Petrus nadi'ak nola ema ai asak ida
3
Baa loron ida, oras tuku tolu loro malirin, Petrus no Yohanis baa Uma Hamulak Huun atu namulak namutuk no ema seluk sia. 2 Sia atu tama tuir odamatan nanokar ida, naran ‘Odamatan Kabaas’. Iha nia, sia naree mane ida mak ai asak moris nodi. Sura loron ema nasaan nodi baa fatin nia, nebee nia bele nadidu nosi ema mak tama baa Uma Hamulak Huun. 3 Naree Petrus no Yohanis tama, nia lolo liman nodi nusu na'ak, “Ama sia! Hadomi ha'u lai. Foo saa ida baa ha'u lai.” 4 Sia rua mana di'a-di'ak nia, hotu Petrus dale na'ak, “Mau! Titu mai lai!”
5 Ema nia moos foti oin, titu baa sia rua. Nia naneo na'ak, “Sia rua ne'e nanis atu foo sa-saa baa ha'u.”
6 Mais Petrus dale na'ak, “Mau! Ha'u la koo osan. Mais saa mak ha'u koo, atu kfoo baa mau. Rona! Kodi Yesus Kristus ema Nasaret nia beran, karuka o mariik, la'o ona!”
7 Hotu Petrus kaer nola ai asak nia liman kwana, foti nariik nia. Baa oras nia moos, ain di'ak kedas. 8 Teki-tekis nia ni'it aan, nariik naksoit. Hotu nia la'o tuir Petrus no Yohanis baa Uma Hamulak lalawar. Nia la'o so-soit nodi tonu-naboot Na'i Maromak. 9 Ema hotu-hotu iha nia naree nia la'o baa-mai nodi tonu-naboot Na'i Maromak.
10 Mais oras sia natene nola na'ak nia, ema ai asak mak sura loron tuur nadidu iha Odamatan Kabaas, sia blaar karin. Hotu sia dale na'ak, “Nansaa bele nune'e?”
Petrus dale iha Uma Hamulak Huun
11 Hotu ema ai asak mak foin di'ak nia la'o nodi kaer Petrus no Yohanis to'o uma talobon ida iha Uma Hamulak lalawar. Uma talobon nia naran ‘Uma Talobon Na'i Salomo’. Ema lear naklibur ti'an iha nia. Naree nola Petrus sia mai, sia blaar karin. 12 Hotu Petrus katak baa sia na'ak, “Hoi! Ema Isra'el sia! Emi blaar baa saa? Tan saa emi mana ami nunia? Emi haneo ema ne'e bele la'o tan amikaan matenek ka? Amikaan madinas tuir Na'i Maromak ka? Lale! 13 Ha'u katak kalore nune'e: Itakaan bei uluk sia mak Bei Abraham, Bei Isak no Bei Yakob, sia hotu-hotu lo'u-sudur baa Na'i Maromak. Oras ne'e, Na'i Maromak foti-nahaas Niakaan Ema mak Nia boi kedan ti'an. Ema nia, mak Yesus. Nia, mak emi soe hodi latan baa Gubernur Pilatus hori hirak nia. Tuir loos, gubernur nakara nabusik Nia. Mais emi sakar nebee keta nabusik.a 14 Hodi nunia, emi soe Yesus, mak Ema Moon no Laran Di'ak nia. Aat liu tenik, emi sasu'at gubernur nebee nabusik fila ema aat ida baa emi.b 15 Hodi nunia, emi ho'o Yesus, mak itakaan Moris Huun. Nia mate ti'an, mais Na'i Maromak nalo Nia moris nikar. Ami haree lia nia hodi matan du'uk.
16 Ema ai asak ne'e di'ak ti'an, lahoos tan amikaan beran. Lale! Nia di'ak ti'an, tan Yesus beran. Tan nia fiar baa Yesus, Yesus nadi'ak nola nia iha emikaan oin.
17 Mamaluk sia! Ha'u katene emi ho emikaan ulun sia halo aat baa Yesus ti'an, mais emi la hatene hahalok nia folin. 18 Na'i Maromak katak kedan hori uluk nodi mako'an sia na'ak, Ema mak Nia boi nola atu solok mai, Nia musti natiu susar. Lia nia dadi ti'an. 19 Tan baa nia, emi musti fila hikar baa Na'i Maromak nebee Nia kasu emikaan salan. 20 Hodi nunia emikaan neon biit nikar. Nosi ikus, Na'i Maromak solok nikar Yesus baa emi, tan Nia, Kristus mak Na'i Maromak boi kedan ti'an hori uluk. 21 Mais oras ne'e, Yesus musti nein iha lale'an, to'o oras Na'i Maromak nalo foun lia hotu-hotu, tuir saa mak Niakaan mako'an sia dale kedan hori uluk.
22 Uluk Bei Musa dale baa itakaan bei uluk sia na'ak,
‘Emikaan Na'in, mak Na'i Maromak. Nosi ikus, Nia atu solok Ema ida, dadi mako'an bodik emi, hanesan ha'u ne'e. Emi musti ta'an tilun, nebee rona lia hotu-hotu mak ema nia katak baa emi.c 23 Ema mak la no'uk rona, sia dodok no kona lelen nosi Na'i Maromak.’d
24 Lahoos Bei Musa mesan mak katak nunia. Mais Maromak mako'an seluk sia nu'u Bei Samuel moos katak kedan lia mak oras ne'e ita haree hodi matan. 25 Tenik, Na'i Maromak namate menon no Bei Abraham na'ak,
‘Nosi okaan husar-binan, ema klubun hotu-hotu iha raiklaran netan matak-malirin.’e