Ananias no Safira mate
5
Iha Yesus eman sia, noo mane ida naran Ananias. Feen naran Safira. Sia rua fa'an siakaan rai rohan ida. 2 Mais sia rua kabuar lia nebee subar osan balu nosi rai folin nia. Hotu Ananias baa katak Kristus klosan sia na'ak, “Ami foin fa'an amikaan rai rohan ida. Oras ne'e ami hakara latan osan hotu-hotu baa Na'i Maromak.” 3 Mais Petrus de'an na'ak, “Hoi! Ananias! O ne'e liu basuk! Tan saa o subar osan balu? O aat basuk tan o tuir diabu ulun modi maksakar aan tolek Kmalar Lulik! 4 Nune'e! O makara fa'an rai ka lale moos, loos o! Fa'an ti'an, o makara latan mohu osan ka lale moos, loos o! Mais hahalok nune'e, la bele basuk! O bele mabeik ami ema raiklaran, mais la bele mabeik Na'i Maromak nunia!”
5 Petrus dale notu nunia, teki-tekis Ananias nakloti baa rai, mate kedas. Rona lia nia, ema nata'uk tebe-tebes. 6 Hotu mane nurak na'in hira tama baa, falun nola Ananias maten, nodi baa nakoi.
7 Kre'is tuku tolu liu, Ananias feen moos tama mai. Mais nia la natene lia nia. 8 Petrus moos nusu nia na'ak, “Nunabee, ina? Ina sia fa'an rai, hotu folin nune'e ka?”
Nia moos nataa na'ak, “Tebes, Ama! Folin nunia tebes!”
9 Hotu Petrus de'an nia na'ak, “Tan saa emi rua o la'en kabuar lia atu koko Kmalar Lulik? Maree! Ema foin nodi o la'en baa nakoi. Oras ne'e, sia mai nikar ti'an. La oras tenik, sia natiu nodi okaan maten baa nakoi iha o la'en sorin.”
10 Petrus sei dale, teki-tekis feto nia nakloti, mate kedas. Mane nurak sia moos tama nikar baa, naree feto nia mate ti'an. Hotu, sia natiu nola niakaan maten, nodi baa nakoi iha la'en sorin.
11 Rona lia nia, Yesus eman sia nata'uk. Ema seluk mak rona lia Ananias no Safira moos, nata'uk hotu.
Kristus klosan sia nadi'ak nola ema wa'in
12 Baa oras nia, Kristus klosan sia nalo tadak blaar iha ema lear oin. Yesus eman sia neon ida, laran ida naklibur bei-beik iha Uma Talobon Na'i Salomo iha Uma Hamulak Huun lalawar. 13 Masik ema wa'in nakneter Yesus eman sia moos, ema mak la fiar Yesus dauk, la no'uk namutuk no sia.
14 Mais Yesus eman sia, hetak kleur, hetak wa'in. Feto moos noo, mane moos noo. 15 Baa oras nia, ema nodi ema moras mai, natoba baa biti, rai baa dalan tehen. Sia naneo na'ak, “Kalo Petrus no Yohanis la'o tuir ne'e, masik ema moras kona siakaan lalatak dei moos, sia bele di'ak.” 16 Baa oras nia, ema lolok mai nosi leo-leo mak kre'is kota Yerusalem. Sia mai nodi siakaan ema moras. Hotu Kristus klosan sia nadi'ak nola sia hotu-hotu. Sia moos mai nodi siakaan ema mak diabu tekar. Hotu klosan sia moos te'ur sai diabu nia sia.
Kristus klosan sia netan susar oi-oik
17 Baa oras nia, Yesus eman sia hetak wa'in tu'an. Naree nunia, na'ilulik ulun boot no niakaan mamaluk sia nosi partee Saduki, hirus tebe-tebes, 18 to'o sia kohi nola Kristus klosan sia, natama baa bui.a
19 Mais baa kalan nia, Maromak Niakaan makbukar lale'an ida mai iha bui nia, hotu loke bui odamatan. Nia nala'o sai sia nodi dale na'ak, 20 “Oras ne'e, baa kedan Uma Hamulak Huun. Katak baa ema iha nebaa sia, nebee tuir Na'i Maromak Moris Dalan foun.”
21 Awan seisawan oras sei nakukun, sia moos nala'ok kedan tuir makbukar lale'an harukan nia. Sia tama baa Uma Hamulak Huun, hotu nanorin ema.
La kleur falik, ulun boot no niakaan ema sia libur malu bele-bele no ema boot nosi rai Isra'el tomak. Sia atu leno lia nosi Kristus klosan sia. Libur malu iha moon-metan ti'an, sia naruka ema baa nola Petrus sia nosi bui.
22 Mais oras ema to'o bui baa, Petrus sia la iha ti'an. Hotu, sia baa nasa'e lia baa ema boot sia iha moon-metan na'ak, 23 “Ama boot sia, keta krakat. Oras ami to'o bui baa, ami haree bui odamatan hotu-hotu sei kusa mate! Ema makdaka sia moos nariik iha nia! Mais baa oras sia loke odamatan, hotu ami tama baa, ema ida moos la noo!”
