2 Èna lod'o èla pe na ène, ta ègu ke Petu, J'ako nga Johani ri Yesus, la hewue lede do d'ida, do kehii. Ta d'ai roo la kolo lede nee, ngède ri roo ne Yesus èla ke pe rihu èni. 3 Ne b'ara pake Noo do pudi kewa'a, do weo do kana. B'ule d'o b'ara pa rai-wawa na ène do wo pudi kelala mii b'ara pake Noo. 4 Pa d'ara awe na ène d'ènge, ta ngède ke ri roo Yesus era do pedai lii nga Elia nga Musa.

5-6 Petu he made ri meda'u. B'ale Petu ta b'ingu ke, tade pedai wala. Ta lii ke noo pa Yesus, mihe ane, “Ama. Rihi woie dii pa d'ee! Rihi ie j'ii ta petitu tèlu b'ue leo. Hewue tuu Ama, hewue tuu Musa, nga hewue tuu Elia.”

7 Ta dèka ke ne merèmu la herimu roo. J'e rènge ri roo ne lii pedai ti d'ara merèmu nee, mihe ane, “D'èno we. Yesus nad'ee, Ana d'èi Yaa. Ped'èno ie we muu nga Noo!”^a

8 Ta rènge ri Petu he ne lii pedai na ène, heleo pehero ke ri roo pa era na ène. B'ule d'o dèu do hewala pa ène, wala ngati Yesus miha.

9 Èla pa minahère, ta puru ke Yesus nga ana aj'a Noo he ti kolo lede na ène. Pa d'ara puru roo, ta tèka lii ke Yesus pa roo, “B'ole ped'iri muu pa naduu we, nengaa ne do ngèdi ri muu ngine. Yaa d'ee, Dèu Rai-wawa do Petuu-Petuu, made uru ko. Kiri muri wari Yaa, j'e'itu pepeke ri muu pa dèu lowe.”

10 Pedutu tèra roo nga lii tèka Yesus, b'ule d'o roo nga pedai nga he dèu tèra he. Ta pekeb'ali ke roo tèlu, “Nengaa ke ne pedèb'o lii pedai Noo, ta ‘Muri wari ki èla pemade? Minamii?’”

11 Ta keb'ali ke roo pa Yesus, “Ane guru agama he, ‘Elia ta dèka uru, j'e'itu dèka Kristus.’ Pedutu lii Ama, minamii?”^b

12 Ta b'ale ke ri Yesus, “Tèra, do petuu! Dèka uru ko Elia, ma pemoke ruj'ara tuu Kristus, do pej'uj'e ri Deo rai uru he. Minamii? Pee ko ma muu nga dod'o tada nengaa ne do hure do b'uke j'ara lua Dèu Rai-wawa do Petuu-Petuu ne? Do lore ke pe b'uke ki ri dèka Noo, do ta pehedue Noo ri dèu, j'e pemade. 13 D'èno pe'ie ri muu. Elia, èla ke pedèka. Tapulara, pehedue noo ri dèu, pedutu nga d'èi roo. Harièle nahère petobe ne lai do b'uke ri mone ub'a Deo rai uru he.”

14 Ta d'ai Yesus nga do tèlu ana aj'a Noo he, la pekupu wari nga ana aj'a do had'e he, era rike ne dèu lowe he do pekupu. Ne lua dèka dèu lowe he, ta la heleo ne ana aj'a Yesus he pa d'ara peb'aj'a nga guru agama Jahudi he. 15 Minahère ne ngède Yesus ri dèu lowe he, ta keb'èdi hala ke roo, rowi pa d'ara peira roo, Yesus do pa kolo lede ne ko. Moko ke roo ta perai la pehapo nga Noo.

16 Ta keb'ali ke Yesus pa roo, mihe ane, “Peb'aj'a nengaa muu pa d'ee?”

17 Dèka he dèu la pika, “Ama. D'èno ko ri Ama! Yaa ne èba ana yaa do momone, pe'ie ko we noo, ri Ama. Do b'ènga noo, i'a do pedai lii, pelai ti maho ri wango. 18 Kiri maho ke ne wango ne la d'ara noo, ta wèbe b'ure-b'ure ke ri noo pa rai. Tade woro ne ub'a, pekiho ne ngutu. J'e hekoto noo mii aj'u made he. Èla ke ri yaa pe'ami ne ana aj'a Èu he, ta hud'e ne wango nee, tapulara jad'i d'o.”

