Ta b'ale ke ri noo, “Wae Muri.”

2 Ta lii ke Deo Muri pa noo, “D'èno pe'ie! Ègo ne ana èu do mone miha do rihi haj'a ri èu ne. Ègo noo laa rai Moria j'e tao ri èu noo jad'i ta b'ara tunu menahu pa nii wie Yaa. D'ai la nii, j'e ped'elo ri Yaa pa èu ne era nee pa he wue lede.”

3 D'ai ta do b'èrirai ne rai j'èmi ae, ta èta aj'u ai ke Abraham, ta èki ke ri noo ne aj'u he, j'e wue pa dèni keledai. D'ai ta pekèd'i heke noo nga Isak, nga dèu j'èga noo do d'ue dèu, laa era do èla ke pepeke ri Muri ne pa noo. 4 Kako roo teruu, d'ai ta do hemèd'a he, ta ngède ke ri Abraham ne era nène ngati j'èu. 5 Ta pika ke noo pa do d'ue dèu naènu he, “Pee ko muu d'ue taha nga keledai hed'e pa d'ee b'oke! Ne ta laa d'ida la nii ko yaa nga ana yaa ta laa wie huu mejura pa Muri. Ki moko j'e b'ale rii j'ii ma d'ee.”

6 D'ai ta ègo ke ri Abraham ne aj'u do ta tunu b'ara menahu ne, j'e peha'e la kologunu Isak. J'e noo miha èbe ne tud'i nga aj'u do nga ai. Pa d'ara ta kako hela'u roo, 7 ta pelango ke ama noo ri Isak, “Ama ee!”

Moko ta b'ale ke ri Abraham, “Ta ngaa we Isak?”

Ta keb'ali ke Isak, “Ama. Nee ke dii ta tunu b'ara j'ula. Pa d'ee hee ke aj'u nga ai. Tapulara ne na ki'i j'awa do ta jad'i b'ara j'ula huu mejura ne nèi pa mii?”

8 Moko ta b'ale ke ri Abraham, “Ana yaa ee! Deo Muri ma miha hine do ta wie ne na ki'i j'awa Noo, j'e pake ta b'ara j'ula.” Moko ta ha'e teruu ke roo d'ue.

9 Ta d'ai roo la era do èla pepeke ri Muri ne, ta ra'a wowadu ke Abraham ta tao meja tunu menahu. D'ai ta ra'a ke ri noo aj'u ai ne pa d'ida meja nee. Ta èke ke ri noo ne ana noo, j'e pekeb'èle pa d'ida aj'u ai nee. 10 Moko ta ègo ke ri noo ne tud'i ne ta pemade ne ana noo. 11 Tapulara ta petode d'ènge ke ri dèu pejuu MURI ngati liru-bèla, “Wo Bram! Mata ko!”

Ta b'ale ke ri noo, “Ta ngaa Muri?”

12 Moko ane lii pedai ne, “B'ole pemade ri èu naiki do napone! B'ole tao nengaa-ngaa pa noo! Awe nad'ee do toi ke ri Yaa, ta do tèra-tèra èu ne pedute ne do d'èi Muri, rowi do moko ke èu ta j'ole wie Muri ne ana èu do mone miha ne, mij'e jad'i ta b'ara j'ula.”

13 Èla pe minahère, ta ngède ke ri Abraham he ngi'u ki'i j'awa mone, ne tadu noo do pehega'e pa kejanga aj'u do naiki he. D'ai ta laa ègo d'ènge ke ri Abraham ne ki'i j'awa nène, j'e tune ri noo jad'i ta b'ara j'ula wie Deo Muri, ta gate ne ana noo. 14 Hiku ta pehune ke ri Abraham ne era do napone, ‘Do ta pemoke ri Muri hine nengaa ne do ta paraluu.’^a Ri mihère ke hape ma awe do nad'ee ne pale ri dèu ta, “Pa kolo b'ojo MURI ne, do ta pemoko ma ri Noo hine nengaa ne do ta paraluu.”

15 Moko ta petode rike ri dèu pejuu Muri ngati liru bèla, 16 “MURI miha ne do pali, ‘hupa Yaa nga pake ngara Yaa miha mihed'e: do èla ke èu ta pemoko wie Yaa ne ana èu mone miha, ta jad'i b'ara j'ula. Ri minahère ke 17 do ta wie ri Yaa hine ne mèngi do d'ai ae tuu èu nga kolo-loro èu. Do ta juu ta lowe roo tade dod'o b'ule dèu do nara ta reke roo hine, he mii moto pa liru-bèla nga lahalae pa tèbi dahi. Ne ana-èpu èu hine do ta pej'èra ne ihi muhu lawa roo. 18 Ngati kolo-loro èu, hari-hari udu pa rai-wawa do ta nara mèngi, rowi do èle ke ri èu pe pedute ne lii pereda Yaa.’”

19 Èla pe nène, ta puru ke Abraham nga Isak laa nga ènu roo do d'ue dèu he, j'e b'ale roo hela'u-la'u laa Beer Syeba. Abraham he do pee pa nii.

20 He wari, ta rèngi ke Abraham, ne ihi èmu ri ari noo Nahor, Milka ne do èla ke pe metana ne ana noo he. 21 Ana do mone a'a ne, ngara ta Us. Ne ari noo, ngara ta Bus. Èla pe nène, Kemuel (do jad'i ta ama ri Aram). 22 J'e era Kesed, Haso, Pildas, Yidlaf, nga Betuel. 23 Betuel d'ee ama ri Ribka. 24 Tapulara nara lema taba Nahor ana ngati ihi èmu peluja noo, do ngara ta Reuma. Metana ri noo Teba, Gaham, Tahas, nga Maaka.