Stefanus dale iha moon-metan
7
Hotu ema Yahudi siakaan na'ilulik ulun boot nusu baa Stefanus na'ak, “Lia mak sia tula baa o nia, tebes ka lale?” 2-3 Stefanus nataa na'ak, “Ama sia! Rona kokon lai. Itakaan bei uluk Abraham sei la lori dauk nosi niakaan leo huun, Na'i Maromak mak Beran Kaliuk natadu aan baa nia. Nia naruka Bei Abraham na'ak, ‘Baa ona! La'o mela rai ne'e mo okaan familin sia. Baa rai ida mak Ha'u atu katudu baa o!’ Rona nola nunia, Bei Abraham la'o nela rai Mesopotamia.a 4 Hodi nunia, nia la'o nela ema Kasdim rain, lori baa leo ida naran Haran. Baa oras aman susu mate ti'an, Na'i Maromak nodi nia lori mai rai mak ama sia nein fatin to'o baa oras ne'e.b 5 Baa oras nia, Na'i Maromak sei la foo rai rohan ida moos baa Bei Abraham. Mais Nia nameno na'ak, ‘Ha'u atu klatan rai ne'e baa o mo okaan husar-binan sia.’ Na'i Maromak nameno nunia, mais baa oras nia Bei Abraham la noo oan.c 6 Masik nunia moos, Na'i Maromak dale baa nia na'ak, ‘Okaan husar-binan atu baa nein iha ema seluk rain. Ema rai nia atu tonan namukit sia nalo baa ata, to'o tinan atus haat laran. 7 Tinan atus haat siku ti'an, Ha'u atu kastikar ema rai nia. Hotu okaan husar-binan atu la'o nela rai nia, mai nikar fatin ne'e. Iha ne'e, sia atu namulak nodi lo'u-sudur baa Ha'u.’d 8 Na'i Maromak nameno notu nunia, Nia namate menon nia nodi lahan hamane aan, nebee dadi tadak na'ak, Bei Abraham sia dadi baa Niakaan ema ti'an. Hotu, oras Bei Abraham oan Isak otas foin loron walu, Bei Abraham nalo lahan hamane aan baa nia. Nosi ikus Isak moos nalo lahan hamane aan baa oan Yakob. Hotu, Yakob moos nalo lahan hamane aan baa oan mane na'in sanulu resin rua, baa oras ida-idak otas loron walu. Sia nia mak itakaan bei uluk sia.e
9 Dala ida, itakaan bei uluk nia sia hirus no alin Yusuf, to'o fa'an nia dadi baa ata iha rai Mesir. Mais Na'i Maromak la nabusik nia.f 10 Na'i Maromak sori nia nosi niakaan susar hotu-hotu. Nia moos foo kakutak matenek baa Yusuf, nebee bele natene lia oi-oik. To'o Na'i Mesir moos nadomi nia, hotu foti nia nalo baa gubernur iha rai Mesir tomak. Baa oras nia, Yusuf moos kaer ukun iha na'in tofatik.g
11 Nosi ikus, rai salaen boot mosu iha rai Mesir no rai Kana'an. Rai salaen nia boot liu resik, to'o ema susar iha fatin hotu-hotu. Baa oras nia, itakaan bei uluk nia sia moos la noo haan.h 12 Mais siakaan ama Yakob rona na'ak, noo haan iha rai Mesir. Hotu nia naruka oan sia baa sosa haan iha nebaa. Oan nia sia, mak itakaan bei uluk sia. 13 Sosa nola ti'an, sia moos fila. Baa oras haan nia atu mohu ona, Bei Yakob naruka nikar sia baa sosa tenik haan. Foin dala ida ne'e, Yusuf nalore lia na'ak, nia mak siakaan alin susu. Hotu nia natudu maun-alin sia baa Na'i Mesir.i 14 Nia moos nusu nebee niakaan aman no ema uma laran hotu-hotu lori baa rai Mesir. Sia hotu-hotu nia, ema na'in hitu nulu resin lima.j 15 Hodi nunia, Bei Yakob lori baa rai Mesir, to'o nia no itakaan bei uluk sia mate iha nebaa.k 16 Mais nosi ikus, sia nodi nikar bei uluk siakaan ruin baa leo Sikem iha rai Kana'an. Hotu, sia nakoi iha rate fatik mak uluk Bei Abraham sosa nosi Hemor husar-binan sia.”l
