2 Leo mae leo' naa, tehuu neu' ko lahenda dodou' tuka si ma ara ta mae' roi-tao rafarara'u. No sira nonoi-tataon, de lahenda ta hada' ma ta tuka nanori roo-tetu' a. 3 Mesen mapuputa' sira, mana tendetuu-dalesala' ara. Ara aada' maa nara rupa-rupa', ela bisa tipu-dai ra emi doi-talim. Tehuu boso' mafarene henin, te Manetualain Mana Ee Dedea' a, ta manasuku-manateau'. Neme fai a ulu na Ana sadia huku si. Neu' ko ara ralulutu'.

4 Conto leo-leo', fai a ulu na Manetualain eila'o-limalopen rai nusatetu-ikutema' a, ruma tao sala'. Tehuu Manetualain fo ri' dadi Mana Ee Dedea', ta po'i si. Ana tu'u si leo naraka a reu, ma ena si rai bolo madema maiu' a. Ara rahani nai mamana' ria losa ledo-fai na, te ara reu rataa Ni.

5 Leo' naa boe neu' lahenda tepo-lele ulu' ara. Tepo' ria ara tao tadalu', ma ta tao dale' neu' Manetualain. Tehuu Manetualain ator, de Ria lahenda dale roo-tetun esa, nade Noh natudu eno' fo lahenda bisa rasoda roo-tetu'. Tehuu ara ta nau ramanene ni. Huu ria naa, Manetualain fee faa ina' a mai, ela tao nalulutu' lahenda fo ta tao dale' neu' Ana. Ana fee Noh no uma isi nara rasoda. Sira basa lahenda falu.^a

6 Fai a ulu na lahenda rai kota Sodom ma kota Gomora leo-la'o tadalu raan seli. Boe ma Manetualain huku si. Basa-basan fo rai naa, Ana hotu heni si losa' dadi afu. Mate basa lahenda fo rai naa. Ria dadi conto soa-neu' lahenda feke' fo ri' rasoda tadalu', ma ta tao dale' neu' Manetualain. Kalu ara ta nau saledale-tu'etei nara, sona sira bisa bubulu' mema' ua-nale nara.^b 7 Tehuu tepo' ria, lahenda esa nade Lot, ri' roo-tetu'. Ana sota' no lahenda parani nonoi-tatao tadalu', fo ri' ta nau ramanene neu' Manetualain. Boe ma Manetualain po'i-tata na Lot neme naa' mai.^c 8 Lot mesa' ana ri' tao roo-tetu', tehuu ana leo nai lahenda Sodom ara talada. Tuka-tuka fai' ana nita, ma namanene si ralena laka neu' Manetualain Atoran Nara. Ria ri' tao na dale na susa.

9 Basa conto sira ratudu rae, Manetualain bubulu' eno' po'i-tata na lahenda fo ri' ramanene Ni reme sosoba rupa' ara. Ria boe bubulu' eno' nateta' huhuku mabera neu' lahenda fo ri' rasoda pepeko-papaki'. Ma Ana tao leo naa' naroo, losa ledo-fai fo Ana naetu' basa lahenda ra dedea nara. 10 Soa-neu' lahenda fo rahii' rasoda noi makekeo-makakanu' tuka sira hihii-nanau mesan, sira hapu huhuku' mabera. Ara ta nau ramanene lahenda esa boe'. Tantu Ramatua' a huku si.

Mesen mapuputa' sira koao' ma raparani raan seli. Ara ta nau ratudu hada-horomata, ma ara ta bii' dedea ramumulu-ramamae' Manetualain no eila'o-limalope nara rai nusatetu-ikutema'. 11 Sekonaa te, Ria eila'o-limalopen rai nusatetu-ikutema' a bara'ai nara lena mesen mapuputa' sira. Leo mae leo' naa, tehuu eila'o-limalope ra ta dedea ramumulu-ramamae' mesen sira rai sira Ramatua na matan. Ma ara ta sale mesen sira boe'.

