Yahudi siakaan uma hamulak, nodi nanorin malorek Na'i Maromak dalan moris. Nia nanorin nunia, fulan tolu laran. 9 Mais ema na'in hira neon monas sakar nia no la simu hanorin nia. Sia sasuku ema, nebee keta tuir Yesus dalan moris. Tan baa nia, Paulus no Yesus eman sia nakiduk nela uma hamulak nia, baa namutuk iha uma sakola ida. Uma sakola na'in nia, naran Tiranus. 10 Paulus nanorin iha nia tinan rua laran, to'o ema hotu-hotu iha rai Asia tomak, rona Na'i Yesus Manfatin. Ema nia sia, balu ema Yahudi, balu ema seluk.

11 Baa oras nia, Na'i Maromak natuun beran baa Paulus, nebee nia nalo lia kasalak basuk mak maka'as tebe-tebes. 12 Hahalok nia sia nudaar, ema nola heik Paulus ulu hetin, lale, Paulus niakaan bolas, tau baa ema moras. Hotu, moras lakon kedas. To'o diabu aat sia moos nalai sai.

13-14 Iha nia, noo na'ilulik Yahudi ulun ida, no oan mane na'in hitu. Na'ilulik ulun nia, naran Sakewa. Oan sia baa fatin hotu-hotu atu te'ur sai diabu nosi ema. Sia te'ur kokon diabu nodi Yesus naran na'ak, “O matene Yesus mak Paulus katak nia? Oras ne'e karuka kodi Yesus nia naran, o sai mosi ema ne'e!”

15 Loron ida, oras sia nalo nunia, diabu aat ida nataa fila na'ak, “Ha'u krona Yesus. Ha'u moos krona Paulus. Mais emi ne'e, see?” 16 Hotu ema mak diabu kaer nia, kanarak. Nia tuku nakane sia, no sira nahaat siakaan faru, to'o sia nalai kwalan, sai nosi uma nia.

17 Lia nia nosi ibun baa ibun, keke lema rai iha kota Efesus to'o ema Yahudi no ema lahoos Yahudi hotu-hotu natene mohu. Dale badak dei, se-see mak rona, noran nata'uk. Mais sia moos tonu-naboot Na'i Yesus. 18 Hotu ema mak foin fiar sia mai katak nasai siakaan salan iha ema lear oin. 19 Nosi sia ne'e, noo ema matenek kukun. Sia libur nola siakaan hakerek kukun, hotu sunu mohu. Sura hakerek nia sia folin, osan murak tomak rihun lima nulu.^b

20 Tan Na'i Maromak beran boot nunia, Na'i Yesus Manfatin keke lema fatin hotu-hotu. Niakaan ema moos hetak wa'in.

21 Nunia hotu, Paulus nakotu atu fila baa Yerusalem. Mais nia nakara sei tuli uluk iha rai Makedonia no rai Akaya, foin liu baa Yerusalem. Nia naneo na'ak, “Di'ak liu ha'u kamohu ha'ukaan serwisu iha ne'e lai. Tan, masik nunabee moos, ha'u kmusti to'o kota Roma.” 22 Oras nia, Paulus niakaan mamaluk serwisu na'in rua, mak Timotius no Erastus. Nia naruka sia uluk baa Makedonia. Mais nia du'uk sei nein kleur iha rai Asia.

23 Baa oras nia, ema iha kota Efesus nahuu toe malu nosi lia Yesus dalan moris, to'o lia boot mosu. 24 Lia nia huun nune'e: Iha Efesus nia, noo ema badaen murak na'in ida, naran Demetrius. Niakaan serwisu nalo uma lulik murak oan, bodik ema Efesus lo'u baa siakaan kukun feto naran Artemis. Nodi serwisu nia, osan suli tama baa nia no niakaan ain-liman sia. 25 Loron ida, Demetrius libur nola niakaan ain-liman sia, no badaen seluk sia. Nia sasu'at sia na'ak,“Mamaluk sia! Emi hatene, ita moris di'ak tan osan tama wa'in nosi itakaan serwisu ne'e. 26 Mais oras ne'e, ita du'uk haree hodi matan, rona hodi tilun, oin nunabee Paulus sasu'at ema wa'in na'ak, buat mak ita halo ne'e la noo folin. Nia na'ak, ai'oi lulik mak ita halo ne'e, tolek dei. Lahoos ema kota Efesus mesan mak rona baa nia, mais ema rai Asia tomak rona baa nia. 27 Kalo ema wa'in tuir Paulus bei-beik, ita atu dadi saa tenik? Keta to'o ema la sosa itakaan liman rasan ona, tan sia la titu tenik Artemis ona. Keta to'o ema nosi raiklaran sikun sia la mai tonu-naboot tenik Artemis iha niakaan uma lulik iha ne'e ona.”

