2 Yohanis
Soda-mole'
1
Mama boki'! Susura' ia neme au, Yohanis, fo ri' dadi mauli-malaka sarani'.Au dui' susura' ia fee mama fo ri' Manetualain lahenda teteka-heheren, ma fee mama ana mara.a Au sue emi basa, fo ri' dale mara nanaheke' no hihii-nanau' roo-tetu' ara. Basa lahenda feke' fo bubulu' hihii-nanau' roo-tetu', ara sue-lai emi boe. 2 Ami sue-lai emi, nana huu hihii-nanau' roo-tetu' ara nanasele' nai ita dale na, ma neu' ko leo-raparasa ro ita losa doo na neu.
3 Au hule-haradoi neu' Manetualain no Ria Anan Yesus Kristus, fo ratudu Sira dale malole ma dale kasian Nara neu' ita, ela ita bisa tasoda no tetu-tema', mole-dame, tesatei-tamadale', nasue-nalai ao' ma nanaheke' to hihii-nanau' roo-tetu' ara.
Masoda masue-malai ao ma homu mahere hihii-nanau' roo-tetu' ara
4 Au amaho'o aan seli, nana ita mama anam ruma leo-la'o malole tuka eno soda' roo-tetu' a, sama leo' Ama' Manetualain pareta soa-neu' ita.
5 Mama boki'! Besa' ia au hule ita basa tasue-talai ao. Au hule a, ta pareta bebeu', tehuu au fee noi nafarerene' la'e-neu' pareta fo ita homu mema' neme masososa na mai a.b 6 Ita bisa tatudu susue-lalai' ara, kalu ita tao tuka Manetualain pareta Nara. Neme ulu' mai Ana pareta ita tasue-talai ao. Ria ta hihii-nanau' bebeu', huu fo emi mamanene pareta ria neme ulu' mai.
7 Lahenda dodou' la'o rule-feo dae-bafo' ia, fo ranori-rafada rapuputa' rae, Yesus Kristus mai nai dae-bafo' ia, tehuu Ria ta lahenda dae-bafo' tetea'. Sira boe, dedea fufudi' ralena laka neu' Kristus ma ta nau sipo' Yesus nana Kristus fo ri' Manetualain teka-here mema' neme ulu' mai. 8 Manea matalolole, ela ita boso' sota hihii'. De emi muste makate moi-tao maroo, ela emi bisa hapu basa ua-nale' fo ri' Ramatua' a helu nau fee emi nai nusatetu-ikutema' a.
9 Huu fo lahenda bea heo neme Kristus nanori-nafada Na, sona ana ta nabua-naesa no Manetualain. Tehuu lahenda fo homu nahere nanori-nafada' ria, ana nabua-naesa no Manetualain ma Ria Anan Yesus Kristus.
10 Kalu lahenda mai nanori-nafada hihii-nanau' ta matetu' ara la'e-neu' Kristus, sona boso' sipo' ana nai emi umam ma boso' tao dale' neu' ana. 11 Huu fo kalu emi tao dale' neu' ana, sona emi boe tuka nai ria nonoi-tatao tadalu na.
Yohanis dui' nate'e susura na
12 Au bei ahii' afada emi hihii-nanau' dodou', tehuu malole lena' au boso' dui' asa reu' susura'. Huu fo ta doo' a so', te au saka' mai dedea mata' oo emi, ela tebe-tebe ita bisa tamaho'o bela' a.
13 Manetualain here mama a'a ina ma boe. Ria ana nara haitua haraoe soda-mole' fee mama sara rai naa.
Noi ri naa' so.
Soda-mole' neme au mai,
Yohanis