2
Ana susue kara! Au dui' fee emi basa-basa ia ra, ela afada emi boso' boe tao sala'. Tehuu uni' ko leo bea tao sala', neu' ko esa ri' no' ita nai Ama' Manetualain matan. Ria nana ri' Yesus Kristus, Lahenda Malalao-malalafu' fo ri' Manetualain feen leo dae-bafo' ia mai. 2 Ana mate dadi tutunu-hohotu' soa-neu' ita, ela Manetualain sae-safe heni ita sala-siko nara. Ta fee noi ita mesa' kata, tehuu fee basa lahenda dae-bafo' nai dae-bafo' ia.Lahenda fo nasoda nai makaledo' a tao tuka Manetualain pareta Na, lena-lena' pareta la'e-neu' susue-lalai'
3 Ita basa bubulu' tae, talela' matetu' Manetualain, kalu ita tuka Ria pareta Nara. 4 Lahenda bisa dedea nae, “Au alela' Manetualain.” Tehuu kalu ana ta tao tuka Ramatua' a pareta Na, sona ria mana mapuputa' de dedea feke' tao feke'. 5 Tehuu lahenda bea tao tuka Ramatua' a pareta Na, ria dadi buti nae, ana sue matetu' Ramatua' a. No ria naa ita bubulu' Ramatua' a lahendan ita. 6 De kalu lahenda bea dedea nae, “Au asoda abua-aesa oo Manetualain,” sona ana muste nasoda sama leo' Yesus Kristus.
7 Ana susue kara! Pareta fo ri' au dui' ta hihii-nanau' bebeu' soa-neu' emi. Pareta ia hapu mema' nai Ramatua' a Hara-dasin fo ri' emi mamanenen neme ulu' mai.a 8 Leo mae leo' naa boe, au nau dui' hihii-nanau' bebeu' la'e-neu' Ramatua' a pareta Na. Pareta ia la'o no matetu' nai Yesus masoda Na. Ma pareta ia nai emi talada, nana huu maiu' fo nai emi dale mara sapu-lalo, ma makaledo matetu' a nahaa nai emi masoda mara.
9 Lahenda bisa dedea nae, “Au asoda nai makaledo' a dale'.” Tehuu kalu ete' ao na no ria toranoon, sona ria dadi tanda nae, ana bei nasoda nai maiu' dale'. 10 Huu fo lahenda bea nasoda nai makaledo', ana muste sue-lai toranoo na ma ta nanuu tadalu' nai ria dale na, fo natuda selu' ao-ina na. 11 Huu ria naa, kalu lahenda ete' ao na no ria toranoo na, sona dadi tanda nae, ana nasoda nai maiu' dale'. Ana la'o noi nafaroroe' a, nana huu maiu' a tao napoke mata na.
Lahenda fo nasoda nai makaledo', ta leo-la'o tuka dae-bafo' a hihii-nanaun
12 Ana' ara! Au dui' susura' ia fee emi,
nana huu Kristus mate soa-neu' emi,
ma Manetualain sae-safe heni emi sala-siko mara.
13 Ina-ama ra! Au dui' susura' ia fee emi,
nana huu emi malela' Yesus Kristus,
fo ri' hapun mema' neme fai a ulu na.
Lahenda muri-ana' ara! Au dui' susura' ia fee emi,
nana huu emi matati soa' makaresi' a,
losa' masekin.
14 Ana' ara! Au dui' susura' ia fee emi,
nana huu emi malela' Ama' Manetualain.
Ina-ama ra! Au dui' susura' ia fee emi,
nana huu emi malela' Yesus Kristus,
fo ri' hapun mema' neme fai a ulu na.
Lahenda muri-ana' ara! Au dui' susura' ia fee emi,
nana huu emi mapeda-mahinda Ramatua' a Hara-dasin nai emi dale mara,
de emi dadi tea-mepe',
ma emi matati soa' makaresi' a,
losa' emi masekin.
