Manetualain ana nara muste besa-besa ela boso' lahenda tipu-dai rala' asa
4
Ana' susue kara! Kalu lahenda nae ria neni hehelu-barataa' neme Manetualain mai, boso' moi sipo-sipo' a. Emi muste parisa' matalolole, ela bubulu' ria dedea na tebe-tebe neme Manetualain mai, do ta'a. Huu fo besa' ia mana mapuputa' dodou' la'o rule-feo dae-bafo' ia. Ara tipu-dai lahenda rae, sira nana Manetualain mana nesi matan. 2 Ita bisa bubulu' hehelu-barataa' fo tebe-tebe neme Manetualain Dula-dale Na, leo ia': Manetualain helu mema' neme fai a ulu na nau fee Ana Na leo dae-bafo' ia mai. De kalu lahenda fo ri' neni hehelu-barataa' a manaku nae, Yesus Kristus nana, tebe-tebe Manetualain Anan fo ri' dadi lahenda dae-bafo' sama leo' ita, sona tebe ria hehelu-barataan neme Manetualain mai. 3 Tehuu lahenda fo ta manaku Yesus nae leo' naa, ana ta naoka-nasamu nai Manetualain dale'. Ria nana neme mana soa' Kristus. Emi parnaa mamanene rae, mana soa' Kristus neu' ko mai. Sekonaa te, lahenda rupa leo naa' ara hapu si mema' rai dae-bafo' ia.4 Ana' susue kara! Tebe emi maoka-masamu nai Manetualain dale', ma Ria kuasa Na nai emi dale ma. Huu ria naa, emi maseki mana soa' Manetualain. Huu fo Ria Dula-dale Na nai emi dale ma, bau lena kuasa nai dae-bafo' ia. 5 Sira raoka-rasamu rai dae-bafo' ia, de sira nanori-nafadan boe raoka-rasamu rai dae-bafo' a hihii-nanaun. Huu ria naa, lahenda dae-bafo' a rahii' ramanene si. 6 Tehuu ita taoka-tasamu nai Manetualain dale', de lahenda bea nalela' Manetualain sona namanene ita nanori-nafadan. Tehuu lahenda bea ta naoka-nasamu nai Manetualain dale', sona ta nau namanene neu' ita. No ria naa, ita bisa bubulu' bea ri' neme Manetualain mai, ma bea ri' mapuputa'.
Susue-lalai' ma namahere' — Susue-lalai' a, nana ubea'?
7 Ana' susue kara! Ita muste tasue-talai ao, huu fo susue-lalai' a naoka-nasamu nai Manetualain dale'. Basa lahenda fo rasue-ralai ao, sira raoka-rasamu rai Manetualain dale' ma ralela' Ana. 8 Tehuu lahenda bea ta nanuu susue-lalai', ana ta nalela' Manetualain. Huu fo Manetualain nana manasue-manalai. 9 Manetualain natudu susue-lalai Na neu' ita leo ia': Ria fee Ana mane ise Na leo dae-bafo' ia mai, ela soi eno' soa-neu' ita. No ria naa ita bisa tasoda taroo to Manetualain. 10 Kalu nau mita susue-lalai matetu' a, boso' mete ita susue-lalain neu' Manetualain. Tehuu mete-relu Manetualain susue-lalain neu' ita, nana huu Ria fee Ana Na mai mate kati ita, ela Ana sae-safe heni ita sala-sikon, de ita bisa malole selu' to Ni.
11 Ana' susue kara! Huu no Manetualain sue na ita seli, de ita boe muste tasue-talai ao. 12 Ta parnaa lahenda esa nita mata' Manetualain boe'. Tehuu leo mae leo' naa boe, kalu ita tasue-talai ao, ria sosoa na nae, Manetualain sama-sama no ita. Ma Ria susue-lalain boe-boe tamba nai ita soda na, losa' dadi susue-lalai matetu'.a
13 Manetualain fee Dula-dale Na nai ita dale na. Huu ria naa, ita bubulu' tae, tasoda dale' esa to Ni ma Ria boe dale' esa no ita. 14 Au oo tia-lai kara mita mata' Manetualain Ana Na. Ma ami mafada basa lahenda ra mae, Ama' Manetualain fee Ana Na mai, ela po'i-tata na lahenda reme sala-siko nara. 15 Basa lahenda fo manaku rae, Yesus nana Manetualain Ana Na, sona ara rasoda malole ro Manetualain, ma Manetualain boe malole no si. 16 Ita bubulu' Manetualain sue na ita seli. Huu ria naa, ita tamahere tae, neu' ko Ria boe sue-lai naroo ita.
Manetualain sue na lahenda a seli. De lahenda bea nasoda nai nasue-nalai ao' a, ana nasoda dale' esa no Manetualain ma Manetualain boe dale' esa no ni. 17 Ma kalu ita dale' esa to Manetualain, sona ita susue-lalain neu' lahenda dadi roo-tetu'. Kalu dae-bafo' a noe, Manetualain parisa' basa lahenda ra masodan, sona ita ta bii-tamata'u tapadei' nai Ria mata Na, nana huu ita sue-lai sama leo' Kristus tepo' fo Ana nasoda nai dae-bafo' ia. 18 Kalu ita tasoda no nasue-nalai ao', sona ita ta bii-tamata'u bai' boe'. Huu fo kalu ita tasue-talai ao matetu', sona ria sama leo' ita tu'u-tapa heni bibii-namata'u a nai ita dale na. Kalu lahenda bii-namata'u, ria dale na susa nana huu ana bii' hapu huhuku'. Ria sama leo' ana aana' fo bei ta sue-lai nalela' lahenda no matetu'.
19 Ita tasue-talai ao, nana huu Manetualain sue naulu' ita. 20 Kalu lahenda dedea nae, “Au sue-lai Manetualain,” sekonaa te ete' ao na no ria toranoon, sona dedea hihii' ria. Kalu lahenda ta sue-lai toranoon fo ri' nai ria mata-idun, sona tao leo' bea de ana bisa sue-lai Manetualain fo ri' ta parnaa nitan? Ta bisa, hete? 21 Huu fo Manetualain naonda fee pareta nae, ita boso' sue noi Ria, tehuu muste sue-lai ita toranoon lahenda kamahere' ara boe.