Ema no'o Yakobus, hotu natama Petrus baa bui
12
Baa oras nia, Na'i Herodesa moos nahuu nasusar Yesus eman balu. 2 Nia naruka ema baa no'o Yakobus nodi surik. (Yakobus nia, mak Yohanis maun.) 3 Yakobus mate nia nalo ema boot Yahudi sia neon di'ak. Naree nunia, Herodes hetak nalo tu'an. Kona baa loron di'ak mak ‘Dahur Tubi Bakae’,b Herodes moos naruka ema baa kohi nola Petrus. 4 Kohi nola ti'an, sia natama baa bui. Hotu, sia naruka sondadu klibur haat nebee sia seluk malu daka Petrus loron-kalan. Klibur ida, ema na'in haat. Herodes nakara hein to'o loron di'ak siku lai, foin nia nakotu Petrus lian iha ema lear oin.c 5 Baa oras Petrus iha bui nia, Yesus eman seluk sia namulak la nakotu. Sia nakro'an nebee Na'i Maromak naliku Petrus iha bui.Na'i Maromak nasai Petrus nosi bui
6 Baa awan, loron di'ak siku ti'an, Herodes atu nakotu Petrus lian iha ema lear oin. Kalan nia moos, sia kesi Petrus nodi besi talik matan rua iha bui laran. Hotu, sia naruka Petrus toba iha sondadu na'in rua klaran. Sondadu seluk sia daka odamatan.
7 Teki-tekis Maromak Niakaan makbukar lale'an ida mai nariik iha nia. Ke'an nia moos nakroma no naksinak. Makbukar nia fu'a nadeer Petrus nodi dale na'ak, “Petrus! Madeer lai-lais!” Naruka nunia, besi talik nakbudi kedas nosi Petrus liman. 8 Hotu makbukar naruka tenik na'ak, “Tau faru no kaso ona.” Petrus tau ti'an, makbukar naruka tenik na'ak, “Tau faru luan, hotu mai tuir ha'u.”
9 Hotu Petrus tuir kedas makbukar nia, atu la'o sai nosi bui. Petrus naneo na'ak, nia me'i dei. Mais tuir loos, lia tebes nunia. 10 Sia la'o liu daka fatik nomer ida no nomer rua, hotu to'o odamatan besi. Odamatan nia na'in nakloke du'uk. Sia rua sai liu, hotu la'o tuir dalan mak baa kota. Teki-tekis, makbukar lale'an nia la'o nela Petrus, nabusik nia mesan iha dalan nia.
11 Makbukar lakon ti'an, foin Petrus neon nakloke. Nia naneo na'ak, “Ne'e tebes! Oras ne'e foin ha'u katene, Na'i Maromak mak solok makbukar nia mai nabusik ha'u nosi Herodes liman. Nia nalo nunia, nebee ha'u la kona ema Yahudi siakaan kakutak dois.”
12 Hotu Petrus baa feto ida naran Maria uman. Feto ne'e, Yohanis inan. Yohanis ne'e, naran seluk Markus. Iha uma nia, ema wa'in naklibur malu ti'an. Sia no'i namulak no nakro'an nebee Na'i Maromak tulun Petrus. 13 To'o uma nia, Petrus deku odamatan nanokar nodi bolu. Ata feto ida naran Rode rona ema bolu, nia moos baa nateke see mak mai nia. 14 Rona Petrus lian, Rode natene kedan. Nia neon di'ak to'o. Mais tan benar, nia nalu'a loke odamatan baa Petrus. Hotu nia nalai tama lai-lais, katak baa ema sia na'ak, “Rona! Petrus nariik iha luan!”
15 Rona Rode dale nunia, sia nataa na'ak, “Lale! O keta dale makdiuk nunia.”
Mais feto nia kaer metin niakaan lia fuan na'ak, “Tebes! Ha'u krona tebes Petrus lian! Nia iha luan nebaa.”
Mais sia la fiar. Sia dale na'ak, “Keta arumak ema nia, Maromak Niakaan makbukar lale'an ida mak daka Petrus.”
16 Sia sei dale baa-mai, Petrus bolu bei-beik, to'o sia baa loke odamatan. Loke ti'an, sia blaar, tan ema nia Petrus tebes. 17 Hotu Petrus nodi liman nakahik sia hotu-hotu, nebee sia no-nook. Hotu nia katak baa sia, lia oin nunabee to'o Na'i Maromak nasai nia nosi bui. Nia moos naruka na'ak, “Emi baa katak lia ne'e hotu-hotu, baa Yakobus no Kristus klosan seluk sia.” Naruka notu nunia, Petrus la'o baa fatin seluk.
18 Awan seisawan, sondadu mak daka bui sia naree Petrus la iha ti'an. Sia benar no nata'uk basuk, tan la natene saa mak atu dadi baa sia. 19 Oras Herodes natene nola lia nia, nia naruka ema baa buka Petrus, mais la nasoru. Rona nunia, Herodes naruka ema leno sondadu mak daka bui sia. Leno ti'an, nia naruka ho'o hotu-hotu.
Nunia hotu, Herodes la'o nela Yudea, baa nein iha kota Kaisarea.
Na'i Herodes mate
20 Baa oras nia, ema nosi kota Tirus no kota Sidon nakara sosa haan nosi Na'i Herodes rain. Mais na'i nia funu malu kleur ti'an no sia. Nosi ikus, ema Tirus no ema Sidon kabuar lia buka dalan atu dame no Na'i Herodes. Sia boi nola ema na'in hira atu baa nasoru Na'i Herodes. To'o Kaisarea, sia nalo belu no ema ida naran Blastus mak serwisu iha na'in tofatik. Sia kabuar lia no Blastus, nebee nia buka dalan bodik sia bele nasoru Na'i Herodes.
21 Nosi ikus, Na'i Herodes moos nakara. Hotu sia boi leet ida atu nasoru malu. Baa loron nia, Na'i Herodes nalo dahur boot. Nia tau niakaan isi belun, hotu natodan aan baa niakaan kadera ukun iha ema lear oin. Hotu nia nahuu dale. 22 Rona nola niakaan lian, ema lear nia tonu-naboot nia na'ak, “Rona! Niakaan lian nia kabaas! Ne'e lahoos ema raiklaran lian. Lian ne'e nosi lale'an.” 23 Teki-tekis Maromak Niakaan makbukar lale'an ida natuun moras baa Na'i Herodes, tan nia simu ema lear tonun nodi sesu sees Na'i Maromak. La kleur Na'i Herodes mate dodok, tan oras sei moris, ular aat naa niakaan isin ti'an.
24 Baa oras nia, Na'i Maromak Manfatin hetak keke lema. Ema mak tuir Yesus moos, hetak wa'in tu'an.
25 Baa oras nia moos, Barnabas no Saulus nodi ema Antiokia siakaan tatulun baa Yerusalem. Hotu sia fila nikar Antiokia. Sia nodi mane nurak ida naran Yohanis. Yohanis ne'e, mak sia temi na'ak, Markus.