5
Basa lahenda fo ramahere rae, Yesus nana Kristus fo ri' Manetualain feen mai, sira dadi Manetualain ana Nara. Lahenda sue-lai lahenda fo ri' dadi ama', sona ana sue-lai ama' ria ana nara boe. 2 Kalu ita sue-lai Manetualain ma tao tuka pareta Na, ria natudu nae, ita boe sue-lai Ria ana Nara. 3 De kalu ita sue-lai Ni, ita tao tuka Ria pareta Nara. Huu fo Ria pareta nara, ta bera' a.a 4 Ita fo ri' dadi Manetualain ana Nara, bisa taseki dae-bafo' a hihii-nanaun, nana huu ita tamahere Ni. 5 Lahenda bea bisa naseki dae-bafo' a hihii-nanaun, sona ri' lahenda fo namahere nae, Yesus nana Manetualain Ana Na.Tamahere Yesus, ria sosoa-raraan ubea'?
6 Sadi emi bubulu'. Yesus nana ta noi lahenda dae-bafo' biasa. Ria boe Kristus fo ri' Manetualain feen leo dae-bafo' ia mai. Tepo' fo Ana saka' nalala'o Ria nonoi-tataon, Yohanis sarani Ni pake oe. Ana mate ma daa Na faa. De ta noi oe fo ri' Yohanis sarani Ni a penting, tehuu Ria daa Na faa a, ria boe penting. Huu fo Manetualain Dula-dale Malalao-malalafu Na nafada nae leo' naa, ma Ana ta napuputa'. 7 De hihii-nanau' telu dadi sakasii:b 8 si' Manetualain Dula-dale Na, oe fo Yohanis paken sarani Yesus ma Yesus daa Na. Sira telu ratudu hihii-nanau' esa' a la'e-neu' Yesus. 9 Kalu lahenda dae-bafo' a dadi sakasii, sona biasa ita tamahere ni. Lena-lena' bali, kalu Manetualain dadi sakasii la'e-neu' Ria Ana Na. Sekonaa te, Manetualain pake hihii-nanau' ia ra telu, ela natudu buti nae, Yesus nana ta noi lahenda dae-bafo' biasa, tehuu Ria boe Kristus. 10 Lahenda bea namahere Manetualain Ana Na, sosoa na nae, lahenda ria sipo' Manetualain Hara-dasin la'e-neu' Ana' ria. Tehuu lahenda bea ta namahere Manetualain sama leo' lahenda fo dedea nae, “Manetualain mana mapuputa'!” No ria naa, ana ta sipo' Manetualain Hara-dasin la'e-neu' Manetualain Ana Na. 11 Manetualain Hara-dasin isi-liin leo ia': Ana fee ita soda' manaetu-manabasa taa'. Ma ita hapu soda' ria, nana huu ita tamahere Ria Ana Na.c 12 De lahenda bea nabua-naesa no Manetualain Ana Na, ana nasoda naroo no Ni. Tehuu lahenda bea ta nabua-naesa no Manetualain Ana Na, sona ana ta hapu soda' ria.
Ubea' taon de Yohanis dui' susura' ia?
13 Au dui' basa hihii-nanau' ia ra soa-neu' emi fo ri' mamahere Manetualain Ana Na, ela emi bubulu' matetu' mae, emi hapu soda' manaetu-manabasa taa'.
Yohanis dui' tamba la'e-neu' huhule-haradoi'
14 Kalu ita hule-haradoi neu' Manetualain, ma hule sudi ubea' tuka Ria hihii-nanaun, sona ita bisa tamahere Ana namanene ita hule ubea'. 15 Ma kalu tamahere tebe-tebe, sona ita boe tamahere tae, ita sipo hata fo ri' ita hule Ni.
16 Kalu o mita toranoo ma tao sala' fo ri' ta neni mamates, malole lena' o hule-haradoi neu' Manetualain tulu-fali o toranoom ria, ela ana nasoda. Au maksud ka leo' ia, sala' ruma ta bisa ramate lahenda. Ma sala' ruma bisa ramate lahenda, de kalu hapu sala' leo naa' sona boso' boe hule-haradoi. 17 Nai Manetualain mata Na, basa hihih-nanau' tadalu' fo ri' ita tao, basa sira nana sala-siko'. Tehuu ta basa sala-siko' ara reni mamates.
Yohanis fee selu' nafarerene' la'e-neu' hihii-nanau' penting
18 Lahenda fo naoka-nasamu nai Manetualain ta tao sala', huu fo Manetualain Ana Na nasuru-nahapa ni. De nitu makaresi' a ta tototo la'e ni.
19 Ita bubulu' ita taoka-tasamu nai Manetualain dale'. Tehuu ita boe bubulu' nitu makaresi' a nanuu kuasa, de ator basa lahenda rai dae-bafo' ia.
20 Ita bubulu' Manetualain Ana Na mai, fo fee ita dudu'a-aafi tande' ela ita bisa talela' Manetualain roo-tetu' a. Besa' ia ita bisa malole to Ni, nana huu ita dale' esa to Ria Anan Yesus Kristus. Ria boe Manetualain roo-tetu'. Ma Ria fee lahenda soda' manaetu-manabasa taa'.
21 Ana' kara emin! Manea matalolole emi soda mara, boso' losa ruma seti heni Manetualain nai emi dale mara.
Noi ri naa' so.
Yohanis