Fukun sarani sia libur malu iha Yerusalem
15
Baa oras nia, ema Yahudi na'in hira mak fiar baa Yesus ti'an, mai nosi rai Yudea baa kota Antiokia. To'o baa, sia nanorin Yesus eman mak lahoos Yahudi na'ak, “Emi fiar baa Yesus ti'an. Di'ak. Mais sei la to'o dauk. Kalo emi hakara hetan moris, emi musti hamane aan tuir adat mak ami ema Yahudi simu hosi amikaan Bei Musa.”a2 Mais Paulus no Barnabas la simu lia nia. Sia sakar maka'as na'ak, “Keta! Yesus eman mak lahoos Yahudi lalika tuir adat Yahudi.” Rona Paulus dale nunia, ema sarani sia naree sia la kona malu. Hotu sia ko'a kabuar lia atu solok lia nia baa Yerusalem. Sia solok Paulus no Barnabas no mamaluk na'in hira seluk nodi lia nia baa Kristus klosan sia no fukun sarani seluk sia iha Yerusalem.
3 Hotu, sia la'o baa rai Fenisia no rai Samaria. Iha dalan sia tuli iha Yesus eman siakaan uma nodi katak na'ak, “Ema lahoos Yahudi moos fiar ti'an baa Yesus.” Rona nola nunia, ema nia sia moos neon di'ak.
4 To'o Yerusalem baa, Kristus klosan sia, no fukun sarani seluk sia no ema sarani hotu-hotu simu sia di'a-di'ak. Hotu Paulus no Barnabas dale lia hotu-hotu mak Na'i Maromak nalo ti'an bodik sia, to'o ema wa'in mak lahoos Yahudi moos tuir Yesus. Sia moos katak na'ak ema iha kota Antiokia solok sia mai, tan lia hamane aan. 5 Baa oras Paulus no Barnabas dale nunia, ema sarani na'in hira nosi partee Farisi moos tuir rona. Oras rona lia hamane aan, sia nariik, dale maka'as na'ak, “Rona di'a-di'ak! Kalo ema lahoos Yahudi nakara tuir Yesus, sia musti tuir adat hamane aan no ukun seluk hotu-hotu mak ita ema Yahudi simu hosi itakaan Bei Musa.”
6 Rona nola nunia, ema sarani sia hotu-hotu nusu nebee Kristus klosan sia no fukun sarani seluk sia, libur malu atu leno lia hamane aan nia. 7 Sia sei dale naru-naruk, Petrus nariik hotu katak na'ak, “Mamaluk sia! Emi hatene ti'an ha'ak Na'i Maromak boi ha'u nosi emi, nebee ha'u kbaa katak Lia Di'ak baa ema mak lahoos Yahudi, tan Nia nakara nebee sia moos fiar baa Yesus.b 8 Nia natene ema ida-idak neon. Nia moos foo Niakaan Kmalar Lulik baa ema lahoos Yahudi, manesak nu'u Nia foo baa ita. Tan nunia, ita hatene Nia moos simu sia.c 9 Nia la nafoli sia seluk nosi ita. Kalo ema lahoos Yahudi fiar baa Yesus, Yesus nanis namoos siakaan neon, hanesan Nia namoos itakaan neon. 10-11 Tan lia nia, ita hatene ha'ak, Na'i Maromak simu sia ti'an. Lalika tula hatodan sia hodi adat hamane aan. Tan tuir loos, ita ho itakaan bei uluk sia la bele hatiu itakaan adat no ukun hotu-hotu. Ita keta hatodan ema lahoos Yahudi sia! Ha'u atu kusu emi nune'e: Na'i Maromak sori ita ema Yahudi tan ita tuir itakaan ukun-badu ka? Lale! Nia sori ita tan Na'i Yesus natudu laran di'ak baa ita. Keta halu'a! Nia moos natudu laran di'ak baa ema lahoos Yahudi sia.”
12 Rona nola nunia, sia la bele dale sa-saa.
Hotu Paulus no Barnabas dale tenik lia oin nunabee Na'i Maromak babilan sia atu nala'ok Niakaan serwisu. Sia katak nosi tadak blaar mak Na'i Maromak natudu iha ema lahoos Yahudi oin. 13 Dale notu nunia, ema boot ida naran Yakobus nariik, katak na'ak, “Mamaluk sia! Hanono ha'u lai! 14 Mau Petrusd foin katak baa ita na'ak, Na'i Maromak nakara nebee ema lahoos Yahudi dadi baa Niakaan eman. 15 Lia nia tuir saa mak Maromak mako'an sia nakerek kedan hori uluk na'ak,
16 ‘Kona baa niakaan oras, Ha'u kmai kikar.
Tan Ha'u atu kariik kikar Na'i Daud renun.
Niakaan husar-binan dodok welon ti'an,
mais Ha'u atu kariik kikar kodi kakbiit tenik.
17-18 To'o ema nosi klubun seluk sia moos mai lo'u-sudur baa Ha'u.
Tan Ha'u kboi sia ti'an atu dadi baa Ha'ukaan ema.
