Ema Antiokia sia solok Barnabas no Saulus
13
Baa oras nia, ema wa'in fiar baa Yesus ti'an iha kota Antiokia. Maromak nalo sia na'in hira baa mako'an. Na'in hira tenik nanorin ema. Sia hotu-hotu mak ne'e:Barnabas,
Simeon (mak ema bolu ‘Manek Metan’),a
Lukius (nosi kota Kirene),
Menahem (mak ema nawa'i hori sei ki'ik namutuk no Na'i Herodes),b
no Saulus.
2 Loron ida, sia nalirin aan nodi libur malu atu lo'u-sudur baa Na'i Maromak. Oras nia, Kmalar Lulik katak baa sia na'ak, “Boi hola Barnabas no Saulus! Sia musti nala'ok serwisu mak Ha'u atu klatan baa sia.”
3 Sia nalirin aan nodi namulak hotu ti'an, sia rai liman baa Barnabas no Saulus, foti sia rua baa nala'ok Na'i Maromak Niakaan serwisu.
Barnabas no Saulus baa rai Siprus
4-5 Hotu Maromak Kmalar Lulik solok Barnabas no Saulus baa la'o nasirin rai. Sia baa nahuluk kota ida iha tasi tehen naran Seleukia. Yohanis moos baa no sia (nia mak ema moos bolu na'ak Markus). To'o nebaa, sia sa'e roo tasi baa rai Siprus. Hotu sia tuun iha kota ida naran Salamis. Iha nia, sia tama baa uma hamulak Yahudi atu nanorin Na'i Maromak Manfatin.
6-8 Nunia hotu, sia la'o tuli nosi leo baa leo, to'o kota ida naran Pafos iha rai Siprus rohan balu. Gubernur ida naran Sergius Paulus nein iha kota nia. Nia ne'e kakutak di'ak. Oras nia rona nola Barnabas no Saulus mai, nia naruka ema baa bolu sia, tan nia beer basuk atu rona Na'i Maromak Manfatin.
Mais iha kota nia moos noo ema Yahudi ida naran Baryesus (niakaan naran seluk tuir lia Yunani na'ak ‘Elimas’). Nia, makaer aitahan kukun nodi tolek ema na'ak nia Maromak mako'an. Tan nia la nakara gubernur fiar baa Yesus, nia sasuku gubernur nebee keta rona baa Barnabas no Saulus.
9 Mais Maromak Kmalar Lulik babilan Saulus (ema moos bolu nia na'ak Paulus). Nia naklosu matan fuan nodi natutuk maka'as baa ema nia, hotu dale na'ak, 10 “Elimas! O ne'e, diabu ain-liman. O be'ur teen! O sakar lia di'ak hotu-hotu. To'o wainhira o male'uk Na'i Maromak dalan loos?! Manawa ona! 11 Rona! Na'i Maromak atu kastikar o! Okaan matan atu delek, hotu o la bele maree sa-saa to'o loron hira sia.”
Paulus dale hotu nunia, Elimas moos matan delek kedas. Nia la'o le-lemas, buka ema nadaek nia.
12 Naree Elimas kona kastikar nunia, gubernur blaar karin. Oras nia rona Barnabas no Paulus nanorin lia nosi Yesus, Nia neon monu kedas. Hotu nia moos fiar baa Yesus.
Paulus no Barnabas nodi Lia Di'ak baa kota Antiokia iha rai Pisidia
13 Nunia hotu, Paulus sia la'o nela kota Pafos iha rai Siprus. Sia sa'e roo tasi, hakur baa balu, to'o kota Perga iha rai Pamfilia. To'o nebaa, sia tuun. Hotu Yohanis Markus la'o nela sia, fila nikar Yerusalem. 14 Nosi Perga, Paulus no Barnabas la'o rai baa kota Antiokia iha rai Pisidia.
Sia to'o nebaa kona baa ema Yahudi siakaan loron boot. Hotu sia moos baa tuir namulak iha uma hamulak Yahudi. 15 Baa oras nia, ema leno hakerek nosi Bei Musa no Maromak mako'an seluk sia. Leno hotu ti'an, uma hamulak ulun sia nusu baa Paulus no Barnabas na'ak, “Ama sia! Kalo emi hakara hanorin ami, ami husu hodi hakneter, nebee emi dale hakbiit amikaan neon.”
Paulus dale baa ema Yahudi iha Antiokia
16 Rona nola uma hamulak ulun sia nusu nunia, Paulus soruk baa oin. Nia natadan nodi liman, nebee hotu-hotu no-nook. Hotu nia katak na'ak, “Mamaluk ema Isra'el sia, no emi hosi klubun seluk sia mak beer tuir Na'i Maromak. Ha'u kusu nebee emi ta'an tilun, rona baa ha'u lai.