Stefanus dale nosi lia Bei Musa [\2]
17 Hotu Stefanus dale natutan na'ak, “Itakaan ema Yahudi sia bea iha rai Mesir, to'o kre'is baa loron Na'i Maromak nakotu atu nala'ok Niakaan mamenon baa Abraham. 18 Oras nia, noo na'i foun ida iha Mesir. Nia la natene lia Yusuf.m 19 Na'i nia tonan namukit itakaan ema sia. Nia seten nebee soe siakaan kau mea oan sia to'o mate.n
20 Baa oras nia, Bei Musa moos moris mai. Niakaan isin lolon kabaas to'o. Tan inan-aman la no'uk nalo tuir na'in ukun, sia subar nia iha uma, to'o otas fulan tolu.o 21 Otas fulan tolu ti'an, sia la bele subar tenik. Hotu sia soe nia, mais na'i Mesir oan feto foti nola, nalo baa oan du'uk.p 22 Hodi nunia, manorik Mesir sia nanorin siakaan matenek hotu-hotu baa Musa, to'o nia dadi ema mahalok boot ida. Nia dale matenek. Serwisu moos matenek.
23 Baa otas tinan haat nulu, Musa beer natene niakaan ema Isra'el sia. 24 Loron ida, nia sai baa, hotu naree ema Mesir ida ta'e ema Isra'el ida. Nia moos baa tulun niakaan ema Isra'el nia, hotu no'o ema Mesir nia. 25 Musa naneo na'ak niakaan ema sia natene ti'an na'ak, Na'i Maromak solok nia nebee sori sia nosi susar. Mais tuir loos, sia sei dauk natene lia nia. 26 Baa awan, Musa sai tenik baa naree niakaan ema Isra'el sia. Nia naree ema na'in rua tuku malu. Hotu nia baa atu nalo sia rua dame malu nodi na'ak, ‘Hoi! Emi rua ne'e, maun-alin. Tan saa emi hakaat malu nune'e?’
27 Mais ema ida nosi sia rua nia dudu sees Bei Musa nodi na'ak, ‘See mak foti o baa amikaan ulun? See mak foti o baa amikaan makotu lia? 28 O maneo o bele mo'o ha'u, hanesan o mo'o ema Mesir hori sehik nia ka?’ 29 Rona nola nunia, Bei Musa noran ema natene nia no'o ema ti'an. Tan baa nia, nia la'o nela rai Mesir, baa nein iha ema Midian rain. Iha nia, nia nola feto, hotu netan oan mane na'in rua.q
30 Tinan haat nulu liu ti'an, Bei Musa baa rai leet ida kre'is baa foho ida, naran Foho Sinai. Iha nia Maromak Niakaan makbukar lale'an mai natadu aan baa nia nosi ha'i lakan laran. Ha'i lakan nia no'i naa ai huun ki'ik ida, mais la namotuk. 31 Naree nunia, Bei Musa benar karin. Nia nare'is aan baa, atu nodi natene saa mak nia. Mais teki-tekis, nia rona Na'i Maromak dale nosi ha'i laran nia na'ak, 32 ‘Ha'u ne'e, okaan bei uluk siakaan Maromak. Sia, mak okaan Bei Abraham, Bei Isak, no Bei Yakob.’ Rona nola nunia, Bei Musa nata'uk to'o kiki. Nia la bele foti oin atu naree ai huun mak laka nia.
