Yesus nadi'ak nola ema delek ida
9
Nunia hotu, Yesus sia foin la'o baa, sia naree ema delek ida mak moris nodi. 2 Naree ema nia, maktuir sia nusu baa Yesus na'ak, “Ama Boot! See mak nalo sala to'o ema ne'e matan delek nunia? Nia du'uk ka, niakaan inan-aman?”3 Yesus nataa na'ak, “Ema delek ne'e la nalo sala, foin matan delek. Niakaan inan-aman moos la nalo sala. Nia moris nodi nunia, nebee ema hotu-hotu bele naree Na'i Maromak nalo lia kabaas baa nia. 4 Baa oras rai sei nakroma, Ha'u kmusti karui aan serwisu bodik Ha'ukaan Maksolok, tan la kleur ti'an, rai nakukun, hotu Ha'u la kbele serwisu ona. 5 Oras Ha'u ksei iha raiklaran, Ha'u hanesan kroman mak naksinak bodik ema hotu-hotu.”a
6 Yesus dale notu nunia, Nia moos taniru kaban baa rai. Hotu Nia natu'u baa rai, kahur kaban no rai, nalo baa ta'u. Hotu Nia kose ta'u nia baa delek matan. 7 Nia moos naruka delek nia na'ak, “Baa fasi oin iha debu Siloam.” (Iha lia Ibrani, Siloam na'ak, ‘solok mai’.) Rona nola Yesus dale nunia, delek nia moos baa. Oras mai nikar, matan moon ti'an!b
8 Hotu, ema nia fila uma. To'o baa, ema uma tehen sia naree nia. Sia blaar, tan sia natene nia delek mak moris nodi nadidu baa ema. Sia nusu baa malu na'ak, “Delek mak loron-loron tuur nadidu nia, mak ne'e ka?”
9 Ema balu na'ak, “Tebes! Ema nia mak ne'e ti'an!”
Mais ema balu seluk na'ak, “Ema ne'e lahoos delek nia. Arumak niakaan ilas nanesa malu no delek nia.”
Rona nola nunia, ema nia katak du'uk baa sia na'ak, “Delek uluk nia, mak ha'u ne'e!”
10 Hotu sia nusu nia na'ak, “Oin nunabee, to'o o matan moon ti'an ne'e?”
11 Nia nataa na'ak, “Nune'e! Ema ida naran Yesus nalo ta'u, hotu kose baa ha'ukaan matan. Hotu Nia naruka ha'u na'ak, ‘Baa fasi oin iha debu Siloam.’ Hotu ha'u kalo tuir. Oras ne'e, ha'ukaan matan moon ti'an!”
12 Hotu sia nusu baa nia na'ak, “Ema nia iha nabee?”
Nia nataa na'ak, “Matene!”
Ema Farisi leno ema mak uluk matan delek nia
13-14 Loron mak Yesus nalo ta'u nodi nadi'ak nola ema delek nia matan, loron nia kona baa ema Yahudi siakaan loron hanawa serwisu. Tan baa nia, ema nodi ema mak ohin delek nia baa nataa ema partee Farisi sia. 15 To'o baa, ema Farisi nia sia nusu baa nia na'ak, “O ma'ak lai! Tan saa o matan bele moon?”
Nia nataa na'ak, “Nune'e, Ama sia. Ema ida kose ta'u baa ha'ukaan matan. Hotu ha'u kfasi oin. Hotu ha'ukaan matan moon kedas.”
16 Ema Farisi balu na'ak, “Ema mak nadi'ak nola o nia, lahoos nosi Na'i Maromak. Ami hatene Nia ti'an, tan Nia nakur itakaan ukun-badu nosi loron hanawa serwisu.”
Ema balu tenik na'ak, “Oin nunabee ema mak nalo sala bele nase'i tadak blaar nunia?” Hodi nunia, ema nia sia toe malu to'o fa'e karin malu.
17 Sia moos nusu tenik baa ema mak ohin delek nia na'ak, “Tuir o, Ema mak namoon okaan matan nia, Niakaan ilas nunabee?”
Nia nataa na'ak, “Tuir ha'u, Ema nia, Maromak mako'an ida.”
18 Yahudi ulun sia la fiar kalo uluk ema nia matan delek. Tan baa nia, sia naruka baa bolu inan-aman mai nataa sia. 19 Inan-aman mai ti'an, ulun sia nusu na'ak, “Ema ne'e, emikaan oan ka? Nia moris mai, matan delek kedas ka? Oin nunabee, matan bele moon?”
