3 Natoon baa nia, noo feto ida mak ema kohi nola no'i nakur biti-kluni. Manorik ukun no ema Farisi na'in hira dada nodi feto nia mai baa Yesus. Sia seten feto nia, nebee nariik iha sia hotu-hotu oin. 4 Hotu sia katak baa Yesus na'ak, “Ama. Feto ne'e kona kohi oras no'i nakur biti-kluni. 5 Tuir Ukun-badu Bei Musa, ‘Ema mak nakur biti-kluni musti kona ukun kastikar tuda hodi fatuk to'o mate.’ Dadi tuir Ama, nunabee?”^a 6 Ema nia sia nusu nunia, tan sia nakara nahonu Yesus.

Mais Yesus la nataa kedas. Nia natu'u, nodi liman fuan nakerek baa rai. 7 Sia nusu Nia bei-beik, foin Nia nariik, nodi katak baa sia na'ak, “Nune'e. See nosi emi mak la nalo sala dauk bele taa ukun nodi tuda fatuk uluk baa feto ne'e.” 8 Dale notu nunia, Yesus natu'u nikar, nakerek tenik baa rai.

9 Rona nola Yesus dale nunia, ema nia sia noran moe. Ida-idak natene aan na'ak, nia moos nalo sala. Tan baa nia, nahuu nosi matas to'o lawarik nakiduk ida-idak, to'o la'o nela Yesus mesan no feto nia. 10 Hotu Yesus nariik nikar, nusu baa feto nia na'ak, “Sia iha nabee ti'an? Sei noo ema mak atu taa ukun kastikar baa o ka?”

11 Feto nia nataa na'ak, “La noo ti'an, Ama.”

Hotu Yesus katak baa nia na'ak, “Ha'u moos la ko'uk taa ukun kastikar baa o. Fila ona. Mais manoin. Keta malo sala tenik ona!”]^b

12 Hotu Yesus dale nikar tenik no ema lear na'ak, “Ha'u ne'e, kroman bodik ema raiklaran. Ema mak tuir Ha'u la moris iha makukun ona, mais nein iha kroman mak natudu dalan baa moris.”^c

13 Rona Yesus dale nunia, ema Farisi na'in hira nakbehek Nia na'ak, “Hoi! Ami la simu okaan dale nia, tan O dale lia mosi aan du'uk.”^d

14 Mais Yesus nataa na'ak, “Nune'e. Masik Ha'u kdale lia kosi aan du'uk, Ha'ukaan dalen nia, loos, tan Ha'u katene, Ha'u kmai kosi nabee, no Ha'u atu kbaa iha nabee. Emi la hatene lia nia. 15 Emi sukat Ha'u hodi sasukat raiklaran. Mais Ha'u la ksukat ema nunia. 16 Kalo Ha'u ksukat ema, Ha'u kodi sasukat loos. Tan Ha'u la ksukat mesan, mais ko Ha'ukaan Ama mak solok Ha'u. 17 Emi du'uk hatene Ukun-badu Bei Musa na'ak, ‘Musti noo ema rua mak katak lia manesak lai, foin bele simu siakaan dale.’ 18 Nunia tebes. Ha'u kdale nunabee, Ha'ukaan Ama moos natebes nunia, tan Nia mak solok Ha'u.”

19 Hotu, sia nusu na'ak, “Okaan Ama iha nabee?”

Yesus nataa na'ak, “Emi la hatene Ha'u ne'e See. Emi moos la hatene Ha'ukaan Ama. Kalo emi tebe-tebes hatene Ha'u, emi moos nanis hatene Nia.”

20 Lia ne'e sia hotu-hotu, Yesus katak baa oras Nia nanorin iha Uma Hamulak Huun, kre'is baa fatik libur osan hamulak. La noo mak kohi Nia, tan niakaan oras sei la to'o dauk.

21 Hotu, Yesus dale natutan na'ak, “Ha'u atu kla'o kela emi, atu baa fatin ida seluk. Nunia ti'an, emi buka Ha'u, mais la hetan, tan emi la bele baa fatin nia. Tebes. Emi la bele baa, tan nosi ikus, oras emi mate, emi sei hatiu hodi emikaan salan.”

