16
Ha'u katak lia ne'e sia baa emi, nebee emi keta soe Ha'ukaan hanorin. 2 Nosi ikus, Yahudi ulun sia atu lelen emi nosi siakaan uma hamulak. Lahoos nunia dei, tan noo oras seluk ida, ema atu buka no'o emi, tan sia naneo na'ak, hahalok nia bodik Na'i Maromak. 3 Sia nalo nunia, tan la natene Ha'u ko Ha'ukaan Ama. 4 Ha'u katak kedan lia ne'e sia baa emi, nebee nosi ikus, kalo lia ne'e sia dadi ti'an, emi bele hanoin ha'ak, Ha'u katak uluk ti'an. Uluk aan, Ha'u la katak dauk, tan Ha'u ksei kamutuk ko emi. Mais oras ne'e Ha'u katak ti'an ka'ak, Ha'u atu kbaa ona.”Kmalar Lulik Niakaan serwisu
5 Hotu, Yesus nanorin tu'an tenik na'ak, “Ha'u atu kfila baa Nia mak solok Ha'u. Mais, la noo ida nosi emi nusu baa Ha'u na'ak, ‘Ama Boot atu baa nabee?’ 6 Ha'ukaan dalen ne'e, nasusar emi tebes. 7 Mais rona mai, tan Ha'ukaan dalen ne'e tebes no loos. Di'ak liu, Ha'u kbaa. Tan kalo lale, Malikuk nia la mai emi. Ha'u kmusti baa, nebee Ha'u ksolok Nia mai emi.
8 Kalo Nia mai ti'an, Nia atu nalore ema raiklaran salan. Nia moos nalore dalan moris mak loos. Nia nalore tenik, baa oras rai falu fila, Na'i Maromak taa ukun baa ema raiklaran. 9 Malikuk nia atu natudu na'ak, ema raiklaran sala tan sia la fiar baa Ha'u. 10 Hotu, Nia natudu dalan moris mak loos baa ema. Nia atu nalore lia nia sia, tan Ha'u atu kfila kikar baa Ha'ukaan Ama. Emi la haree Ha'u ona, mais Malikuk nia mak mai seluk Ha'u. 11 Hotu, Nia moos natudu na'ak, Na'i Maromak atu taa ukun baa ema mak nalo sala, tan Nia taa ukun ti'an baa diabu ulun, mak ukun raiklaran ne'e.
12 Noo lia wa'in mak Ha'u kakara katak baa emi. Mais oras ne'e, emi sei la kohi dauk. 13 Kalo Kmalar Lulik mai ti'an, Nia nanorin emi nebee bele hatene lia loos hotu-hotu. Nia la dale aan du'uk, mais Nia katak saa mak Nia rona nola nosi Ha'ukaan Ama. Nia moos atu katak baa emi, saa mak atu dadi. 14 Nia foti-nahaas Ha'u, tan Nia atu dale nato'o baa emi, lia loos hotu-hotu nosi Ha'u. 15 Lia hotu-hotu mak Ha'ukaan Ama nanoin, lia nia sia Ha'u moos kanoin. Etuk, ohin Ha'u ka'ak, Maromak Kmalar Lulik atu nato'o baa emi lia loos hotu-hotu nosi Ha'u.”
Yesus katak na'ak, maktuir sia neon susar uluk lai, foin di'ak nikar
16 Hotu, Yesus katak tu'an tenik na'ak, “La kleur ona, emi la haree Ha'u ti'an. Mais la kleur falik, emi moos haree hikar Ha'u.”
17 Rona nola nunia, Yesus Niakaan maktuir sia dale baa malu na'ak, “Tan saa Nia dale na'ak, ‘La kleur ona, emi la haree Ha'u ti'an. Mais la kleur falik, emi moos haree hikar Ha'u.’ Tan saa Nia dale tenik na'ak, ‘Nia atu baa Niakaan Ama’? 18 Nia naneo baa saa, to'o na'ak ‘La kleur ona.’ Dale nia, ita la hatene.”