15 Emi boso' sue dae-bafo' a hihii-nanaun, ma hata-heto dae-bafo' a. Huu fo lahenda bea sue dae-bafo' a, ana ta bisa sue Ama' Manetualain. 16 Huu fo hihii-nanau' dae-bafo' a ta nanuu tututi-nanato' no Manetualain. Conto leo-leo', lahenda fo nasoda tao namaho'o soa noi ria ao-ina heheli na; lahenda fo tendetuu-dalesala lahenda hata-nuun; ma lahenda fo koao nana huu ria su'i-beten. Hihii-nanau' leo naa' a, ta raoka-rasamu rai Ama' Manetualain. Huu fo ara raoka-rasamu rai dae-bafo' a. 17 Sekonaa te, neu' ko dae-bafo' a sapu-lalo sama-sama no basa hihii-nanau' fo ri' lahenda rahii' saka si. Tehuu lahenda bea tao tuka Manetualain hihii-nanaun, ria ta sapu-lalo, huu fo neu' ko ana hapu soda' mana basa taa'.
Lahenda fo nasoda nai makaledo' a muste besa-besa ela boso' nana tipu'
18 Ana' ara! Dae-bafo' a nonoe na nanenea' so. Emi mamanene rae, lahenda fo soa' Kristus neu' ko toda mai. Sekonaa te hapu si mema' so. Huu fo ruma soa' Kristus nai basa mamana' ain. Ria dadi tanda nae, dae-bafo' a nonoe na nanenea' so.b 19 Malena-laka' sira kalua reme ita talada mai. Sekonaa te, ita lahendan ta sira. Uni' ko leo tebe-tebe ita lahendan sira sona tantu ara ta la'o ela ita, tehuu rahere sama-sama ro ita. Tehuu sira la'o heni ao nara. De matetu na ita lahendan ta sira.
20 Tehuu emi ta sama mo si. Huu fo emi sipo' Dula-dale Malalao-malalafu' neme Kristus mai. Ma Dula-dale ria tulu-fali emi, ela emi basa bubulu' roo-tetu' a ri' ubea'. 21 Bate emi mae au dui' susura' ia nana huu au ae emi ta bubulu' roo-tetu' a ri' ubea? Ta'a! Huu fo emi bubulu' roo-tetu' a ri' ubea' ma mapuputa' a ri' ubea'.
22 Sekonaa te, mana mapuputa' ara la'o rule-feo dae-bafo' ia. Tao leo' bea fo ita bisa talela' asa? Sira si' lahenda fo dedea rae, Yesus nana ta Kristus. Tuka sira, sona Yesus ta Lahenda Malalao-malalafu' fo ri' Manetualain helu mema' nau feen mai. Lahenda fo dedea nae leo' naa, ara soa' Kristus, huu fo ara ta sipo' Ama' Manetualain ma Ana Na. 23 Lahenda bea ta sipo' Manetualain Ana Na, sona sira boe ta sipo' Papa Na. Tehuu kalu lahenda manaku Manetualain Ana Na, sona neu' ko sira dadi Manetualain ana Nara.
24 De emi muste homu mahere hata fo ri' emi mamanenen neme ulu' mai. No ria naa, emi mabua-maesa maroo mo Ama' Manetualain ma Ana Na. 25 Ma Sira helu neu' ita rae, neu' ko ita hapu soda' mana basa taa'.
26 Au dui' susura' ia ela emi bubulu' la'e-neu' lahenda fo ri' nau tipu-dai emi. 27 Emi sipo Ramatua' a Dula-dale Malalao-malalafu Na, ma emi boe masoda mabua-maesa mo Ni. De emi ta parluu lahenda feke' nanori-nafada emi. Noi Ramatua' a Dula-dale Na boe dai so, nana huu Ana bisa nanori-nafada basa hihii-nanau' roo-tetu' ara. Ma Ana ta napuputa' sama leo' manatipu-manadai' ara. De emi homu mahere hata fo ri' Ana nanori-nafadan, ela emi masoda dale' esa maroo mo Kristus.
28 Ana' ara, leo ia'! Emi muste mabua-maesa maroo mo Kristus. Ela kalu Ana natafali mai, sona emi ta bii', ma ta mae' mapadei' nai Ria mata Na. 29 Huu no emi bubulu' mae, Ana tao hata roo-tetu' la'o naroo, de emi bisa bubulu' mae, basa lahenda fo tao tuka roo-tetu' a, sira boe dadi reu' Ramatua' a ana Nara.