3 Moko ta laa peabu ke Abraham nga dèu do Het he. Ta lii ke noo, 4 “Yaa d'ee dèu dèka he we pa telora muu. B'ule d'o yaa nga worai ta pedane ne ihi èmu yaa. Hiku ki do o'o he muu, wie kowe yaa ta wèli ne worai muu hudi, mij'e nara ta pedane noo ri yaa pa nii.”

5 Ta b'ale ke ri roo, 6 “Mihee, ama! Mihed'e ne worèwu tui, heleo ri j'ii ama, hela'u mii he dèu dokepai do pekeb'ue tèra ri j'ii. Hiku pij'i we ama, worai namii do rihi woie, do mèd'i nga do d'èi ama. Hème nga woie we ri j'ii, b'ule d'o do nyèke.”

7 Ta titu ke Abraham, j'e peru'u èni ta wie huu pa do Het he, do mone worai ne. 8 D'ai ta lii ke noo, “Kinga do hème ri muu ne kolo lii pedai yaa do ngine ne, ne ami tulu yaa ta pedai ri muu nga ana womone ri do kepai Sohar, Efron ne. 9 Ami ko muu, ki do mud'e he, pewie ko ri noo pa yaa ne lie noo, do ngara ta Makpela ne, do era pa ngidi d'oka noo. Ami hengaa we noo ne keb'ue ne ta ma'e ma ri yaa. Do ta ma'i mèu ri yaa ne keb'ue noo pa hed'apa muu hari-hari, mij'e ne worai nène jad'i ta unu-oha yaa. Do ta tao noo ri yaa ta rai dare unu j'ii.”

10 Awe do napone, Efron miha era do mejèd'i hela'u nga do Het he. Hiku do rènge ma ri noo ne lii Abraham ne. D'ai ta kèd'i ke noo ta titu j'e b'ale ne lii Abraham pa hed'apa mone kepai he harièle, 11 “B'ole tao minahère ama! Tao mihed'e we. Ta wie hewe ri yaa pa ama ne d'oka nga lie Makpela ne pa ama. Pedane we ri ama ne ihi èmu ama pa nène. J'ole ri yaa ne worai na ène pa ama pa hed'apa dèu yaa he. Hani roo hari-hari ta jad'i hakahii!”

12 Moko ta peru'u kètu wari ke Abraham pa hed'apa dèu do Het he. 13 D'ai ta lii ke noo pa Efron, “Ie lema ta minahère, tapulara d'èno ko ri muu hari-hari ne lii yaa. D'èi ta wèle hèpo ri yaa ne worai do napone, mita nara ri yaa ta pedana ne dèu yaa he pa nène.”

14-15 D'ai ta b'ale ke ri Efron, “Ne keb'ue worai nène èpa ngahu doi melaa-pudi hewe. Ta ngaa ke dii d'ue ta petawa pa doi do hudi na nee? Kako we ama laa pedane ne ihi èmu ri ama ne pa nii.”

16 Do o'o lema ke Abraham nga keb'ue worai do nène, pedute ne do lii Efron. Hiku pa hed'apa hari-hari dèu do Het do jad'i ta hakahii pa nène, reke ri noo èpa ngahu doi melaa-pudi, j'e ma'i pa Efron.

17-19 Hiku nga minahère ke, ne nara Abraham worai unu Efron, jad'i ta unu-oha noo. Ne worai nène do era pa Makpela, do peumu nga Mamre (do Hebron ne). Do wèle hèpo ri noo ne worai nga d'oka nène, nga lie, nga hari-hari ne na'aj'u he. Hari-hari dokepai do Het he do jad'i ta hakahii, ta do worai nène nga ihi noo hari-hari, jad'i ta unu-oha ri Abraham. Moko ta kako ke Abraham laa pedane Sara pa ro'a lie ne, pa rai Kana'an.

20 Nga minahère, ne d'oka nga lie do unu ri do Het he ko uru, nad'ee jad'i ke ta worai unu-oha Abraham, mij'e pake ri noo ta keko.