Maromak Kmalar Lulik tuun baa ema
2
1-2 Kona besik baa ema Yahudi loron di'ak mak ‘Loron Pentakosta’,a Yesus eman sia hotu-hotu naklibur iha uma ida. Teki-tekis sia rona lia maliak ida mai nosi lale'an hanesan dadurus.b Lia maliak nia boot resik, to'o ema iha nia la bele rona malu tenik. 3 Sia moos naree nu'u ha'i lakan nakfa'ek aan, rani baa ida-idak ulun. 4 Maromak Kmalar Lulik natiha baa sia, to'o nalo sia dale nodi ema seluk lian, tuir saa mak Kmalar Lulik foo baa sia. 5 Baa oras nia, noo ema Yahudi wa'in iha Yerusalem mak mai nosi rai-rai. Sia moos nakara Na'i Maromak. 6 Baa oras sia rona nola lia maliak nia, sia mai kabuun malu iha fatin nia. Sia ida-idak rona siakaan lia du'uk sai nosi Yesus eman sia ibun, to'o sia blaar karin. 7 Sia dale na'ak, “Ema mak dale ne'e sia, ema Galilea! 8 Mais ita rona sia dale nodi ita ida-idak lian! Tan saa bele nunia? 9 Ita ne'e mai hosi rai Partia, Media, Elam, Mesopotamia, Yudea, Kapadokia, Pontus, Asia, 10 Frigia, Pamfilia, Mesir, no nosi Libia kre'is baa kota Kirene. Ita balu moos hosi kota Roma. 11 Balu tenik mai nosi rai Kreta no rai Arab. Ita balu ema Yahudi, balu ema lahoos Yahudi mak tama tuir hanorin Yahudi ti'an. Mais ita hotu-hotu bele rona ema ne'e sia dale nodi itakaan lian ida-idak. Sia dale lia kasalak basuk mak Na'i Maromak nalo ti'an. Hoi! Ita blaar tebes!”
12 Sia moos nusu baa malu na'ak, “Tan saa bele dadi nune'e? Lia ne'e na'ak saa?”
13 Mais ema seluk sia naleuk na'ak, “Hoi! Lalika titu sia! Ema nia sia lanu todan!”
Petrus dale baa ema lear
14 Baa oras nia, Petrus no Kristus klosan na'in sanulu resin ida seluk iha nia. Oras sia naree ema kabuun malu iha nia, Petrus soruk baa oin, hotu dale maka'as na'ak, “Mamaluk sia! Emi mak ema Yahudi no emi mak hein iha kota Yerusalem ne'e, ta'an tilun rona di'a-di'ak ha'ukaan dalen ne'e, tan ha'u atu katak lia boot ida baa emi. 15 Keta haneo ami ne'e lanu! La bele nunia, tan oras ne'e, foin tuku siwi. Ema la nemu tua baa seisawan nune'e! 16 Emi rona ema ne'e sia dale nodi emi ida-idak lian. Tuir loos, Maromak katak kedan ti'an lia ne'e nodi mako'an Yoel na'ak:
17 ‘Kalo raiklaran kre'is falu fila,
Ha'u atu katuun Ha'ukaan Kmalar Lulik baa ema hotu-hotu.
Emikaan oan feto no oan mane sia,
Ha'u kalo baa Ha'ukaan mako'an.
Emikaan ema nurak sia,
bele naree saa mak Ha'u katudu baa sia.
Emikaan matas sia,
bele me'i nola saa mak Ha'u katudu baa sia.
18 Kalo raiklaran kre'is falu fila,
Ha'u katuun Ha'ukaan Kmalar Lulik baa Ha'ukaan atan sia hotu-hotu.
Ha'u katuun baa feto,
Ha'u moos katuun baa mane.
Sia atu dale saa mak Ha'u katak baa sia.
19-21 Ha'ukaan Loron Kabaas sei la to'o dauk,
Ha'u kalo kedan tadak blaar iha lale'an.
Tadak blaar hanesan loro matan nakukun,
no fulan mean laak hanesan raa.
Ha'u moos kalo lia kasalak basuk iha raiklaran.
Lia hanesan raa no ha'i dubun fu'ak sa'e baa leten.
Mais baa oras nia moos,
ema mak nahii nusu tulun baa Ha'u,
Ha'u nanis sori nia.’”c
Lia nia mak Maromak katak kedan hori uluk nodi mako'an Yoel.
22 Mamaluk Isra'el sia! Ta'an tilun rona di'a-di'ak ha'ukaan dalen ne'e. Yesus ema Nasaret nia, Nia mak Na'i Maromak boi kedan hori uluk atu solok mai sori ita. Tebes! Ami na'in du'uk haree Nia nalo lia kasalak basuk no nalo tadak blaar nodi Maromak beran. Emi moos haree, tan Nia moos nalo tadak blaar iha emikaan oin. 23 Na'i Maromak solok Nia nunia, mais emi ho'o Nia hodi hamaus hola ema aat, nebee sia nedi Nia baa ai karuus. Tuir loos, Na'i Maromak natene ti'an lia nia sia hotu-hotu, tan Nia nakotu kedan nunia hori uluk.d 24 Tebes! Emi ne'e ho'o Yesus to'o mate, mais Na'i Maromak nalo Nia moris nikar, tan Nia la nakara Yesus nafati iha maten fatin.e
25 Na'i Daud nakerek kedan hori uluk lia nosi Yesus nune'e:
‘Ha'u katene Maromak no ha'u nima-nimak.