22 Rona nola Yesus dale nunia, Yahudi ulun sia nusu baa malu na'ak, “Nia dale saa mak ne'e? Nia atu no'o aan du'uk ka? Tan saa Nia dale na'ak, ‘Emi la bele baa fatin nia.’”

23 Mais Yesus katak baa sia na'ak, “Emi hosi raiklaran mak iha raik. Mais Ha'u ne'e kosi lale'an mak iha leten. Emi hanoin loos lia raiklaran. Mais Ha'u lale. 24 Etuk, Ha'u katak ohin nia ka'ak, oras emi mate, emi sei hatiu hodi emikaan salan. Tebes. Tan kalo emi la fiar baa Ha'u, oras emi mate, emi sei hatiu hodi emikaan salan.”

25 Hotu sia nusu na'ak, “O ne'e, see?”

Yesus nataa na'ak, “Ha'u ne'e, Ema nia mak Ha'u katak kedan baa emi hori uluk.^e 26 Noo lia wa'in mak Ha'u kbele duu baa emi. Mais Ha'u la kdale kasai. Ha'u kdale loos tuir Ha'ukaan Maksolok, tan Niakaan dalen, tebes no loos. Saa mak Ha'u krona ti'an kosi Nia, lia nia mak Ha'u kdale kato'o baa ema raiklaran ne'e.” 27 (Nodi dale lia Maksolok, Yesus dale nosi Aman iha lale'an. Mais sia la kohi.)

28 Hotu Yesus dale tenik na'ak, “Nosi ikus, emi hasa'e Ema Raiklaran Isin ti'an, foin emi hatene ha'ak, Ha'u ne'e, mak Ema nia. Ha'u la kalo saa ida tuir Ha'ukaan hakara. Ha'u kato'o loos saa mak Ama iha lale'an nanorin baa Ha'u. 29 Tan Nia mak solok Ha'u. Nia moos namutuk no Ha'u nima-nimak. Nia la nabusik Ha'u kedas, tan Ha'u kalo tuir Niakaan hakara nohuun.”

30 Yesus katak lia ne'e sia, ema wa'in moos fiar baa Nia.

31 Nunia hotu, Yesus katak baa ema Yahudi sia mak fiar baa Nia na'ak, “Kalo emi moris talin aan ho Ha'ukaan Manfatin nohuun, emi dadi baa Ha'ukaan maktuir mak loos. 32 Hodi nunia, emi hatene hola hanorin loos. Hanorin loos nia moos sori nola emi nosi ata.”

33 Mais sia sakar na'ak, “Hoi! Ami lahoos ema atan! Ami ne'e, Bei Abraham husar-binan! Tan saa O dale ma'ak, ami atu hetan sori nosi ata?”^f

34 Yesus nataa na'ak, “Rona, tan Ha'ukaan dalen ne'e, tebes no loos: ema hotu-hotu nalo sala, to'o dadi ata baa sala nia. 35 Mais ata la bele simu bein sasoin. Oa uma laran dei mak bele simu. 36 Ha'u ne'e, Na'i Maromak Oan. Kalo Ha'u ksori emi, emi sasin ti'an hosi sala. Hotu, la dadi ata baa sala ona.

37 Ha'u katene ti'an ka'ak, emi ne'e Bei Abraham husar-binan. Masik nunia, emi sei buka dalan atu ho'o Ha'u, tan la noo fatik bodik Ha'ukaan hanorin iha emikaan neon. 38 Ha'u kato'o ti'an lia saa mak Ha'u ksimu kosi Ha'ukaan Ama. Mais emi la titu, tan emi halo tuir emikaan matas sia.”

39 Yesus dale notu nunia, ema nia sia sakar na'ak, “Keta dale nunia, tan ami ne'e, Bei Abraham husar-binan!”

Mais Yesus katak na'ak, “Kalo emi Abraham husar-binan tebes, emi musti haninu baa nia. 40 Ha'u kanorin emi lia loos mak Ha'u ksimu kosi Na'i Maromak, mais emi sei buka dalan ho'o Ha'u. Abraham lisan, lahoos nunia. 41 Emikaan hahalok tuir emikaan matas sia dei.”