28 Rona nola nunia, sia hotu-hotu laran manas. Sia nahii na'ak, “Moris Artemis! Artemis kabaas! Ita ema Efesus tonu-haboot Artemis!” 29 Rona hahii nunia, ema nosi kota nia tomak nalai baa kabuun nola fatin nia. Mais sia benar tan la natene saa mak dadi. Hotu ema nahuu tokar lauk bele-bele tuir dalan, to'o rai luan boot ida. Sia moos kohi nola ema na'in rua, dada nodi baa. Ema rua nia, naran Gayus no Aristarkus. Sia rua mak mai no Paulus nosi Makedonia. 30 Rona nola nunia, Paulus nakara tama baa ema krakat klaran. Mais Yesus eman sia la nabusik nia. 31 Noo ema boot na'in hira nosi rai Asia mak natene di'a-di'ak Paulus. Sia moos naruka ema baa katak Paulus nebee keta tama baa ema krakat klaran.

32 Baa oras nia, ema lear balu nahii na'ak, “Nune'e!” Seluk nahii na'ak, “Nunia!” Mais tuir loos, ema la natene lia nia huun-dikin nunabee. 33 Naree nunia, ema Yahudi sia nata'uk, tan naneo na'ak, keta arumak ema tula baa sia na'ak, sia mak kakehe lia ne'e. Tan baa nia, sia dudu ema ida baa oin, dadi ibun-nanaan bodik sia. Ema nia, naran Aleksander. To'o oin baa, Aleksander foti liman, nakahik ema wa'in nia. Hotu nia dale naloos ema Yahudi sia na'ak, lia nia lahoos ema Yahudi mak nase'i. 34 Mais, baa oras ema lear nia natene nola na'ak Aleksander moos ema Yahudi, sia nahii hetak maka'as na'ak, “Moris Artemis! Artemis kabaas! Ita ema Efesus tonu-haboot Artemis!” Sia nahii bei-beik nunia tuku rua laran.

35-36 Nosi ikus, ema boot ida nosi ukunrai kota Efesus nariik, naruka ema sia no-nook. Hotu nia dale na'ak, “Ema Efesus sia! Ema hotu-hotu natene ti'an, itakaan kukun feto Artemis ilas tuun nosi lale'an baa ita. Tan nunia, ita ema Efesus ne'e, mak haliku nia no niakaan uma lulik. Ema la bele toe ita, tan lia nia dadi baa rai lian ti'an. Ema hotu-hotu natene ti'an. Tan saa emi sei hahii nunia? Masik ema dale tolek tuir siakaan hakara moos, emi lalika krakat nune'e. 37 Emi dada hodi ema rua ne'e mai atu tula sala baa sia. Mais sia la sala! Sia la nana'o sa-saa nosi Artemis uman lulik. Sia moos la dale nadois Artemis naran. Dadi, emi atu tula sala saa baa sia? 38 Hanoin di'a-di'ak! Ita hoo leno lia fatin. Ema maktetu lia moos noo. Kalo Demetrius sia nakara nalo lia, musti tuir ukun nodi lia nia baa leno lia fatin. 39 Kalo sia nakara foti lia seluk, habusik sia baa tetu lia iha fukun adat sia. 40 Keta to'o ukunrai Roma tula sala baa ita, tan lia tokar lauk ne'e. Kalo sia buka lia ne'e huun-dikin, ita atu hataa saa? La noo.” 41 Dale hotu nunia, ema boot nia naruka ema hotu-hotu nakbo'as. Hotu, sia moos nakbo'as.