17 Hori uluk fohon, Na'i Maromak boi nola ema Isra'el siakaan bei uluk. Sia nein iha rai Mesir mak lahoos siakaan rain. Mais Na'i Maromak natuun manek no dame baa sia iha nia, to'o siakaan husar-binan bea tu'an. Hotu Na'i Maromak nodi Niakaan beran boot, nasai sia nosi Mesir.c 18 Hotu sia moris lori baa-mai iha fatin fuik sia to'o tinan haat nulu. Masik sia ulun fatuk nohuun moos, Na'i Maromak naterus aan nala'ok sia.d 19 Nosi ikus, Nia nabe'o dodok ema klubun hitu iha rai Kana'an. Hotu Nia fa'e siakaan rain nia, dadi bein sasoin bodik bei uluk sia.e 20 Sia moris nunia to'o tinan atus haat lima nulu.
Nunia ti'an, Na'i Maromak foti ema makotu lia sia atu naliku sia. Nosi ikus, Nia foti mako'an ida naran Samuel bodik sia.f 21 Mais baa oras nia, bei uluk sia nakara tebes atu nana'i baa na'in ida. Tan lia nia, Na'i Maromak foti ema ida nosi hunun Benyamin, nalo baa na'in. Ema nia, Kis oan naran Saul. Saul kaer ukun to'o tinan haat nulu.g 22 Nosi ikus, Na'i Maromak natuun nikar nia, seluk nodi Isai oan naran Daud. Na'i Maromak dale nosi Daud nia na'ak, “Isai oan Daud ne'e, kona baa Ha'ukaan neon. Nia nanis atu nalo tuir Ha'ukaan hakaran hotu-hotu.”h 23 Baa oras nia, Na'i Maromak nameno solok Daud husar-binan ida atu sori ema Isra'el sia. Oras ne'e, ha'u kakara katak baa emi hotu-hotu ka'ak, Daud husar-binan mak Na'i Maromak nameno nia, Nia mak Yesus.”
Paulus nanorin na'ak Yesus mak Kristus
24 Hotu Paulus dale natutan na'ak, “Yesus sei la nahuu dauk Niakaan serwisu, ema ida naran Yohanis baa katak ema Isra'el sia, nebee sia soe lakon siakaan salan. Hotu sia musti simu sarani, dadi tadak na'ak sia di'a-di'ak ti'an no Na'i Maromak.i 25 Oras Yohanis niakaan serwisu kre'is mohu oan, nia katak baa ema na'ak, ‘Keta haneo ha'ak, ha'u ne'e, Ema nia mak Na'i Maromak nameno atu solok mai. Hanoin di'a-di'ak! Emi sei hein tenik ema ida atu mai. Nia boot liu ha'u, to'o dadi niakaan ata dei moos, ha'u la kfatan.’j
26 Mamaluk sia! Emi mak Abraham husar-binan no emi hosi klubun seluk mak beer Na'i Maromak. Rona ha'u lai! Na'i Maromak katak lia ne'e, tan Nia nakara atu sori ita, nebee ita moris tuir Niakaan dalan. 27 Hori uluk, Na'i Maromak naruka kedan Niakaan mako'an sia nakerek lia nosi Ema mak Nia atu solok mai. Ema Yerusalem no siakaan ulun sia, leno lia nia dala wa'in ti'an. Sura loron boot, sia tama baa uma hamulak, leno lia nia. Mais sia la natene na'ak, Ema mak Na'i Maromak nameno kedan nia, mak Yesus. Sia buka dalan atu taa ukun mate baa Nia. Mais lia ne'e nato'o saa mak Maromak mako'an sia nakerek nela ti'an. 28 Masik sia la noo lia tatuur atu nodi nahonu Nia moos, sia baa nusu Gubernur Pilatus, nebee no'o Nia.k 29 Gubernur moos simu. Hotu sia nedi no'o Nia baa ai karuus, to'o mate. Mais lia ne'e moos nato'o saa mak Maromak mako'an sia nakerek nela ti'an. Hotu, sia natuun Niakaan maten nosi ai karuus, nodi baa nakoi.l 30 Mais Na'i Maromak nodi Niakaan beran nalo Nia moris nikar.
31 Moris nikar ti'an, Nia natadu aan dala wa'in baa Niakaan ema sia. Sia nia mak mai bele no Nia nosi rai Galilea baa Yerusalem. Oras ne'e, sia moos dadi saksiin bodik ita ema Isra'el.”m
Paulus nanorin na'ak Maromak mako'an nakerek kedan lia Yesus
32-33 Hotu Paulus dale natutan tenik na'ak, “Nune'e! Ha'u ko Barnabas mai hosi rai dook atu katak lia ida baa emi nune'e: lia mak Na'i Maromak nameno kedan baa bei uluk sia, oras ne'e lia nia dadi ti'an. Na'i Maromak nalo Yesus moris nikar ti'an. Iha Kananuk tonun nomer rua, Na'i Maromak naruka ema nakerek kedan lia Yesus na'ak,
‘O ne'e, Ha'ukaan Oan.
Ohin loron ne'e, Ha'u kfoti O atu kaer ukun.’n
34 Hori uluk Na'i Maromak nameno atu nalo Ema nia moris nikar. Hotu, Ema nia la mate tenik ona. Tan lia nia, Maromak naruka mako'an nakerek kedan lia Yesus na'ak,
‘ Uluk Ha'u kamate menon ko Daud atu katuun matak-malirin baa nia.
