Paulus no Barnabas iha kota Ikonium
14
Paulus no Barnabas to'o kota Ikonium, sia tama baa uma hamulak Yahudi. Sia hanorin ema iha nia, to'o ema wa'in moos fiar baa Yesus. Sia, mak ema Yahudi no ema lahoos Yahudi. 2 Mais noo ema Yahudi na'in hira mak neon monas tan sia la no'uk simu Paulus no Barnabas hanorin. Sia sasuku ema to'o hirus tebe-tebes ema makfiar baa Yesus. 3 Mais Paulus no Barnabas la nata'uk. Sia nein kleur iha kota nia, nodi katak bei-beik lia nosi Na'i Yesus baa se-see dei. Sia nalore na'ak, Na'i Yesus laran di'ak bodik ema hotu-hotu. Na'i Maromak moos latan beran baa sia atu nalo tadak blaar oi-oik, nebee ema bele natene na'ak, Na'i Maromak mak naruka sia.4 Mais to'o ikus, ema mak iha kota nia fa'e malu dadi baa kabuun rua. Kabuun ida tuir ema Yahudi mak neon monas. Kabuun ida tenik nariik nafati no Kristus klosan sia.
5 Loron ida ema neon monas sia ko'a kabuar lia no Yahudi ulun sia no ema lahoos Yahudi, atu nasusar Kristus klosan sia. Sia nakara nitak no'o Paulus no Barnabas nodi fatuk. 6 Mais Paulus no Barnabas natene nola, hotu sia nalai baa tuur iha kota Listra no kota Derbe, no leo seluk sia iha rai Likonia. 7 To'o nebaa, sia moos katak Lia Di'ak nosi Yesus iha nia.
Ema nakara lo'u-sudur baa Paulus no Barnabas iha kota Listra
8 To'o kota Listra, Paulus no Barnabas nasoru mane ida mak ai kma'as hotu moris nodi. 9 Oras nia tuur nodi rona Paulus dale, Paulus natutuk matan baa nia. Paulus naneo na'ak, “Ema ne'e niakaan fiar bele nadi'ak nola nia!” 10 Hotu Paulus bolu ema nia na'ak, “Mau! Mariik ona!” Rona nola nunia, ema nia naksoit nadeer kedas, hotu la'o.
11 Naree nunia, ema lear iha nia blaar. Sia dale baa malu nodi siakaan lia Likonia na'ak, “Hoi! Rona lai! Sia na'in rua ne'e, ema kukun mak tuun mai filak aan baa ema roman. Di'ak liu ita lo'u baa sia.” 12 Sia dale nunia, tan sia naneo na'ak Barnabas manesak no siakaan ema kukun ida naran Zeus. Sia fiar na'ak Zeus mak nase'i lale'an no raiklaran. Sia moos naneo na'ak Paulus hanesan ema kukun ida tenik naran Hermes, mak Zeus mako'an. 13 Iha kota nia nanokar, noo uma kakaluk ida bodik Zeus. Naree nola Paulus no Barnabas nadi'ak nola ema kma'as nia, kakaluk na'in loi nodi mai ai funan no karau baka aman boot ida, atu sera baa Kristus klosan sia. Ema lear moos la'o tuir kakaluk na'in nia.
14 Oras Paulus no Barnabas natene nola ema nakara lo'u-sudur baa sia, sia moos sakar. Sia soruk baa ema lear oin, hotu sira nahaat siakaan faru du'uk, nalo baa tadak na'ak sia la simu. Sia moos nahii na'ak, 15 “Adeei! Emi halo nune'e baa saa? Keta lo'u baa ami. Ami moos hanesan emi! Ami mai ne'e atu katak lia di'ak baa emi. Lia nia isin nune'e: keta lo'u-sudur baa ema kukun aat mak la noo folin. Musti lo'u-sudur baa Na'i Maromak mak moris. Nia mak nase'i lale'an no raiklaran no sasoin hotu-hotu.a 16 Hori uluk aan Nia foo leet baa ema klubun hotu-hotu iha raiklaran moris tuir siakaan hakara du'uk. 17 Mais Nia moos natuun tadak oi-oik, nebee ema bele natene Niakaan dadi'ak. Nia natuun udan nebee to'os no isin, tua no ween. Nia foo haan baa emi nodi nalo emi neon di'ak.”
18 Masik Paulus no Barnabas dale nunia moos, ema lear nia nodi luku siakaan sera.
19 Mais baa oras nia noo ema Yahudi na'in hira nosi kota Antiokia no kota Ikonium mak mai kota Listra. Sia sasuku ema lear nia atu sakar Kristus klosan sia. Hotu sia nitak Paulus nodi fatuk, to'o sia naneo na'ak nia mate ti'an. Hotu sia dada soe nia baa kota luan.
20 Mais baa oras Yesus eman sia kabuun nola Paulus, nia moos nadeer. Hotu nia tama nikar baa kota laran. Baa awan, nia no Barnabas la'o baa kota ida seluk, naran Derbe.
Paulus no Barnabas fila nikar baa ema sarani sia iha kota Antiokia iha rai Siria
21 To'o kota Derbe, Paulus no Barnabas nanorin Lia Di'ak nosi Yesus iha nia. Ema wa'in moos fiar. Hotu sia rua baa tenik kota Listra. Nosi nia, sia fila nikar baa kota Ikonium. Hotu sia liu baa kota Antiokia iha rai Pisidia. 22 To'o kota Antiokia, sia dale nakbiit Yesus eman sia neon na'ak, “Mamaluk sia! Kalo ita hakara dadi Na'i Maromak hutun-renu, keta hanoin ita la hetan susar. Nu'unabee moos, ita musti hetan susar. Mais ita musti haterus aan tuir Yesus bei-beik.”
23 Paulus no Barnabas baa kota nabee iha rai nia, sia buka ema atu foti baa fukunb bodik ema sarani iha fatin nia. Sia namulak nodi nalirin aan, nusu Na'i Maromak natudu ema. Hotu sia rai liman nodi namulak, foti ema nia sia nalo baa fukun sarani.
24 Nunia hotu, Paulus no Barnabas la'o nela rai Pisidia, liu baa rai Pamfilia. 25 Sia to'o kota ida naran Perga. Iha nia sia nanorin lia nosi Yesus. Hotu sia la'o la dook, to'o kota Atalia. 26 Iha nia sia sa'e roo baa nikar kota Antiokia iha rai Siria. Hori hirak nia, Yesus eman sia iha kota Antiokia ne'e, solok Paulus no Barnabas atu nala'ok serwisu nodi nusu nebee Na'i Maromak natudu laran di'ak baa sia. Oras ne'e, Paulus no Barnabas nakara fila baa katak ema sarani sia iha Antiokia na'ak, siakaan serwisu nia tetuk ti'an.
27 To'o Antiokia, Paulus no Barnabas libur nola Yesus eman sia iha uma hamulak laran, nodi dale naru-naruk nosi lia hotu-hotu mak Na'i Maromak nalo ti'an bodik sia. Sia moos katak na'ak, Na'i Maromak loke dalan ti'an, to'o ema mak lahoos Yahudi moos fiar Yesus. 28 Nunia hotu, Paulus no Barnabas nein kleur no Yesus eman sia iha kota nia.