19 Sia dale baa malu nunia, mais Yesus natene sia nakara nusu lia ida. Hotu, Nia dale na'ak, “Ohin Ha'u ka'ak, ‘La kleur ona, emi la haree Ha'u ti'an. Mais, la kleur falik, emi moos haree hikar Ha'u.’ Emi husu malu nunia ka?
20 Di'ak, kalo emi hakara hatene nunia. Mais rona mai, tan Ha'ukaan dalen ne'e, tebes no loos: emi atu neon susar to'o tanis. Mais ema seluk iha raiklaran ne'e atu neon di'ak. Masik emikaan neon susar nunia moos, atu di'ak nikar. 21 Nudaar feto ida mak noran moras atu nahoris. Nia noran moras uluk lai, mais kalo nahoris ti'an, susar nia lakon kedas. Nia neon boot, tan ema foun ida moris mai ti'an. 22 Emi moos nunia. Oras ne'e, emi tanis hodi neon susar. Mais la kleur, Ha'u kmai karee kikar emi, foin emi neon boot lo-loos. La noo ema ida kois mak bele nadau nola neon boot nia nosi emi.
23 Kalo oras nia to'o ti'an, emi lalika husu sa-saa tenik baa Ha'u. Tebes! Ha'ukaan dalen ne'e tebes no loos. Baa oras nia, emi bele husu du'uk baa Ha'ukaan Ama. Nia nanis foo baa emi, tan emi husu hodi Ha'ukaan naran.a 24 To'o oras ne'e, emi sei la husu dauk sa-saa hodi Ha'ukaan naran. Husu baa dei, nebee emi simu. Hodi nunia, emikaan neon boot lo-loos.”
Yesus natoba nola beran raiklaran hotu-hotu
25 Hotu, Yesus dale tu'an tenik na'ak, “To'o baa oras ne'e, Ha'u ksei kanorin emi kodi lia hatetek. Mais oras ne'e, Ha'u kanorin emi la kodi lia hatetek ona, tan Ha'u atu kdale malorek lia isin kosi Ha'ukaan Ama. 26 Emi moos bele hamulak du'uk baa Ha'ukaan Ama hodi Ha'ukaan naran. Ha'u lalika kamulak bodik emi ona. 27 Ha'ukaan Ama nadomi emi, tan emi hadomi Ha'u. Emi moos fiar ha'ak, Nia mak solok Ha'u. 28 Uluk, Ha'u kla'o kela Ha'ukaan Ama atu kein heik iha raiklaran ne'e. Mais oras ne'e, Ha'u atu kla'o kela raiklaran ne'e, baa kein kikar ko Nia.”
29 Rona nola nunia, Yesus Niakaan maktuir sia katak na'ak, “Tebes. Ama Boot dale malorek, la modi lia hatetek ona! Nunia foin di'ak. 30 Ami fiar ha'ak, Ama Boot natene lia hotu-hotu. Ami lalika husu sa-saa tenik baa Ama ona, tan Ama natene uluk ti'an saa mak ami atu husu. Etuk, ami fiar ha'ak, Ama Boot mai nosi Na'i Maromak.”
31 Hotu, Yesus nusu baa sia na'ak, “Emi fiar tebes baa Ha'u ka lale? 32 Hanoin! La kleur ona, emi hotu-hotu halai keen kari malu. Emi ida-idak halai hela Ha'u, baa hakfunin aan du'uk. Masik nunia moos, Ha'u la kmesan, tan Ha'ukaan Ama namutuk no Ha'u. 33 Ha'u katak ti'an lia ne'e sia baa emi, nebee emikaan neon di'ak no neon manek, tan emi talin aan ho Ha'u. Ema iha raiklaran ne'e atu tonan no nasusar emi. Mais hakbiit emikaan neon, tan Ha'u katoba kola ti'an beran raiklaran ne'e hotu-hotu !”