Mais sia sei sakar na'ak, “Hoi! Ami ne'e, oa kabun laran! Lahoos oa kabun luan! Tan amikaan Aman, mesak ida dei. Nia mak Na'i Maromak!”

42 Yesus nataa sia na'ak, “ Kalo Na'i Maromak emikaan Aman tebes, emi nanis hadomi Ha'u, tan Ha'u kmai kosi Nia. Ha'u kmai lahoos tan kakara du'uk, mais, tan Nia mak solok Ha'u. 43 Mais tan emi la ho'uk simu Ha'ukaan hanorin, nanis emi la kohi hola Ha'ukaan dalen nia.

44 Emi ne'e, ilas ida ho diabu ulun. Ne'e na'ak, nia mak emikaan ama, tan emi haninu baa nia! Hori uluk aan, nia maho'o ema no sakar hanorin loos, tan nia la nakara hanorin loos. Kalo nia dale, dale naktolek, tan lisan nunia nanis. Nia, mak ama bodik ema tolek teen hotu-hotu. 45 Masik Ha'u kanorin hanorin loos moos, emi la fiar. 46 Ma'ak kokon! See nosi emi bele natudu lia kakaer na'ak, Ha'u kalo sala? La noo. Dadi, tan saa emi la ho'uk fiar baa Ha'u kalo kanorin hanorin loos?

47 Nune'e. Ema mak nanono baa Maromak Manfatin, nia mak Na'i Maromak oan. Mais, tan emi la hanono baa Ha'u, ne'e na'ak, emi lahoos Niakaan oan.”

48 Rona nola Yesus dale nunia, Yahudi ulun sia dale nahaat Nia na'ak, “Hoi bulak! O ne'e, ema Samaria, lahoos ema Yahudi.”

49 Mais Yesus katak na'ak, “Ha'u lahoos bulak. Ha'u kakneter Ha'ukaan Ama iha lale'an, mais emi la hakneter Ha'u. 50 Ha'u la kbuka tonun, mais noo mak beer tonun Ha'u. Habusik Nia mak tetu Ha'ukaan hanorin na'ak, loos ka, lale.

51 Ha'ukaan dalen ne'e, tebes no loos: ema mak nalo tuir Ha'ukaan hanorin, nia la mate, mais netan moris nima-nimak.”

52 Rona nola nunia, Yahudi ulun sia katak na'ak, “Oras ne'e, ami hatene nanis diabu tekar O, to'o O dale lia bulak. Bei Abraham mate. Maromak mako'an uluk sia moos mate. Tan saa O ma'ak, ‘ema mak nalo tuir okaan hanorin, la mate?’ Arumak O bula ti'an? 53 O maka'as liu Bei Abraham ka? O maka'as liu Maromak mako'an sia ka? Sia hotu-hotu mate ti'an. Manoin kokon, O ne'e, see?”

54 Mais Yesus nataa na'ak, “Kalo Ha'u ktonun aan, lia nia la no folin. Mais lahoos nunia, tan Ha'ukaan Ama mak nakara tonun Ha'u. Nia, mak emi ha'ak, emikaan Ama Maromak. 55 Mais emi la hatene Nia. Ha'u mak katene. Kalo Ha'u kdale ka'ak, Ha'u la katene Nia, Ha'u kaktolek ti'an nu'u emi. Mais Ha'u kalo tuir Niakaan Manfatin, tan katene tebes Nia. 56 Emikaan Bei Abraham neon di'ak, tan nia natene Ha'u atu kmai. Oras ne'e, Ha'u kmai ti'an. Nanis nia neon di'ak basuk.”

57 Hotu Yahudi ulun sia katak na'ak, “Okaan otas sei la to'o tinan lima nulu dauk! Oin nunabee O bele ma'ak, O maree Bei Abraham ti'an?”

58 Yesus nataa na'ak, “Rona, tan Ha'ukaan dalen ne'e, tebes no loos: Bei Abraham la moris dauk, Ha'u iha ti'an.”

59 Rona nola nunia, ema nia sia foti fatuk atu tuda Yesus, tan Nia foti aan manesak no Na'i Maromak. Mais Nia sai nakfunin, la'o nela Uma Hamulak Huun nia.^g