20 Inan-aman nataa na'ak, “Nia ne'e, amikaan oan tebes. Nia moris mai, matan delek kedas. 21 Mais ami la hatene, nia nalo oin nunabee to'o oras ne'e matan moon ti'an. See mak namoon matan, ami moos la hatene. Nia, boot ti'an. Husu du'uk baa nia, tan nia bele dale du'uk!” 22 Sia dale nunia, tan sia nata'uk Yahudi ulun sia. Sia natene ulun sia tau mutu lia fuan ti'an na'ak, kalo noo ema mak dale nasai na'ak, Yesus nia, Kristus, ulun sia atu lelen ema nia nosi uma hamulak. 23 Tan lia nia, inan-aman nataa loos dei na'ak, “Nia boot ti'an. Husu du'uk baa nia dei.”
24 Hotu, ulun sia bolu nikar ema mak ohin delek nia. Sia katak na'ak, “Nune'e! O musti dale moon iha Na'i Maromak oin, hodi daka Niakaan naran di'ak. Ami hatene fukur, Yesus nia, ema aat.”
25 Mais ema nia nataa na'ak, “Ama sia keta nawan sa'e, tan ha'u la katene kalo Ema nia, ema aat. Lia mak ha'u katene nune'e: uluk ha'ukaan matan delek, mais oras ne'e ha'ukaan matan moon ti'an.”
26 Sia nusu tenik baa nia na'ak, “Nia nalo saa baa o? Nia namoon okaan matan nunabee?”
27 Nia nataa na'ak, “Hoi! Ohin nia ha'u kdale ti'an, mais emi la ho'uk rona. Tan saa emi haruka ha'u kdale kikar tenik? Arumak, ama sia moos nakara dadi baa Niakaan maktuir ka?”
28 Rona nola nunia, sia tolak nahaat ema nia na'ak, “O dei mak dadi baa Niakaan maktuir ona! Ami ne'e, Bei Musa niakaan maktuir. 29 Ami hatene Na'i Maromak dale no Bei Musa. Mais ami la hatene Ema nia mai nosi kuak nabee.”
30 Ema mak uluk matan delek nia nataa na'ak, “Ha'u kblaar tebes! Emi la hatene Nia mai nosi nabee. Mais tuir loos, Nia mak namoon ha'ukaan matan. 31 Ita hotu-hotu hatene, Na'i Maromak la rona baa ema aat. Mais rona baa ema mak neon loos, no moris tuir Niakaan hakara.c 32 Nahuu nosi Na'i Maromak nase'i lale'an no raiklaran to'o baa oras ne'e, la noo lia ida moos mak katak nosi ema mak nadi'ak nola ema mak matan delek hodi moris. 33 Kalo Yesus la mai nosi Na'i Maromak, Nia la bele nalo saa ida nune'e.”
34 Sia nataa na'ak, “Hoi! O ne'e, ema aat hori okaan inan nahoris nola o! Oin nunabee to'o o manorin fila ami? Notar lalek ne'e!” Hotu sia te'ur sai nia, to'o lelen nia nosi uma hamulak.
Ema mak uluk matan delek fiar baa Yesus
35 Yesus rona nola na'ak, Yahudi ulun sia te'ur sai ema mak uluk matan delek nia, Nia baa buka ema nia to'o netan. Nia nusu baa ema nia na'ak, “Nunabee? O fiar baa Ema Raiklaran Isin ka?”
36 Mais ema nia nusu fila na'ak, “Nia see ida? Ita Boot tulun katak lai, nebee ha'u kbele fiar baa Nia.”
37 Yesus moos katak na'ak, “O masoru mola Nia ti'an, tan Nia mak no'i dale no o ne'e.”
38 Rona nola nunia, ema nia na'ak, “Ha'u kfiar Ita Boot!” Nia moos nakni'a nodi lo'u-sudur baa Yesus.
39 Hotu Yesus katak baa nia na'ak, “Ha'u kmai iha raiklaran ne'e atu tetu ema raiklaran. Nebee, ema matan delek bele naree, no ema mak natene aan matan moon, bele dadi delek.”
40 Iha nia noo ema Farisi na'in hira mak rona Yesus dale nia. Sia nusu na'ak, “Nunabee ti'an? Ami moos ema delek ka?”
41 Yesus nataa na'ak, “Kalo ema ida delek, tan nia la natene hanorin loos, nia la sala. Mais emi sala ti'an, tan emi dale ha'ak, emi matan moon.”