3 Emi dadi moos ti'an, tan Ha'ukaan hanorin namoos emikaan neon, hanesan to'os na'in namoos ai sorun nodi tesi nabadak. 4 Mais emi musti talin aan bei-beik baa Ha'u. Ha'u moos talin aan ko emi, tan ai sorun mak naksasa nela ai huun, la bele nafua. Hanoin! Kalo emi la talin aan bei-beik baa Ha'u, emikaan moris la bele nasai hahalok di'ak.

5 Ha'u ne'e, mak ai huun. Emi mak ai sorun. Kalo emi talin aan bei-beik baa Ha'u no Ha'u moos talin aan ko emi, ne'e na'ak, emi hanesan ai sorun mak nafua wa'in. Mais kalo emi la talin aan bei-beik baa Ha'u, emikaan moris la bele nasai hahalok di'ak. 6 Ema mak la talin aan baa Ha'u, nia hanesan ai sorun mak la nafua. Ai sorun oin nunia, nanis to'os na'in tesi kotu, nabusik dadi maran, hotu foti soe baa ha'i. 7 Mais kalo emi talin aan bei-beik baa Ha'u no bali di'a-di'ak Ha'ukaan hanorin iha emikaan neon, emi husu saa baa Na'i Maromak, nanis Nia nalo bodik emi.

8 Kalo emikaan moris nasai hahalok di'ak nu'u ai sorun mak nafua wa'in, ne'e na'ak, emi foti-hahaas Na'i Maromak ti'an. Hodi lisan nunia, emi moos hatudu malorek ha'ak, emi Ha'ukaan maktuir.

9 Ha'u kadomi emi, hanesan Ama nadomi Ha'u. Emi musti kre'is bei-beik baa Ha'u, nebee emi bele simu hola Ha'ukaan dadomin. 10 Kalo emi tuir Ha'ukaan ukun hodi moris talin aan baa Ha'u, Ha'u moos katudu Ha'ukaan dadomin baa emi. Lia nia nudaar Ha'u ktuir Ha'ukaan Ama ukun, hotu Nia natudu dadomin baa Ha'u.

11 Ha'u katak kedan lia ne'e sia baa emi, nebee emi bele neon boot, nu'u Ha'u moos neon boot. Tebes. Ha'u kakara nebee emi neon boot lo-loos. 12 Ha'ukaan ukun nune'e: emi musti hadomi malu, hanesan Ha'u moos kadomi emi.^b 13 Kalo ema ida nadi'a aan mate bodik sori belun, ne'e na'ak, nia nadomi tebes belun. La noo dadomin seluk mak maka'as liu dadomin nia. 14 Kalo emi halo tuir bei-beik Ha'ukaan ukun, emi dadi baa Ha'ukaan belun. 15 Ha'u la ktemi emi ka'ak Ha'ukaan ‘ain-liman’ ona, tan ema ain-liman la natene malorek ulun niakaan hakara. Mais Ha'u ktemi emi ka'ak Ha'ukaan ‘belun’, tan Ha'u kdale loke fore baa emi ti'an lia hotu-hotu mak Ha'ukaan Ama nakara no katak ti'an baa Ha'u. 16 Emi la boi Ha'u. Mais Ha'u mak boi emi no foti emi atu moris halo lia di'ak. Dadi, emi musti halo lia di'ak bei-beik, hanesan ai huun nafua di'ak bei-beik. Kalo emi halo nunia, emi husu saa baa Ha'ukaan Ama, nanis Nia nalo bodik emi. 17 Dadi, lia mak Ha'u karuka baa emi, mak ne'e: emi musti hadomi malu.”

18 Hotu, Yesus dale tenik na'ak, “Kalo ema raiklaran hirus emi, keta sarebak, tan sia hirus uluk Ha'u ti'an. 19 Kalo emi moris manesak ho sia, sia nadomi emi. Mais emi la bele moris manesak ho sia, tan Ha'u kboi kola emi ti'an no fa'e salin emi nosi sia. Tan lia nia, sia hirus emi.

20 Keta halu'a lia mak Ha'u katak ti'an baa emi ka'ak, ‘Ema ain-liman la boot liu ulun.’ Kalo ema raiklaran nasusar Ha'u, nanis sia moos nasusar emi. Kalo sia simu Ha'ukaan hanorin, sia moos simu emikaan hanorin.^c 21 Mais sia atu nasusar emi, tan emi talin aan baa Ha'u. Sia atu nalo nunia, tan sia la natene See mak solok Ha'u. 22 Kalo Ha'u la kmai kanorin dalan moris loos baa sia, nanis sia la sala. Mais Ha'u kmai kanorin ti'an baa sia, dadi sia la noo lia krarain tenik atu neli aan na'ak, ‘Ami la sala.’

23 Ema mak hirus Ha'u, nia moos hirus Ha'ukaan Ama. 24 Ha'u kase'i ti'an tadak blaar oi-oik mak ema seluk la bele nalo. Kalo Ha'u la kase'i nunia iha siakaan oin, sia la sala kalo la simu Ha'u. Mais sia du'uk naree ti'an tadak blaar nia sia. Masik nunia moos, sia sei hirus Ha'u no Ha'ukaan Ama iha lale'an. 25 Mais lia ne'e sia hotu-hotu dadi atu nato'o saa mak hakerek ti'an iha Hakerek Moon na'ak, ‘Masik la noo lia tatuur ida kois, sia sei hirus ha'u.’^d

26 Mais keta hata'uk, tan noo Malikuk ida atu mai. Nia, Maromak Kmalar Lulik mak mai nosi Ha'ukaan Ama. Nia atu nanorin emi hanorin loos. Ha'u kbaa ti'an Ha'ukaan Ama, kfoin solok Kmalar Lulik nia mai baa emi. Kalo Nia mai ti'an, Nia atu natebes lia nosi Ha'u. 27 Hotu, emi musti hato'o tenik lia nia baa ema seluk, tan emi mak hamutuk ho Ha'u hori uluk ti'an.