Bei ta adu-tao dae-bafo' a te Manetualain Hara-dasin fo ri' Neni Soda' a hapun mema'. Besa' ia, au oo tia-lai kara mita mata' Ana. Ami ridoo mara ramanene Ni. Ma ami lima mara tai la'e Ni. Ami mita Ni leo' naa,^a 2 huu fo Ana mai nai ami talada. Maulu na, Ana leo no Papa Na, tehuu besa' ia Ana natudu ao Na soa-neu' ami. Huu ria naa, ami maparani mafada emi eno na leo bea', ela lahenda dae-bafo' a bisa hapu soda-mole manaetu-manabasa taa'. Te Ria nana, Hara-dasi fo ri' Neni Soda'.^b 3 Ami nau mafada emi basa hihii-nanau' fo ri' ami mita, ma basa hihii-nanau' fo ami mamanene, ela emi bisa dale' esa mo ami. Huu fo ita basa tabua-taesa to Manetualain ma Ana Ni Yesus Kristus fo ri' fee Ni mai. 4 De ami dui' susura' ia, ela tao mamaho'o emi dale mara. No ria naa, ami dale mara boe-boe ramaho'o.

5 Nanori-nafada' fo ri' Yesus nafadan neu' ami, besa' ia ami nau mafadan neu' emi, leo ia': Manetualain malole ina'. Ana ta nanuu tadalu' bai' boe'. Ana sama leo' makaledo' a nahaa, ta nanuu maiu' bai' boe'. 6 Kalu ita dedea tae, “Ita tasoda dale' esa to Ramatua' a,” tehuu ita bei tao hihii-nanau' tadalu', dedea tapuputa' ma ta leo-la'o tuka eno roo-tetu', sona ria sama leo' ita tasoda nai maiu' dale'. 7 Tehuu kalu ita leo-la'o tuka eno roo-tetu', ita sama leo' lahenda fo ri' nasoda nai Manetualain makaledo Na dale'. No ria naa, ita bisa tasoda dale' esa. Ma ita dale na dadi lalao-lalafu', nana huu Manetualain Anan Yesus mate, ma daa Na sae-safe heni ita sala-sikon katema'.

8 Kalu ita dedea tae, “Ita ta tao sala',” sona ria dadi tanda nae, ita tipu-dai selu' ao-ina heheli' ara, ma ta bubulu' roo-tetu' a ri' ubea'. 9 Tehuu kalu ita manaku sala-siko' ara, tantu Manetualain dale roo-tetu' a tao tuka hehelu-barataan, de Ana sae-safe heni ita sala-sikon ma tao lalao-lalafu ita dale nara. 10 Kalu ita dedea tae, “Ita ta parnaa tao sala',” sona ita tao ta Manetualain dadi mana mapuputa'! Huu fo Ana nafada nae, basa lahenda ra tao sala'. Ma kalu ita dedea tae leo' naa, sona sosoa na nae, Ria Hara-dasin ta nai ita dale nara.