Ita Ramatua na saka' natafali mai
3
Toranoo susue kara! Ia nana au fee emi susura' kadua a. Nai susura' ia ra dua, au afarerene' fee emi ela emi bisa du'a-afi la'e-neu' hihii-nanau' roo-tetu' ara. 2 Mafarene fai a ulu na, Ramatua' a mana nesi mata nara dedea-nafadan. Mafarene Yesus lahenda nadedenu nara boe. Afi matalolole la'e-neu' hata fo ri' ita Ramatua na pareta si ela rafada emi. Huu fo Ria ri' po'i-tata na emi meme sala-siko mara! 3 Mafarene leo ia' dei: leo mae dae-bafo' a bei ta noe, tehuu lahenda mamumulu-mamamae' roi-tao rafarara'u tuka noi' sira hihii-nanaun. Ara dedea ramumulu hihii-nanau' roo-tetu'.a 4 Ara dedea rae, “Yesus helu nae, Ana saka' natafali mai, hete? Kalu leo' naa, sona Ana nai bea? Huu fo mulai neme ita bei-ba'i nara mate, losa' besa' ia ta hapu esa nararali boe'. Mulai neme Manetualain adu lalai no dae-ina' a, basa-basan bei ratetu.”5-7 Tehuu lahenda mapuputa' sira, rafarene heni hihii-nanau' esa. Ri' neme masososa na Manetualain noi dedea' a boe, lalai dadi mema'. Manetualain adu na oe boe. Boe ma Ana tada bati oe a neme mada' a ma tao na mada' a toda neme oe a mai. Manetualain dedea nae leo' bea, sona ria nahere.b Nai mabui, Manetualain pake faa ina, de namate basa lahenda dae-bafo' fo ri' rasoda nai Noh tepo-lelen.c Tehuu besa' ia, Manetualain nafada mema', Ana saka' tao hata ubea' soa-neu' lalai no dae-ina' a. Besa' ia Ana bei nahani, tehuu neu' ko naraa la'e ledo-fain te Ana hotu heni si. Neu' ko Manetualain fee huhuku', ela tao nalulutu' lahenda fo ri' ta nau tao dale' neu' Ana. Leo mae leo' naa, tehuu lahenda mapuputa' sira ta nau rafarene rae, tantu Manetualain tao tuka hata fo ri' Ana dedea.
8 Toranoo susue kara! Boso' mafarene heni hihii-nanau' ia. Ita Ramatua na ta reke ledo-fai sama leo' ita. Tuka Ria, sona fai' esa bisa sama leo' teu' rifun esa. Ma teu' rifun esa, sama leo' noi fai' esa' a boe.d 9 Kalu ita Ramatua na helu saka' tao hihii-nanau' esa, sona Ana taon naraa la'e ledo-fain ma ta nahani. Lahenda ruma afi rae Ana noi-tao nababako'. Sekonaa te, ta'a! Ana nanenete, nahani ledo-fain. Ita Ramatua na nau basa lahenda ra saledale-tu'etei nara, ma ratafali mai tuka Ni. Huu fo Ana ta nau lahenda ra bika-bati ro Ni losa' doo na neu.
10 Tehuu kalu ita Ramatua na natafali mai, ta hapu lahenda esa bubulu' boe'. Huu fo Ria mamai Na noi nakeke' a, sama leo' na'o a maso' nala uma dale'. Neu' ledo-fai ria, te basa hata rai lalai nana hotu heni', leo-leo' ledo a, bula' a ma ruu' ara. Basa-basan sapu-lalo! Leo' naa boe, dae-bafo' a no basa oe-isin. Putu heni si!e
11 De kalu basa-basan nana hotu heni', sona emi dadi lahenda rupa leo bea'? Emi muste sadia leo-la'o tuka Ramatua' a hihii-nanaun. Emi muste masoda lalao-lalafu'! 12 Ma emi muste mahani Ramatua' a mamai Na. De emi muste sadia tao ma fai ria mai lai-lai. Neu' ledo-fai ria, te lalai nana hotu heni'. Ma basa hata rai lalai nana hotu' de noe heni si.
13 Tehuu neu' ko hapu lalai bebeu' ma dae-bafo bebeu'. Manetualain helu nae leo' naa, ria ri' ita tahani. Nai naa hapu noi lahenda roo-tetu' ara.f
14 De toranoo susue kara! Fai fo emi bei mahani hihii-nanau' ia ra, emi muste sadia dadi lahenda malole tuka Ramatua' a uuku-susudin. No ria naa, ta hapu lahenda esa bisa sale emi. Sadia masoda mole-dame.
15a Huu fo ita Ramatua na nanenete, ela Ana bisa po'i-tata na emi meme sala-siko mara.
Petrus dui' nate'e susura na
15b Sama na leo' ita toranoon Paulus dui' fee emi, la'e-neu' hihii-nanau' dodou', hete? Ramatua' a fee ni dudu'a-aafi tande' leo naa', huu ria naa ana dui' leo naa' boe. 16 Fai bea ma Paulus dui' susura', sona ana dedea hihii-nanau' ia ra boe. Neme ria susura nara mema' hapu hihii-nanau' ruma ita ta talela' maksud na. Lahenda ruma tao rapuputa' Paulus maksud na. Ara tao rapuputa' hihii-nanau' feke' rai Manetualain Susura Makamoi Na dale'. Sira si', lahenda aomata' ara ma lahenda fo ri' ta ramahere tebe-tebe. Lahenda rupa leo naa' ara, neu' ko ralulutu'.
17 Toranoo susue kara! Emi bubulu' mesen mapuputa' sira eno masoda nara. De besa-besa! Huu fo ara ta nau ramanene atoran esa boe'. Ara soba-soba rapuputa' emi, ela emi heo' meme eno roo-tetu' a. Tehuu boso' mataa' asa raseki emi. Emi muste manenete mahere. 18 Malole lena', emi namahere ma namatua-namanaru naroo. Huu fo emi bubulu' ita Ramatuan Yesus Kristus fo ri' po'i- tata na ita teme sala-siko' a. Ana natudu dale malole Na neu' emi. Ma Ana nau emi boe-boe malela' Ana.
Au nau basa lahenda ra so'u radedema Ni, neme besa' ia losa doo na neu!g
Soda-mole',
Petrus