Yesus dale no feto Samaria
4
1-2 Baa oras nia ema hetak wa'in mai baa Yesus nodi nusu atu simu sarani, to'o ema mak tuir Yesus wa'in liu ema mak tuir Yohanis. (Tuir loos, Yesus du'uk la sarani ema, Niakaan maktuir sia mak sarani ema.) La kleur, ema nosi partee Farisi moos rona nola na'ak, ema hetak wa'in tuir Yesus. Baa oras Yesus natene nola ema Farisi rona nunia ti'an, 3 Nia no maktuir sia la'o nela rai Yudea, fila baa rai Galilea. 4 Iha dalan, sia la'o tuir rai Samaria, atu borut baa Galilea. 5 Iha Samaria sia to'o leo ida naran Sikar, kre'is baa rai mak uluk aan Bei Yakob foo baa oan Yusuf.a 6-8 Iha leo di'in, noo wee knuuk ida, naran ‘wee knuuk Yakob’. Loro natetu, Yesus sia to'o wee knuuk nia. Hotu Yesus nanawa kole iha nia. Niakaan maktuir sia la'o nela Nia mesan, baa sosa hahaak iha leo laran.La kleur, feto ida nosi leo nia mai nola wee. Yesus nusu baa nia na'ak, “Bii. Ha'u kbele kusu wee hemu oan ida ka?”
9 Rona nola nunia, feto nia sarebak, tan tuir loos, ema Yahudi la kahur no ema Samaria. Nia nusu fila baa Yesus na'ak, “Ama! Ama, ema Yahudi. Ha'u ne'e, ema Samaria. Ama nusu wee hemu baa ha'u, kona ka?”b
10 Yesus katak na'ak, “Nune'e. Kalo bii natene saa mak Na'i Maromak nakara foo baa ema, no natene See mak nusu wee hemu ne'e, bii nanis nusu fila wee baa Ha'u. Hotu, Ha'u moos foo wee mak nodi moris.”c
11 Feto nia nataa na'ak, “Ama la noo kakuruk wee. Wee knuuk ne'e moos le'an. Oin nunabee, Ama bele netan wee mak nodi moris nia? 12 Uluk aan Bei Yakob rai nela wee knuuk ne'e baa ami. Bei Musa du'uk nemu nosi wee ne'e. Niakaan oa sia moos nemu. Niakaan bibi no karau moos nemu. Keta manoin, ama bele netan wee mak di'ak liu wee ne'e!”
13 Yesus nataa na'ak, “Ema mak nemu nosi wee ne'e, nanis nanroo nikar tenik. 14 Mais ema mak nemu wee mak Ha'u kfoo, sia la nanroo kedas. Tan wee mak Ha'u kfoo, hanesan wee matan ida, mak nakfuka sa'e foo moris to'o nima-nimak.”
15 Feto nia nataa na'ak, “Kalo nunia, Ama foo wee nia baa ha'u lai, nebee ha'u lalika kanroo tenik! Hodi nunia, ha'u lalika mai kuru tenik wee ona.”
16 Hotu Yesus naruka na'ak, “Bii fila lai, baa bolu mola okaan la'en mai ne'e.”
17-18 Nia nataa na'ak, “Mais ha'u la koo la'en.”
Yesus moos na'ak, “Tebes. Bii dale moon. O moo la'en lima ti'an. Mane mak iha baa oras ne'e moos, lahoos okaan la'en.”
19 Hotu, feto nia dale na'ak, “Adeei! Ama ne'e, nanis Maromak mako'an. 20 Ha'u atu kusu lia ida baa Ama nune'e: ami ema Samaria, amikaan bei uluk sia lo'u-sudur baa Na'i Maromak iha foho Gerisim ne'e.d Mais, emi, ema Yahudi ha'ak, kalo lo'u-sudur baa Na'i Maromak, musti baa Yerusalem. Tuir Ama, lia malolok mak nabee?”
21 Yesus nataa na'ak, “Bii, fiar Ha'u. Lo'u-sudur baa Na'i Maromak iha foho ne'e ka, iha Yerusalem ka, nosi ikus lia nia la noo folin. 22 Emi ema Samaria, la hatene see mak emi lo'u-sudur baa. Mais ami ema Yahudi hatene Maromak mak ami lo'u-sudur baa, tan Nia nameno ti'an nodi ami atu loke dalan, nebee ema hotu-hotu bele netan moris. 23 To'o baa niakaan oras, ema mak lo'u-sudur baa itakaan Ama tuir hanorin loos, sia atu lo'u-sudur baa Nia nodi beran nosi Niakaan Kmalar Lulik. (Tuir loos, oras nia to'o ti'an.) Ema mak lo'u-sudur oin nunia, mak Ama iha lale'an nakara. 24 Na'i Maromak ne'e, kmalar mak moris. Nia iha fatin hotu-hotu. Dadi, ema mak lo'u-sudur baa Nia tuir hanorin loos, musti lo'u-sudur baa Nia nodi beran nosi Kmalar Lulik.”
25 Rona nola Yesus dale nunia, feto nia katak na'ak, “Ha'u katene Mesias atu mai. Nia mak ema temi na'ak, ‘Kristus’, tan Na'i Maromak nameno kedan atu solok Nia mai. Kalo Nia mai ti'an, nanis Nia nalore lia hotu-hotu baa ita.”
