Yesus eman sia boi nola ema na'in hitu, nebee naliku tu'an klosan sia
6
Baa oras nia, Yesus eman sia hetak wa'in. Mais kleu-leur sia moris la kona malu. Sia balu, ema Yahudi mak dale nodi lia Aram. Balu tenik moos ema Yahudi, mais sia dale nodi lia Yunani. Klibur mak dale lia Yunani la nakara klibur mak dale lia Aram. Klibur lia Yunani tula sala baa klibur lia Aram na'ak, “Emi keta fihir oin! Sura emi fa'e haan, amikaan feto faluk sia la netan fafa'ek.”2 Tan lia nia, Kristus klosan na'in sanulu resin rua nia bolu libur Yesus eman sia hotu-hotu. Hotu sia katak na'ak, “Mamaluk sia! Kalo ami mak babilan emikaan haa-hemun, nia moos bele. Mais la fatan, tan kalo ami mak babilan, ami la hoo leet hanorin Na'i Maromak Manfatin ona. 3 Tan baa nia, ami haneo nune'e. Di'ak liu, emi boi hola ema na'in hitu nosi emi. Buka ema mak naran di'ak, no ema mak bele moris di'a-di'ak no ema wa'in. Kmalar Lulik moos musti babilan niakaan moris. Kalo emi boi hola ema oin nunia ti'an, ami foti sia nebee babilan lia haa-hemun bodik emi. 4 Hodi nunia, ami ho leet atu hamulak no hanorin Na'i Maromak Manfatin.”
5 Rona nola klosan sia dale nunia, ema lear moos simu. Hotu sia boi nola katuas na'in hitu. Siakaan naran mak ne'e:
Stefanus (Nia ne'e fiar Yesus tebe-tebes. Kmalar Lulik moos babilan niakaan moris),
Filipus,
Prokorus,
Nikanor,
Timon,
Parmenas,
no Nikolaus (Nia ne'e nosi kota Antiokia. Nia lahoos ema Yahudi isin, mais uluk nia tuir ti'an ukun-badu Yahudi.).
6 Boi hotu ti'an, sia nala'o katuas na'in hitu nia baa Kristus klosan sia. Klosan sia moos rai liman baa, nodi namulak foti sia nalo baa ema mak babilan haa-hemun, nebee ema hotu-hotu netan fafa'ek manesak.
7 Hodi nunia, Na'i Maromak Manfatin keke lema rai. Ema mak tuir Yesus hetak wa'in iha kota Yerusalem. Na'ilulik ulun sia moos, wa'in fiar baa Yesus no moris tuir Niakaan Moris Dalan.
Ema kohi nola Stefanus
8 Nunia hotu, Na'i Maromak natudu laran di'ak baa Stefanus. Nia moos natuun beran baa nia atu nalo tadak blaar, nebee ema wa'in bele naree nodi matan du'uk. 9 Baa oras nia, noo ema Yahudi na'in hira iha Yerusalem mak mai nosi rai dook sia. Sia mai nosi kota Kirene, kota Aleksandria, rai Kalikia no rai Asia. Uluk, sia ne'e ema seluk atan, mais nosi ikus sia sai ti'an. Hotu, sia ida-idak lori baa kota Yerusalem. Iha nia, sia nariik uma hamulak du'uk, hotu sia nanaran na'ak ‘Uma Libertini’ (lia isin na'ak ‘Uma Sai Hosi Ata’). Baa oras sia rona Stefanus dale, sia la nakara. Hotu sia mai toe no nia. 10 Mais sia la bele nahonu nia, tan Kmalar Lulik babilan nalo Stefanus dale matenek basuk. 11 Tan la bele, sia buka dalan aat. Sia baa seba nola ema na'in hira, nebee dale tolek na'ak, “Ami rona hodi tilun du'uk ema ne'e dale nahaat Musa no Na'i Maromak!”
12 Sia sasuku ema to'o fukun Yahudi no manorik ukun sia moos krakat. Hotu sia baa kohi nola Stefanus, dada nodi nia baa nataa iha moon-metan. 13 Siakaan saksiin kale'uk sia dale matak lia nosi Stefanus na'ak, “Ema ne'e la nanawa dale nahaat lia Uma Hamulak Huun. Nia moos dale nahaat Na'i Maromak Ukun-badu mak Bei Musa natuun baa ita. 14 Tenik, ami rona du'uk ti'an nia dale na'ak, Yesus ema Nasaret nia atu naro'on Uma Hamulak Huun ne'e. Nia moos nakara seluk itakaan adat mak Bei Musa natuun baa ita!”
15 Rona nola saksiin sia dale nunia, ema sia mak tuur iha moon-metan natutuk Stefanus. Sia naree niakaan oin, ilas manesak no Maromak Niakaan makbukar lale'an oin.