19 Ta j'aga ke ri Yesus ne ana aj'a he, mihe ane, “Rihi tèra muu! Aj'a loro-loro muu ri Yaa, pe ma muu ngad'o tada. Ad'o muu d'o parahaj'a petuu nga Yaa. Hape la mii ke Yaa ne mèka-wènge pehed'apa nga muu? Èbe ko ma d'ee, naiki ne!” 20 Ta hero'e ke ri roo ne naiki ne nga Yesus. Ta ngède Yesus ri wango nee, ta hore ke ri noo naiki ne la wurai, peb'are-gore pa ène. Woro ne ub'a noo.

21 Ta keb'ali ke Yesus pa ama naiki nee, “Rai pèri ke nee, naiki ne pèd'a do minahee?”

B'ale ri ama noo, “Rai tana iki. 22 Tui ke ne wango nee, ne d'èi ta pemade noo. J'aj'i wari ke noo, ne bui la d'ara rao ai, ki ad'o pebole pa d'ara èi. Ruba ko we, ne d'ara Ama. Ki jad'i he, pe'ie ko ri Ama ne naiki nad'ee.”

23 Ta b'ale ke ri Yesus, “Ta ngaa ku lii, ‘ki jad'i’? Jad'i ri Yaa harièle, had'i ta parahaj'a we nga Yaa!”

24 Ta b'ale ke ri ama naiki nee, nga he mèri ta tangi, mihe ane, “Ama! Do parahaj'a ma ke yaa. Ruba we ne d'ara perue riko ne parahaj'a yaa!”

25 Pa awe na ène, ngèdi ri Yesus ae ke ne dèu do dèka la peworo la ène. Ta pereda ke ri Noo pa wango nee, mihe ane, “Wango apa! Mèhu èni we èu ti d'ara naiki nad'ee, mij'e nara ta rèngi, i'a noo pedai lii. B'ole b'ale wari èu la d'ara noo!”

26 Ta rènge ne lii pereda Yesus ri wango nee, ta pekaa ke noo pemèdu-mèdu. Ta pekelole ke ri noo ne naiki nee, j'e ked'èji-d'èji, j'e mèhu èni noo ti d'ara naiki nee. Hekoto ne naiki, mii do made he. Ane ne lii dèu pa ène, “Made ke naiki ne!”

27 Ta pèro ke ri Yesus ne naiki nee, j'e pekèd'e noo. Ta kèd'i d'ènge ke noo.

28 Ta pekèd'i ke Yesus nga ana aj'a Noo ti ène, j'e maho roo la d'ara hewue èmu. Roo ke miha, pa d'ara èmu nee, ta keb'ali ke ne ana aj'a he pa Yesus, “Ama! Ta ngaa j'ii ku d'o nara ta hud'e ne wango ne?”

29 Ta lii ke Yesus pa roo, “D'èno ko ri muu pe woie! Wango he do apa. Ki d'o heb'aj'a muu ta ami kuaha ngati Deo, nara d'o muu ta hud'i wango do minahii.”

30 Ta pekèd'i rike Yesus nga ana aj'a Noo he ngati ène, la propensi Galilea. Ne d'èi Noo, b'ole era do toi ri dèu ne lua dèka roo la nii, 31 ri ne d'èi Noo ta aj'a ne ana aj'a Noo he we. Ta lii ke Noo nga roo, mihe ane, “Tui d'oke, j'e pewie Yaa ri he dèu pa dèu do wola. J'e pemade Yaa ri roo, do Dèu Rai-wawa do Petuu-Petuu d'ee. Tèra Yaa ta made, tapulara pa nèli, ta muri wari.”