24 Rona nola nunia, na'ilulik ulun sia no makdaka ulun nosi Uma Hamulak Huun, neon lakon to'o benar karin.
25 La kleur, ema ida mai nasa'e lia tenik na'ak, “Ama sia! Ema mak emi hatama baa bui nia, sia no'i nanorin ema iha Uma Hamaluk Huun nebaa!”
26 Rona nola nunia, makdaka ulun nia bolu nola niakaan sasi'an, nebee baa kohi nola nikar Petrus no niakaan mamaluk sia. Mais sasi'an sia nata'uk, tan ema wa'in sei rona Petrus dale. Sia naneo na'ak, keta to'o ema wa'in nia krakat, hotu nalatu sia nodi fatuk. Tan baa nia, oras sia baa kohi nikar Petrus sia, sia la kohi nodi maka'as.
27 Kohi nola ti'an, sia nodi Petrus sia baa moon-metan. Hotu na'ilulik ulun boot de'an sia na'ak, 28 “Ami hakahik emi ti'an nebee keta hanorin lia nosi ema mak nakara nalo moris dalan foun nia! Mais emi ulun fatuk! Emi la halo tuir amikaan ukun, mais halo tuir emikaan hakara dei! Emi baa hasiri kota Yerusalem ne'e, hodi hanorin tokar lauk! Emi moos tula sala baa ami ha'ak, ami mak haruka ema no'o Yesus.”b
29 Rona na'ilulik ulun boot dale nunia, Petrus nariik dadi klosan hotu-hotu ibun-nanaan. Nia katak na'ak,
“Ama sia! Kalo ema raiklaran ukun sakar Na'i Maromak ukun, ami la tuir. Ami tuir Na'i Maromak ukun dei! 30 Ema mak loke itakaan moris dalan foun nia, ne'e mak Yesus! Nia mak emi hedi ho'o baa ai karuus. Mais Na'i Maromak mak itakaan bei uluk sia lo'u-sudur baa, nalo Nia moris nikar nosi mate!
31 Hotu Na'i Maromak foti Nia nalo baa Liman Kwana. Oras ne'e Nia kaer beran manesak no na'in boot. Nia loke dalan nebee ema bele kore aan nosi sala. Nia nakara foo dalan baa ita ema Isra'el ne'e, nebee soe lakon itakaan salan. Hodi nunia, Na'i Maromak laran bele malirin, to'o kasu itakaan salan. 32 Ami dale nune'e, tan ami haree hodi matan du'uk Yesus mate, hotu moris nikar. Maromak Kmalar Lulik moos katak lia ne'e baa ema mak tuir Yesus dalan moris.”
33 Rona Petrus dale nunia, ema hotu-hotu mak iha moon-metan nia, krakat tebe-tebes, to'o atu no'o Kristus klosan sia. 34 Mais iha nia moos noo ema ida, naran Gamaliel. Ema wa'in nakneter nia, tan nia manorik ukun mak matenek ida nosi partee Farisi. Ema nakara no'o Petrus sia, mais Gamaliel nariik naruka ema nasai heik sia. 35 Sai ti'an, Gamaliel dale baa ulun nia sia na'ak,
“Mamaluk sia! Ita musti sintidu! Ita keta halobak aan halo aat baa ema ne'e sia. Ita musti hanoin naruk! 36 Emi sei hanoin ka lale, ema mak naran Teudas? Nia mate kleur ti'an, mais oras sei moris, nia naksa'ek aan na'ak, nia ema boot. To'o ema tama atus haat tuir nia. Nosi ikus, ema no'o nia, hotu niakaan maktuir sia nalai keen karin. Lakon to'o oras ne'e, la mosu tenik.
37 Emi musti hanoin lia ida tenik. Oras ukunrai sura ema fuan iha rai ne'e, noo ema ida naran Yudas nosi rai Galilea. Ema wa'in moos tuir nia. Mais ema moos no'o nia. Hotu niakaan maktuir sia moos nalai keen karin, to'o lakon.
38 Dadi mamaluk sia, ha'u kanoin nune'e: lalika ho'o sia. Habusik baa! Tan kalo siakaan hanorin nia mai nosi ema raiklaran, nanis la kleur mohu. 39 Mais kalo siakaan hanorin mai tebes nosi Na'i Maromak, emi la bele hahonu sia. Sintidu! Keta to'o emi du'uk mak sakar Na'i Maromak.”
Rona nola nunia, sia hotu-hotu simu Gamaliel lia tate'an nia. 40 Sia natama nikar Kristus klosan sia mai, hotu sia naruka ema ta'e naboba sia. Sia moos nakahik nebee keta temi Yesus naran ona. Hotu, sia nabusik sai sia.
41 Kristus klosan sia moos sai nela moon-metan nia. Masik sia netan naran aat tan tuir Yesus moos, sia neon di'ak, tan Na'i Maromak nafoli sia bele netan susar nunia. 42 Sura loron, sia nanorin na'ak, “Ema mak Na'i Maromak natudu kedan hori uluk nia, Ema nia mak Yesus.” Sia katak nima-nimak lia nia sura uma no iha Uma Hamulak Huun.