33 Hotu Na'i Maromak dale tenik na'ak, ‘Musa! Kolu okaan kaso, tan o mariik iha fatin lulik! 34 Keta maneo Ha'u kalu'a ti'an Ha'ukaan ema Isra'el sia iha Mesir. Lale! Ha'u ksei kanoin sia. Ha'u katene siakaan susar. Ha'u krona sia nakro'an no nahii nusu tulun. Tan baa nia, Ha'u kamaan aan tuun mai atu sori sia. Oras ne'e, Ha'u ksolok o baa Mesir. Baa ona!’r
35 Hodi nunia, Na'i Maromak natadu aan iha ha'i laran nodi naruka Bei Musa fila baa Mesir tan Na'i Maromak boi nia ti'an atu sori ema Isra'el nosi susar. Musa ne'e, mak uluk ema nusu na'ak, ‘See mak foti o baa amikaan ulun?’ Mais baa oras ne'e, Na'i Maromak du'uk mak foti nia baa ulun!s 36 Rona nola Na'i Maromak naruka nunia, Bei Musa fila nikar baa Mesir. Iha nebaa, Na'i Maromak nalo tadak blaar. Nosi ikus, nodi ema Isra'el sai nosi Mesir, la'o liu Tasi Mean. Hotu, nala'o sia nasiri fatin fuik sia, iha tinan haat nulu laran.t
37 Bei Musa moos katak baa ema Isra'el sia na'ak, ‘Nosi ikus, Na'i Maromak atu foti ema ida nosi emi, dadi baa Niakaan mako'an hanesan ha'u ne'e.’u 38 Oras nia, Bei Musa namutuk no itakaan ema Isra'el sia iha fatin fuik. Nia dadi ailalete bodik itakaan bei uluk no Maromak Niakaan makbukar lale'an, oras nia natuun Na'i Maromak Manfatin baa Bei Musa iha Foho Sinai. Hotu, Bei Musa natutan Manfatin nia baa itakaan bei uluk sia. Manfatin nia mak natudu dalan moris baa ita.v
39 Masik nunia moos, itakaan bei uluk sia la no'uk rona baa Musa. Sia dudu sees nia, tan sia nakara fila nikar baa Mesir. 40 Sia baa namaus Harun na'ak, ‘Okaan alin Musa nodi ami sai nosi rai Mesir ti'an. Mais oras ne'e, ami la hatene nia iha rai kuak nabee. Tan nunia, ami husu o malo ai'oi lulik bodik ami, nebee ai'oi lulik nia mak nala'o nodi ami baa.’w 41 Namaus nola Harun ti'an, sia nalo ai'oi lulik ida mak ilas karau baka oan. Hotu sia natetu sera tunun baa ai'oi lulik nia. Sia nadahur bele-bele, tan neon di'ak baa ai'oi lulik mak sia nalo nodi liman du'uk.x 42 Naree nunia, Na'i Maromak se'i kotuk baa sia. Sia moos nahuu lo'u baa sa-saa mak iha lale'an, nu'u loro matan, fulan, no fitun. Mais Na'i Maromak nabusik lerek sia. Hahalok nia, tuir saa mak Maromak mako'an sia nakerek kedan hori uluk na'ak,
‘Hoi! Emi, ema Isra'el sia!
Oras emi la'o hasiri fatin fuik sia tinan haat nulu laran,
emi hatetu sera tunun nia
hodi lo'u-sudur baa Ha'u ka, baa see?
43 Emi la lo'u-sudur baa Ha'u!
Emi lo'u-sudur baa emikaan ai'oi lulik.
Emi tama-sai diabu ida naran Molok uman lulik.
Emi lo'u-sudur baa fitun diabu ida naran Refan.
Emi lo'u-sudur baa buat mak emi halo hodi liman du'uk!