32 Ta pika Yesus minahère, ta b'ingu ke roo pelai ta d'o tada roo. B'ani d'o ke roo ta keb'ali ne lua pedèb'o Yesus.

33 Ta nèru rike Yesus he la Kapernaum. Ta d'ai roo ne maho la d'ara èmu, ta keb'ali ke Yesus pa ana aj'a he, mihe ane, “Peb'at'a nengaa ke muu pa ruj'ara he ngine?”

34 B'ule d'o he dèu he do b'ani ta b'ale, ri pa ruj'ara he ngine do peb'ata roo ta naduu ne do rihi pa telora roo.^c

35 Ta mejèd'i ke Yesus, j'e aj'a roo, mihe ane, “Naduu do d'èi ta dèu do ke rihi, muri-mada noo petuu-petuu mii do ènu do pemoko dèu lowe.”^d

36 Ta hero'e ke ri Yesus he dèu naiki, j'e b'ale pa telora roo. J'e lii Noo, 37 “Naduu do pedute Yaa, j'e pemoko dèu mii naiki nad'ee, ne pedèb'o nee, dèu na ène lema do pemoke Yaa. Lai na ène lema, pemoke Ama do pejue Yaa ma rai-wawa d'ee.”^e

38 Moko ta kelaa ke Johani, ana aj'a Yesus, ane noo, “Ama. He wari, era he dèu do hud'i wango nga pake ngara Èu. Tapulara ta lara ke noo ri j'ii, ri ad'o noo kejie dii.”

39 Ta b'ale ke ri Yesus, “B'ole lara noo. Ri naduu do pake ngara Yaa, ta tao madalae, ad'o noo ta pe'ape ngara Yaa. 40 Ki ad'o noo do pelawa nga dii, tatu noo lema kejie dii.^f 41 Henge pe'ie ri muu! Kiri era dèu do tada muu ta dèu do pedute Kristus, j'e rab'a-d'èru muu, tatu ta d'o bèlo ri Deo ne lua lob'o noo. Maji lema muu ta penginu èi loko wue he we, bèlo d'o ri Deo ne lua woie noo.”^g

42 Ta pika rike Yesus pa roo, mihe ane, “Ki era dèu do èbe he dèu naiki la ruj'ara do hala, moko ne naiki ne ta dod'o parahaj'a pa Yaa, jaga ie ó! Rihi ie dèu na ène, ta perète pa lakoko ri wowadu worena, j'e hore la lèu ae.^h

43 Ki pake kae-nga'a èu ta tao hala-ludu, 'ète j'e hore! Rihi ie èu ta maho la muri-mada nga Deo nga he laa kae, ngata hore èu la d'ara ai naraka nga d'ue laa kae.ⁱ 44 [Ne naraka nee, era hedui-herui. Ne ai pa nii, do peloro-loro. Lema ne ètu pa ène, nga'a pewèu peb'èku loro-loro ne dèu do maho la ène.]^j 45 Ki pake kae-j'èla èu ta tao hala-ludu, 'ète j'e hore! Rihi ie èu ta maho la muri-mada nga Deo nga he laa kae, ngata hore èu la d'ara ai naraka nga d'ue laa kae. 46 [Ne naraka nee, era hedui-herui. Ne ai pa nii, do peloro-loro. Lema ne ètu pa ène, nga'a pewèu peb'èku loro-loro ne dèu do maho la ène.]^k 47 Ki pake namada èu ta tao hala-ludu, ruke j'e hore! Rihi ie èu ta maho la muri-mada nga Deo nga hewue namada, ngata hore èu la d'ara ai naraka nga d'ue b'ue namada.^l

49 Ne lii aj'a Yaa nee, do rihi ne mejèni. Naduu do d'èi ta pedute Yaa, do paraluu noo ta mèka tee ta pedute loro-loro Yaa, mii hed'ai do tao ri mengèhi j'e noe pa lod'o, mij'e ta d'o wèu, maji lema ta tèke petui.

50 Mengèhi do ie. Do nara ta pe woie nga'a. Tapulara ki ele ne hèro noo, b'ule d'oke noo nga guna. Ta hore heke. Hiku muu he, do ie ta jad'i mii mengèhi he, tuu muri-mada pehaj'a-ped'èi nga harièle dèu.

Naa! Pengaha we muu ne pelule j'ara lua naduu do rihi!”ⁿ