Petrus naloos aan, tan nia sarani ema mak lahoos Yahudi
11
Petrus sei la fila dauk nosi Kaisarea, Kristus klosan sia no ema makfiar seluk sia iha Yerusalem rona ti'an na'ak, ema mak lahoos Yahudi simu Na'i Maromak Manfatin. 2 Oras Petrus fila nikar baa Yerusalem ti'an, ema makfiar na'in hira nalo lia no nia, tan sia nakara Yesus eman sia musti tuir metin adat Yahudi.a Sia nasalak Petrus na'ak, 3 “Hoi! O malo oinsaa mak nia? O matene itakaan adat ka lale? Oin nunabee bele sakar adat to'o tama baa ema lahoos Yahudi uman? Saa tenik, maa-memu mo sia? La bele nunia, tan sia la tuir itakaan lahan hamane aan. Sia la fatan kahur malu no ita.”4 Rona nola nunia, Petrus moos katak lia hotu-hotu mak dadi ti'an na'ak, 5 “Baa loron ida, oras ha'u kein iha kota Yope, ha'u kbaa kamulak. Na'i Maromak moos natudu baa ha'u tuir me'i. Ha'u karee lale'an nakloke, tais fafalun boot ida mosu tuun mai. Tais nia nawisa baa lidun haat. 6 Iha tais fafalun laran, ha'u karee osa no lotuk oi-oik. Balu ain haat, balu mane'ek no manu oi-oik. Ita ema Yahudi hakribi buat nia sia. 7 Ha'u moos rona lia maliak ida naruka na'ak, ‘Petrus! Madeer! Mo'o osa no lotuk ne'e sia, maa ona.’
8 Mais ha'u kataa ka'ak, ‘La bele, Ama Boot! Ha'u la kaa kokon buat oin nunia sia, tan ami hakribi.’
9 Mais lia maliak nia nataa na'ak, “Kalo Na'i Maromak katak na'ak la hakribi ona, o la bele katak ma'ak sei hakribi.”
10 Tais nia mosu nunia to'o isin tolu, foin ni'it aan sa'e nikar baa lale'an.
11 Baa oras nia moos, ema na'in tolu to'o uma nia. Sia nosi Kaisarea mai buka ha'u. 12 Na'i Maromak Kmalar Lulik katak baa ha'u na'ak, ‘Tuun baa tuir sia. Lalika makerat. Masik sia lahoos ema Yahudi moos, keta makribi sia.’ Hotu itakaan maluk na'in neen ne'e moos tuir no ha'u baa Kaisarea. Iha nia, ami hotu-hotu tama baa sondadu ulun Roma ida uman. 13 Ulun nia dale na'ak, foin loron hira liu ne'e, nia naree Maromak Niakaan makbukar lale'an ida nariik iha niakaan uma, hotu dale na'ak, ‘Maruka ema baa Yope, baa bolu ema ida naran Simon Petrus. 14 Ema nia atu katak baa o mo okaan ema uma laran sia, lia nosi Yesus mak bele sori emi.’
15 Tan lia nia, ha'u kanorin lia nosi Yesus baa sia. Baa oras nia moos, Maromak Kmalar Lulik tuun baa sia, manesak nu'u tuun baa ita hori hirak nia. 16 Ha'u karee kola sia simu Maromak Kmalar Lulik nunia, ha'u kanoin kola Na'i Yesus dalen uluk mak na'ak, ‘Yohanis sarani emi nodi wee, mais Na'i Maromak atu nalo lia boot liu nia, tan Nia atu natuun Niakaan Kmalar Lulik bodik emi.’b 17 Lia ne'e malorek ti'an. Na'i Maromak natuun Niakaan Kmalar Lulik baa ema mak lahoos Yahudi, nu'u Nia moos natuun baa ita, tan ita fiar baa Na'i Yesus Kristus. Ha'u atu kdale saa tenik? Emi hakara ha'u ksakar Na'i Maromak ka? ”
18 Rona Petrus naloos aan nunia, sia la nasalak tenik nia ona. Sia moos tonu-naboot Na'i Maromak na'ak, “Maka'as basuk! Na'i Maromak loke dalan ti'an, nebee ema mak lahoos Yahudi moos bele soe lakon siakaan salan. Nia nakara nebee sia moos bele moris nima-nimak no Nia.”
Yesus eman sia nalai keen karin malu, to'o balu libur malu iha kota Antiokia
19 Nahuu baa oras Stefanus mate ti'an, ema nasusar Yesus eman sia. Tan nunia, sia nalai keen karin malu baa fatin hotu-hotu. Balu baa rai Fenisia, balu moos baa rai Siprus, no balu tenik nalai dook to'o kota Antiokia iha rai Siria. To'o nebaa, sia katak lia nosi Yesus iha nia. Mais sia katak baa ema nosi siakaan klubun Yahudi du'uk. La katak baa ema seluk.c
20 Mais Yesus eman sia nosi rai Siprus no kota Kirene mak nalai to'o kota Antiokia iha rai Siria, sia balu katak Lia Di'ak nosi Na'i Yesus baa ema Yunani iha nia. 21 Na'i Maromak moos natuun beran baa sia, to'o ema wa'in fiar baa Na'i Yesus.
22-24 Oras Yesus eman sia mak iha Yerusalem rona na'ak, ema Yunani iha Antiokia moos fiar baa Yesus ti'an, sia solok ema ida naran Barnabas, baa naree sia iha nebaa. Barnabas ne'e, ema laran di'ak. Nia fiar tebe-tebes baa Na'i Maromak. Maromak Kmalar Lulik moos babilan niakaan moris.
To'o nebaa, Barnabas neon di'ak tan naree Na'i Maromak moos serwisu ti'an iha ema lahoos Yahudi siakaan moris. Hotu, nia nakbiit siakaan neon, nebee tuir tebe-tebes Na'i Yesus dalan moris. Hodi nunia, Na'i Yesus eman sia hetak kleur, hetak wa'in.
25 Nunia hotu, Barnabas baa buka Saulus iha kota Tarsus. 26 Nasoru nola ti'an, nia namaus nebee sia rua fila bele-bele baa Antiokia. Saulus moos nakara. Hotu sia rua nein namutuk no Yesus eman sia iha Antiokia tinan ida laran. Sura loron sia rua nanorin Yesus dalan moris baa ema lear. (Iha kota Antiokia nia, ema foin nahuu nanaran Yesus eman sia na'ak, ‘ema Kristen’).d
27 Oras sia rua sei nein iha Antiokia, ema na'in hira mai nosi Yerusalem. Ema nia sia, Maromak nalo baa mako'an. 28 Nosi sia, ema ida naran Agabus. Maromak Kmalar Lulik katak baa nia na'ak, “Rai salaen boot atu dadi iha raiklaran tomak.” Hotu, Agabus baa katak lia nia baa ema. (Niakaan dale nia naksain tebes, baa oras ukunrai Roma ulun ida naran Klaudius kaer ukun.)e 29 Rona Agabus dale kedan nunia, Yesus eman sia iha Antiokia ko'a lia atu libur osan, nebee foo baa mamaluk makfiar sia mak moris susar iha rai Yudea. Ida-idak foo tuir niakaan babelen. 30 Libur hotu ti'an, sia boi Barnabas no Saulus atu nodi osan nia foo baa ema susar sia iha Yudea nebaa.