Tan nunia, Ha'u atu ksoe lakon emi baa Babel sorin balu baa.’”y
Stefanus dale nosi lia Uma Hamulak
44 Hotu Stefanus dale natutan tenik na'ak, “Baa oras nia, Na'i Maromak natudu baa Bei Musa uma hamulak ida ilas. Hotu Bei Musa sia nariik Batane Hamulakz ida tuir ilas nia. Batane nia, sia nalo nosi tais no kulit. Itakaan ema Isra'el sia mai namulak baa Na'i Maromak iha batane nia. Kalo sia lori nosi fatin ida baa fatin ida, sia sobu, hotu loi nodi baa nariik nikar iha fatin foun nia.a
45 Nosi ikus, Yosua sia natuda no ema rai Kana'an, to'o Na'i Maromak te'ur sai ema Kana'an sia. Hotu Na'i Maromak fa'e rai nia, foo baa itakaan bei uluk sia. Baa oras bei uluk sia tama baa nadau nola rai nia, sia moos loi nodi Batane nia. Batane nia nariik nafati iha nia, da-dau to'o Na'i Daud kaer ukun.b 46 Na'i Daud nalo Na'i Maromak neon di'ak. Na'i Maromak moos natuun matak-malirin baa nia. Na'i Daud namulak baa Maromak mak uluk Bei Yakob lo'u-sudur baa. Na'i Daud nusu nebee nia mak nariik Uma Hamulak bodik Na'i Maromak.c 47 Mais Na'i Maromak la nakara nunia. Nosi ikus, Na'i Daud oan Salomo mak nariik Uma Hamulak nia.d
48 Masik nariik Uma Hamulak bodik Na'i Maromak moos, ita hatene Na'i Maromak la nein iha uma mak ema raiklaran nalo. Tan uluk Maromak mako'an ida nakerek nela ti'an na'ak,
49 ‘Lale'an nia, Ha'ukaan tuur fatik.
Raiklaran nia, Ha'ukaan ain leut.
Emi hanoin emi bele hariik uma ida mak fatan bodik Ha'u kein ka?
50 La bele! Tan lale'an no raiklaran sasoin hotu-hotu, Ha'u mak kase'i!’”e
Stefanus tula lia baa ema boot sia na'ak, sia mak no'o Na'i Maromak Eman Moon
51 Hotu Stefanus de'an ema boot sia iha moon-metan na'ak, “Etuk oin, emi ne'e ulun fatuk! Emi nu'u ema mak la natene Maromak no ema mak la no'uk rona baa Nia. Emi sakar Na'i Maromak, hanesan emikaan bei uluk sia! Oras ne'e, emi sei hakara sakar tenik Niakaan Kmalar Lulik ka?f 52 Emikaan bei uluk sia nasusar bei-beik Maromak mako'an sia. Emi katak kokon mako'an see mak sia la nasusar. La noo! Uluk, sia katak bei-beik na'ak, Na'i Maromak atu solok Niakaan Ema Moon mai. Mais emikaan bei uluk sia no'o mako'an nia sia. To'o baa oras ne'e moos, emi fa'an Ema Moon nia, hotu ho'o Nia baa ai karuus. 53 Emi simu Na'i Maromak Ukun-badu mak Niakaan makbukar lale'an foo baa itakaan bei uluk sia, mais emi la halo tuir.”
Ema nitak no'o Stefanus nodi fatuk
54 Rona nola Stefanus lia fuan nia sia, ema iha moon-metan nia natene Stefanus tula sala baa sia. Sia laran moras to'o ruun ne'an.
55 Baa oras nia moos, Maromak Kmalar Lulik babilan Stefanus. Nia tanaat baa lale'an, naree Na'i Maromak ahar maksinak. Nia moos naree Yesus nariik iha Na'i Maromak sorin kwana, iha fatin kneter kaliuk. 56 Hotu nia dale na'ak, “Nune'e, ama sia. Ha'u karee lale'an nakloke. Ema Raiklaran Isin no'i nariik iha fatin kneter kaliuk iha Na'i Maromak sorin kwana.”
57 Rona nola nunia, ema mak leno lia nia sia taka tilun nodi nakanas Stefanus nebee taka ibun. Sia moos naksoit bele-bele, baa sira lisuk nia. 58 Hotu, sia dada sarat nia baa kota luan. Ema saksiin sia mak ohin dale tolek nia, kolu siakaan faru, nakaer baa mane nurak ida mak sasu'at teen, naran Saulus. Hotu, sia baa nitak lisuk Stefanus nodi fatuk.