Oras ne'e Ha'u moos kamate menon nia ko O, tan O ne'e, Daud husar-binan.’o
35 Noo tenik Kananuk ida na'ak,
‘Na'i Maromak la nabusik Niakaan Ema Moon isin lolon dodok iha rate.’p
36-37 Lia isin nune'e: Ema Moon nia lahoos Na'i Daud, mais ema ida seluk. Na'i Daud nalo lia di'ak wa'in bodik niakaan renu sia, hotu nia mate. Ema nakoi nia ti'an. Niakaan maten moos dodok ona. Hodi nunia ita bele hatene ha'ak, Ema Moon nia lahoos Na'i Daud, mais ema seluk mak Na'i Maromak nalo moris nikar, to'o Niakaan isin lolon la dodok iha rate.
38-39 Mamaluk sia, rona di'a-di'ak! Ema Moon nia, mak Yesus! Kalo ita fiar baa Nia, nanis Nia kasu itakaan salan. Masik ita haru'i aan tuir Ukun-Badu Bei Musa hotu-hotu moos, ita la biit. Na'i Maromak nanis nafoli ita na'ak, ema maksalan. Mais, kalo ita fiar baa Yesus, Na'i Maromak nafoli ita na'ak, ema loos. 40-41 Tan nunia, emi musti hanoin di'a-di'ak. Keta to'o lia saa mak Maromak mako'an sia katak ti'an nia, kona baa emi. Tan sia nakerek nela na'ak,
‘Sintidu, ema mak naleuk Ha'u!
Tan Ha'u ne'e, Maromak. Ha'u kalo lia mak nalo ema blaar.
Masik ema nalore ti'an lia nia baa emi moos, emi la simu.
Sintidu! Nosi ikus emi hetan kastikar to'o mate.’q
Tan lia nia, hanoin di'a-di'ak mamaluk sia. Lia mak ha'u katak ne'e, keta firuk lakon, hanesan ema maleuk teen sia. Ha'ukaan dalen, to'o ne'e dei.”
42 Dale hotu nunia, Paulus no Barnabas nariik atu la'o nela uma hamulak nia. Mais ema nia sia nusu nebee domiku oin, sia mai nikar nalore tenik lia Yesus nia. 43 Sia rua sai nosi uma hamulak, ema wa'in moos sai tuir sia. Paulus no Barnabas foo lia tate'an baa sia na'ak, “Na'i Maromak laran di'ak tebes baa ita. Tan nunia, emi musti fiar metis baa Nia.”
Ema Yahudi sia la simu Paulus no Barnabas
44 Domiku oin, kona baa ema Yahudi siakaan loron boot, ema hotu-hotu mak iha kota nia tomak, kre'is mai hotu atu rona Na'i Maromak Manfatin. 45 Baa oras ema Yahudi sia naree ema wa'in mai rona Paulus nunia, sia hirus. Hotu, sia sakar Paulus dalen, hotu dale nahaat nia.
46 Mais Paulus no Barnabas la nakiduk kois. Sia katak na'ak, “Rona! Na'i Maromak loke uluk dalan bodik ita ema Yahudi, nodi foo Niakaan Manfatin baa ita. Tebes! Mais emi la simu Niakaan Manfatin nia. Tan baa nia, emi la fatan moris nima-nimak ho Nia. Oras ne'e ami atu hodi Manfatin nia baa ema nosi klubun seluk sia. 47 Na'i Maromak du'uk mak naruka nunia hori uluk. Nia nodi Bei Yesaya nakerek nosi ita ema Yahudi na'ak,
‘Ha'u kfoti emi ema Yahudi, dadi hanesan badut bodik ema nosi klubun seluk sia,
nebee emi haroma dalan mai baa Ha'u,
nebee Ha'u ksori sia kosi siakaan salan.
Emi musti hatudu dalan nia baa ema iha raiklaran tomak.’”r
48 Baa oras ema lahoos Yahudi sia rona Paulus dale nunia, sia neon di'ak tebe-tebes. Sia katak na'ak, “Tonu-haboot Na'i Maromak! Ami foti-hahaas Maromak Manfatin!” Baa oras nia moos, ema mak Na'i Maromak boi hori uluk atu moris nima-nimak no Nia, sia hotu-hotu fiar baa Na'i Yesus.
49 Hodi nunia, Maromak Manfatin keke nosi ibun baa ibun iha rai nia tomak.
50 Iha kota nia noo ema boot sia, feto no mane. Sia na'in hira beer Na'i Maromak. Mais ema Yahudi ulun sia mai sasuku sia, to'o sia te'ur nasai Paulus no Barnabas nosi siakaan rain. 51 Oras sai, Paulus no Barnabas nakbaas nela ahukresan nosi ain atu dadi tadak na'ak, ema iha kota nia la simu sia. Hotu, sia rua se'i kotuk, la'o nela kota nia baa kota ida seluk, naran Ikonium.s
52 Mais ema mak tuir Yesus iha kota Antiokia, sia neon di'ak lo-loos, tan Kmalar Lulik nakbiit siakaan neon.