La noo saa ida moos mak bele naloti ha'u,
tan Maromak no ha'u nima-nimak.
26 Tan baa nia, ha'u neon boot.
Ha'u moos tonu-kaboot Maromak.
Ha'u kein Nia kodi neon metin,
27 tan baa oras ha'u kmate, Nia la nabusik ha'ukaan kmalar nafati iha ema maten fatin.
Nia la nabusik Niakaan Ema Moon maten dois iha rate laran.
28 Nia natudu dalan moris loos baa ha'u.
Ha'ukaan neon nanis boot lo-loos,
tan Nia namutuk no ha'u.’f
Na'i Daud mak nakerek nela lia nia ti'an.
29 Mamaluk sia! Foo leet baa ha'u kalore lia nia. Bei Daud dale nunia, mais ita hatene nia la dale nosi niakaan maten du'uk, tan nia mate, hotu ema nakoi nia ti'an. Niakaan rate moos sei iha itakaan leet to'o oras ne'e. 30 Na'i Daud nia, Maromak mako'an. Baa oras nia dale nunia, nia natene na'ak Na'i Maromak narai aan ti'an nodi nameno na'ak, Nia atu boi Na'i Daud husar-binan ida atu kaer ukun.g 31 Baa oras nia, Na'i Daud natene kedan lia mak sei dook basuk. Nia dale nosi Ema mak Na'i Maromak boi kedan hori uluk. Ema nia atu mate, mais Nia moos atu moris nikar. Hodi nunia, Nia la nafati iha ema maten fatin. Niakaan maten moos la dois.
32 Rona! Ema mak Na'i Daud dale ti'an nia, ne'e mak Yesus! Nia mate, mais Na'i Maromak nalo Nia moris nikar. Ami ne'e haree du'uk Nia moris nikar ti'an. 33 Oras ne'e Niakaan Ama Maromak foti Nia kaer beran mak aas kaliuk. Nia nabesi aan iha Na'i Maromak sorin kwana iha fatin mak Na'i Maromak nadi'a kedan ti'an bodik Nia. Niakaan Ama moos foo Kmalar Lulik baa Nia, tuir saa mak Nia nameno kedan hori uluk. Oras ne'e Niakaan Kmalar Lulik nia moos tuun baa ami. Lia mak emi rona no haree ohin nia, ne'e mak Na'i Maromak foo Niakaan Kmalar Lulik.
34 Tuir loos, Na'i Daud la sa'e baa lale'an, mais nia dale nosi lia Yesus sa'e baa lale'an. Lia nia nune'e:
‘Na'i Maromak katak baa ha'ukaan Na'in na'ak,
“Mai tuur baa fatin hakneter iha Ha'ukaan sorin kwana ne'e.
35 Ha'u atu kalo Okaan funu sia lo'u baa O.’”h
36 Tan lia nia, ema Isra'el hotu-hotu musti natene tebes na'ak, Ema mak emi hedi ho'o baa ai karuus nia, Nia mak Maromak boi ti'an dadi baa itakaan Na'in. Maromak moos foti-nahaas Nia ti'an.”
37 Rona Petrus dale nunia, ema nia sia neon monu. Sia moos nusu baa Petrus no klosan seluk sia na'ak, “Mau sia! Kalo nunia, ami musti halo saa?”
38 Petrus nataa na'ak, “Emi ida-idak musti soe lakon emikaan salan, hotu husu hetan sarani, nebee dadi tadak na'ak, emi fila tuir Yesus Kristus no Na'i Maromak kasu mohu emikaan salan ti'an. Nia moos atu foo Niakaan Kmalar Lulik baa emi.
39 Tebes. Na'i Maromak nameno ti'an atu foo Kmalar Lulik baa Niakaan ema hotu-hotu. Hodi nunia, Nia foo baa emi ho emikaan husar-binan sia. Nia moos foo baa ema seluk mak sei dook.”
40 Petrus moos dale natutan na'ak, “Oras ne'e, ema lear la'o sees ti'an nosi dalan loos. Tan lia nia, emi musti sintidu, keta tuir ema aat dalan. Musti tuir Na'i Maromak dalan. Hodi nunia, emi bele moris nima-nimak ho Nia.”
41 Rona nola nunia, ema lear nia moos simu Petrus dalen. Sia nakara tuir Yesus dalan moris nodi simu sarani. Sura ema nia sia hotu-hotu, ema rihun tolu. 42 Sia hotu-hotu di'a-di'ak malu no Yesus eman seluk sia. Sura loron, sia madinas rona hanorin nosi Kristus klosan sia. Sia hotu-hotu namulak namutuk, naa-nemu namutuk.
Yesus eman moris lala'ok
43 Baa oras nia, Kristus klosan sia nalo tadak blaar to'o ema blaar tebes. 44 Ema mak fiar baa Yesus, sia libur malu moris neon ida, laran ida. To'o siakaan sa-saa hotu-hotu, sia tau namutuk.i 45 Nosi sia noo mak fa'an siakaan sasoin, hotu fa'e osan baa mamaluk mak fiar sia mak moris sei la to'o. 46 Sura loron sia libur malu iha Uma Hamulak Huun. Sia naa-nemu namutuk nodi neon di'ak nosi uma ida baa uma ida. Sia moos tulun malu. La noo ida mak toos kamoruk. 47 Loron-kalan sia tonu-naboot Na'i Maromak. Ema hotu-hotu moos nakara basuk sia. Sura loron Na'i Maromak sori ema. Hodi nunia, Yesus eman sia hetak tu'an, hetak wa'in.