26 Yesus nataa na'ak, “Ema nia mak Ha'u, mak no'i dale no o ne'e.”
27 Oras nia moos, Yesus Niakaan maktuir sia mai nikar nosi leo laran. Naree Nia no'i dale no feto Samaria nia, sia blaar. Mais la noo ida nusu baa feto nia na'ak, “O makara saa?” La noo ida moos nusu baa Yesus na'ak, “Tan saa Ama Boot dale no feto nia?”
28 Hotu, feto nia la'o nela niakaan kusi iha nia, fila baa leo laran. Nia dale baa ema iha nia sia na'ak, 29 “Mai haree kokon ema ne'e lai! Nia dale loke fore hotu-hotu mak ha'u kalo ti'an. Keta arumak, Nia ne'e Kristus, mak Na'i Maromak nameno kedan atu solok mai!” 30 Rona nola nunia, ema nia sia sai nosi leo laran, baa naree Nia.
31 Oras feto nia foin fila, Yesus Niakaan maktuir sia namaus Nia na'ak, “Ita Boot! Mai haa lai!”
32 Mais Yesus nataa na'ak, “Ha'u koo ti'an hahaak mak emi la hatene.”
33 Rona nola nunia, Niakaan maktuir sia nakusuk malu na'ak, “Nunabee ti'an? See mak mai foo hahaak baa Nia?”
34 Mais Yesus katak na'ak, “Nune'e mai. Na'i Maromak solok Ha'u atu kalo tuir Niakaan beer, kodi kala'o Niakaan serwisu to'o mohu. Lia nia manesak nu'u hahaak bodik Ha'u. 35 Lia hatetek nune'e. To'os na'in na'ak, ‘Sei fulan haat lai, foin bele ku'u.’ Mais ha'u ka'ak, ‘Mana lai baa to'os nebaa sia. Tetuk ti'an atu ku'u.’ To'os isin nia sia, hanesan ema lear mak mai baa ita. Sia nadi'a aan ti'an atu fiar baa Ha'u. 36 Ema mak ku'u no libur to'os isin, simu siakaan saseban. Sia nu'u ema mak natudu dalan, nebee ema fiar baa Ha'u, hotu netan moris nima-nimak. Hodi nunia, ema mak kuda fini, no ema mak ku'u to'os isin, neon di'ak bele-bele. 37 Lia fuan ida na'ak, ‘Ema ida kuda fini; seluk sia libur to'os isin.’ Tebes. 38 Ha'u ksolok emi baa libur to'os isin mak ema seluk kuda. Emi hetan sotir hosi siakaan kolen.”
39 Baa oras nia, ema Samaria wa'in fiar baa Yesus iha leo nia, tan feto nia nasara na'ak, “Nia dale loke fore hotu-hotu mak ha'u kalo ti'an.” 40 Ema nia sia moos mai naro'an baa Yesus na'ak, “Ama Boot, hein ho ami iha ne'e dei!” Nia moos nein iha nia to'o loron rua.
41 Rona Yesus dale du'uk, ema wa'in tenik moos fiar baa Nia. 42 Sia katak baa feto nia na'ak, “Hori sehik nia, ami rona loos o dale dei. Mais oras ne'e, ami fiar, tan rona du'uk hosi Nia. Ami hatene tebes ha'ak, Ema ne'e, Maksorin raiklaran.”
Yesus nadi'ak nola ema boot ida oan
43 Loron rua nia siku ti'an, Yesus sia la'o liu baa rai Galilea mak Yesus rai huun. 44 (Uluk, dala ida Yesus dale na'ak, “Ema la nakneter Maromak mako'an iha niakaan leo du'uk.”)e 45 Mais baa oras ne'e, ema Galilea wa'in simu Nia di'a-di'ak, tan sia tuir ti'an dahur Paska iha Yerusalem, no sia naree nodi matan du'uk hotu-hotu mak Nia nalo iha nebaa.f 46 Hotu, Yesus sia la'o baa leo Kana, leo mak uluk Nia nalo wee dadi baa anggor ween.
Kre'is leo nia, noo ema boot ida iha kota Kapernaum. Niakaan oan mane moras.g 47 Oras nia rona nola na'ak Yesus mai nikar ti'an nosi rai Yudea, nia moos la'o sa'e baa buka Yesus iha Kana. Nasoru nola ti'an, nia namaus nebee Yesus tuun mai, nadi'ak nola oan, tan kre'is mate ona.
48 Mais Yesus katak baa ema nia na'ak, “Kalo emi la haree Ha'u kase'i tadak blaar oi-oik, emi la ho'uk fiar baa Ha'u!”
49 Ema nia nataa na'ak, “Ama Boot. Tulun mai lai. Kalo lale, ha'ukaan oa mate ona.”
50 Rona nola nunia, Yesus katak na'ak, “Fila ona. O oan di'ak ti'an.”
Hotu, ema nia tali'ur nodi fila, tan nia fiar Yesus dalen. 51 Baa oras fila, niakaan ema serwisu sia mai nasoru nia iha dalan, nodi na'ak, “Lalika susar ona, tan ama oan di'ak ti'an.”
52 Hotu, nia nusu baa sia na'ak, “Nia nahuu di'ak baa tuku hira?”
Sia nataa na'ak, “Nahuu baa hori sehik, tuku ida loron natetu niakaan manas tuun kedas.” 53 Hotu, ema boot nia nanoin nola na'ak, niakaan oa nia nahuu di'ak, kona besik baa oras Yesus katak na'ak, “Ama oan di'ak ti'an.” Hotu, nia no niakaan ema uma laran sia fiar bele-bele baa Yesus.
54 Tadak blaar nia, tadak blaar dala rua mak Yesus nase'i baa oras Nia sai nosi Yudea baa Galilea.