Lia nia mak Na'i Maromak katak kedan hori uluk.’e
19-20 Lia nunee, mamaluk sia. Tuir ha'u Yakobus ne'e, kalo ema nosi klubun seluk sia nakara lo'u-sudur baa Na'i Maromak, ita ema Yahudi keta hasusar no hatodan sia hodi itakaan adat hamane aan. Di'ak liu, ita solok hakerek ida baa sia ha'ak, sia lalika tuir halo moos adat Yahudi. Mais sia musti tuir lia ne'e sia: Keta halo lia kfo'er. Keta haa na'an sera baa kukun. Keta haa na'an raan. Keta haa na'an mak ema nisak no'o.f 21 Ukun nia sia lahoos lia foun. Ema wa'in natene ti'an, tan sura loron boot ita leno Ukun-badu Musa ne'e iha uma hamulak hotu-hotu. Tan baa nia, ema nosi klubun seluk sia moos nanis natene ukun nia sia ti'an. Ha'ukaan dalen to'o ne'e dei.”
Fukun sia solok hakerek bodik ema sarani mak lahoos Yahudi
22 Hotu Kristus klosan sia no fukun sarani seluk sia ko'a kabuar lia atu solok ema baa katak siakaan lia kakotun bodik ema sarani sia iha fatin hotu-hotu. Sia buka ema makonak no serwisu nia, no ema mak ema sarani sia nakneter. Sia nakotu nunia ti'an, sia boi nola ema na'in rua. Ida naran Silas, ida tenik naran Yudas (sia moos nanaran nia Barsabas). Hotu sia naruka Silas no Yudas baa bele-bele no Paulus no Barnabas. 23 Sia nodi hakerek bodik ema nosi klubun seluk sia iha kota Antiokia iha rai Siria, liu to'o rai Kilikia. Hakerek nia isin nune'e:
“Tabe no hadomi nosi ami, mak Kristus klosan no fukun sarani seluk sia iha kota Yerusalem. Ami solok hakerek ne'e bodik emi mak ami hadomi hanesan maun-alin du'uk.
24 Ami solok hakerek ne'e, tan ami rona ema na'in hira nosi ami iha Yerusalem baa nanorin emi ti'an nosi lia hamane aan. Mais hanorin nia la makonak, to'o nasusar no nabenar emi. Nebee emi hatene, lahoos ami mak haruka sia. 25 Baa oras ami rona sia nasusar emi nunia, ami libur malu hodi leno lia nia. Oras ne'e, ami kabuar lia ti'an. Tan nunia, ami solok ema na'in rua nodi amikaan lia kakotun ne'e baa emi. Ida naran Yudas, ida naran Silas. Sia baa bele-bele no Barnabas no Paulus mak ami hadomi. 26 Ema na'in rua nia natiu susar to'o kre'is mate, tan sia tuir itakaan Na'in Yesus Kristus. 27 Tan lia nia, ami solok Yudas no Silas atu katak du'uk amikaan lia kakotun nia isin baa emi.
28 Na'i Maromak Kmalar Lulik katak baa ami ti'an, no ami hotu-hotu moos simu ha'ak, emi lalika tuir amikaan adat hamane aan no amikaan adat Yahudi seluk sia. Tan adat nia sia natodan butan emi dei. Mais emi musti hanoin lia ida-rua ne'e:
29 Keta halo lia kfo'er.
Keta haa na'an sera baa kukun.
Keta haa na'an raan.
Keta haa na'an mak ema nisak no'o.
Kalo emi daka isin lolon hodi tuir lia nia sia, emikaan maun-alin Yahudi sia la nakribi emi. Hodi nunia, emi bele kahur malu di'a-di'ak ho sia. Amikaan hakerek, nunia dei. Dame!”
30 Simu nola hakerek nia, Paulus sia tami atu baa kota Antiokia. To'o nebaa, sia libur nola ema sarani sia hotu-hotu, foin latan hakerek nia. 31 Rona nola hakerek nia isin, sia neon boot lo-loos.
32 Baa oras nia, Na'i Maromak moos nalo Yudas no Silas dadi baa mako'an. Sia rua dale lia wa'in baa mamaluk makfiar sia nodi nakbiit siakaan neon. 33 Sia nein iha nia kleur oda ti'an, ema sarani sia iha nia nabusik sia fila nikar baa ema mak solok sia. Sia nabusik nodi neon di'ak. 34 [Mais Silas nakara nein nafati iha Antiokia dei.]g
35 Paulus no Barnabas moos nein loron hira sia iha Antiokia. Sia nanorin Lia Di'ak bele-bele no ema seluk mak nanorin nosi Maromak Manfatin.
Paulus no Barnabas la'o fa'e malu
36 Paulus no Barnabas nein kleur oda ti'an iha Antiokia, Paulus katak baa Barnabas na'ak, “Mau! Ita baa hikar fatin hotu-hotu mak uluk ita la'o tuli. Ita baa haree mamaluk sia mak hori hirak nia ita foin hahuu hanorin sia. Sia nunabee ti'an?” 37 Rona Paulus nusu nunia, Barnabas moos simu. Mais nia nakara Yohanis baa no sia. (Yohanis ne'e, naran seluk Markus.) 38 Mais Paulus la no'uk, tan hori hirak iha rai Pamfilia, Markus ni'it aan la'o nela sia.h 39 Paulus no Barnabas toe maka'as, to'o sia fa'e malu. Hotu Barnabas nodi Markus, sa'e roo baa rai Siprus.