Lahenda fo dadi Manetualain ana Nara muste rasoda roo-tetu' — Ramatua' a ana Nara ta tao sala'
3
Soba emi dodoo-tatai Ama' nai nusatetu-ikutema' a susue-lalain neu' ita! Huu fo Ria susue Na bau na seli, losa' Ana so'u ita dadi Ria ana Nara. Tebe ria! Tehuu lahenda fo nasoda tuka dae-bafo' a hihii-nanaun, ta bubulu' bea ita nana huu ara ta ralela' Manetualain.a2 Ana susue kara! Ita dadi Manetualain ana Nara, tehuu neu' ko ita dadi leo bea' bali, ria bei ta matetu'. Ita bubulu-talela' leo ia': kalu Kristus natafali mai, ita boe dadi sama leo' Ria, nana huu ita tita Ni matetu'. 3 Basa lahenda fo rahani Kristus mamai Na, tantu ara tao lalao-lalafu sira soda na, ela lalao-lalafu' sama leo' Kristus. 4 Basa sala-siko' a ralena laka Ramatua' a pareta Na. Huu ria naa, basa lahenda fo ri' tao sala', ralena laka Manetualain pareta Na ma soa' Ana. 5 Emi bubulu' mae, Kristus dadi lahenda dae-bafo', ela sae-safe heni ita sala-sikon. Ana bisa tao leo naa', nana huu Ria ta parnaa tao sala'.b 6 De lahenda fo nasoda nabua-naesa naroo no Ni, ta tao sala'. Tehuu kalu lahenda fo tao sala' la'o naroo, ria sosoa na nae, ana ta nalela' ma ta nabua-naesa no Kristus.
7 Ana susue kara! Boso' mataa' lahenda tipu-dai emi. Huu fo lahenda bea tao tuka hata roo-tetu', sona ria lahenda dale roo-tetu' sama leo' Kristus. 8 Tehuu lahenda bea tao sala', ria naoka-nasamu nai nitu makaresi' ara malakan fo ri' tao tadalu' neme masososa na. Huu ria naa, Manetualain Ana Na mai, de tao nalulutu' nitu ria tatao tadalu na.
9 Lahenda fo dadi Manetualain anan, ana ta tao sala' nana huu Manetualain nasoda nai ria aon dale'. Ana ta bisa tao sala' naroo, nana huu ria naoka-nasamu nai Manetualain dale'. 10 No ria naa ita bisa bubulu', bea ri' naoka-nasamu nai Manetualain dale' ma bea ri' naoka-nasamu nai nitu ra malaka na dale'. Huu fo lahenda bea ta tao tuka hata roo-tetu' ma lahenda fo ta sue-lai toranoo na, ria dadi tanda nae, ana ta naoka-nasamu nai Manetualain dale'.
Manetualain ana Nara muste rasue-ralai ao
11 Neme fai a ulu na emi mamanene mema' hehelu' fo ri' nae, “Masue-malai ao!”c 12 Bei mafarene Kaen no Habel tutui na, hete? Boso' tao tuka Kaen, huu fo ria naoka-nasamu nai nitu makaresi' a dale', losa' ana naisa fadin Habel. Ubea' taon, de ana tao leo naa'? Ria nana huu ana tao hihii-nanau' tadalu' ara, tehuu fadi na tao hihii-nanau' roo-tetu' ara.d
13 Toranoo kara! Lahenda fo tuka dae-bafo' a hihii-nanaun ete' ao nara ro emi, boso' heran. 14 Ita bubulu' kalu lahenda masala' a mate, sona ana bika-bati neme Manetualain mai. Tehuu no ita toranoo' a tasue-talai ao, ria dadi buti nae, kalu ita mate sona tasoda sama-sama to Manetualain. Basa lahenda fo ta ranuu susue-lalai', sona neu' ko mate si te bika-bati reme Manetualain mai.e 15 Huu fo lahenda bea ete' ao na no toranoo na, sona sama leo' lahenda kanisa'. Emi bubulu' lahenda rupa leo naa' a ta nasoda naroo no Manetualain. 16 Ita bisa bubulu' susue-lalai matetu' a, neme Kristus conto Na mai. Huu fo Ana sue ita, losa' fee heni ao-ina Na ma mate kati ita. De ita boe muste fee heni ao-ina' ara soa-neu' ita toranoo nara. 17 Kalu lahenda manuu-mahata' a nita toranoo' esa to'a-taa naan seli, tehuu ana ta kasian neu' ana fo tulu-fali ni, sona lahenda ria boso' dedea nae, “Au sue-lai Manetualain!”
18 Ana susue kara! Boso noi bafa ma mae o sue-lai lahenda, tehuu tao hihii-nanau' malole ela natudu susue-lalai matetu'. 19 Kalu ita tatudu susue-lalai' ma tao malole leo' naa, ita bisa bubulu' tae, ita tasoda tuka matetu na. No ria naa, fai fo nai Manetualain mata Na, ita ta bii-tamata'u ma ita bisa boti' laka' ara. 20 Leo mae ita dale na sale ita la'e-neu' hihii-nanau ta malole fo ri' ita parnaa taon, boso' bii-tamata'u. Huu fo Manetualain dale kasian na talalu lena neme ita mai. Ma Ria boe bubulu' basa-basan.
21 Ana' susue kara! Kalu ita bubulu' tebe-tebe ita sala' ta'a, sona fai fo ita nai Manetualain mata Na, ita ta mae'. 22 Huu no ita tao tuka Ria pareta Nara ma tao tamaho'o Ria dale Na, de ita bisa sipo basa hihii-nanau' fo ri' hule neme Ria mai. 23 Ria pareta Na nae leo' ia: tamahere taroo Ria Anan Yesus Kristus fo ri' Ana feen mai. Ma tasue-talai ao sama leo' Yesus pareta Na.f 24 Lahenda bea tao tuka Manetualain pareta Nara, sona ria nabua-naesa no Manetualain. Ma Ramatua' a boe nabua-naesa no ni. Ita bubulu' Ria nai ita dale na, nana huu Dula-dale Na nasoda nai naa.