12 Tehuu mesen mapuputa' sira rahii' dedea ramumulu-ramamae' la'e-neu' basa hihii-nanau' fo ri' ara ta bubulu'. Sira sama leo' banda dudu'a-aafi taa'! Malole lena' hopu naa si, fo nalulutu' asa! Huu fo sira ua-nalen ria. Tantu ara ralulutu', nana huu sira nonoi-tataon. 13 Ara tao rasusa' lahenda dodou'. Neu' ko Ramatua' a tao nasususa' asa boe, nana huu sira nonoi-tataon ta la'e. Ara rahii' rame-rame tao nabua-naesa tadalu'. Ara rahii' roi-tao rafarara'u nai fai leledo', ela basa lahenda bisa rita sira tadalu nara. Ara ta mae' ralela' ma ara tao ralulutu' emi nade malolem. Kalu ara raa feta sama-sama ro emi, sona ara nau tao tuka noi sira dale hihii tadalun. 14 Sira mata nara teteo-rerelu saka ina' ela hohoke si. Ara tao noi tadalu' la'o naroo. Ara rahii' saka lahenda fo ri' ta ramahere tebe-tebe neu' Ramatua' a, ma duduku-papau' asa ela tao tadalu' tuka si. Ara saka eno tendetuu-dalesala' la'o naroo. Tantu Ramatua' a huku si!^d

15-16 Fai a ulu na mesen mapuputa' sira, nana lahenda fo tuka eno roo-tetu', tehuu nai mabui boe ma ara heo eno'. No ria naa, sira sama leo' fai a ulu na Balaam, fo Bosor^e ana na. Manetualain mana nesi matan esa rian. Tehuu nahii' saka doi', huu ria naa ana tao hihii-nanau' tadalu' ara. Lai' esa de, Balaam sa'e keledei. Keledei ra ta bisa dedea. Tehuu fai ria Manetualain tao na keledei ria dedea sama leo' lahenda dae-bafo'! Keledei ria nasa'ai Balaam, nana huu ria tatao tadalu na. Keledei ria nau fee ni nate'e, ela ana boso' boe tao peko-paki' sama leo' lahenda kamulus.^f

17 Mesen mapuputa' sira sama leo' oe mata' sosoa-raraa taa' a, nana huu meti oe na so. Sira boe sama leo' masu' a ani a fuu henin, de sosoa-raraa' ta'a. Manetualain sadia mema' mamana maiu-mahatu' esa ela ena si. 18 Ara dedea bau-ina', tehuu rou'. Ara duduku-papau' lahenda ela ara sosoa-piao. Ara rahii' fufudi-lele'o lahenda fo ri' besa' ko natafali leo eno roo-tetu' a neu, ela ara tao selu' sala'. 19 Lahenda mapuputa' sira helu rae, “Kalu emi mamanene ami, sona emi po'ilota' de tao tuka noi dale hihii mara!” Tehuu lahenda fo dedea leo naa', ara ta bisa po'i rala ao nara reme sira tadalu nara sama leo' ata. Lahenda bea nataa' hihii-nanau' esa ator ana, sona ria sama leo' ana dadi hihii-nanau' ria ata na. 20 Kalu nau po'ilota' teme tadalu dae-bafo' fo ri' tao nakekeo-nakakanu ita, sona muste talela' ita Ramatuan Yesus Kristus. Tehuu kalu bea nau heo' neme Ana mai, boe ma tao selu' hihii-nanau' tadalu' leo' maulu na, sona ria sama leo' hihii-nanau' tadalu' a ator asa. Besa' ia sira rasaliu lena bali! 21 Ta malole kalu ara bubulu' eno masoda matetu' a, tehuu heo' heni ao nara ma ta nau tao tuka hihii-nanau' malole lalao-lalafu' fo ri' Manetualain pareta neu' ita. Malole lena' kalu ara ta parnaa bubulu' eno roo-tetu' a. 22 Dedea lasi' la'e mesen mapuputa' sira nae, “Kalu busa a muta, ana fali neu naa selu' ria mutas na.” Feke' bali nae, “Leo mae nadiu basa bafi a oe so, tehuu ana fali neu loli selu' tane.”^g