Au dui' susura' ia fee emi fo ri' Manetualain lahenda teteka-heheren. Emi nana lahenda mana mai fo ri' kofela mabasa mamana' dodou' nai propensi Pontus, propensi Galatia, propensi Kapadokia, propensi Asia, ma propensi Bitinia.

Toranoo susue kara! Neme masososa na, Ama' Manetualain teka-here mema' emi dadi Ria lahendan. Ria Dula-dale Na boe, tao na emi dadi lalao-lalafu' soa-neu' Ana, ela emi bisa tao tuka basa pareta fo ri' Yesus Kristus feen neu' emi. Ma kalu emi tao tuka Ria pareta Na katema', ria sama leo' Manetualain pisi Yesus daa Na neu' emi dadi tanda nae, emi dadi lalao-lalafu' soa-neu' Ana.

Au hule-haradoi fo Manetualain natudu dale malole Na neu' emi, ela emi bisa masoda tamba fai', tamba tetu-tema', mole-dame ma tesatei-tamadale'.

3 Basa i'io-o'oa' a soa-neu' Manetualain! Ria nana, ita Ramatuan Yesus Kristus Papa Na. Huu no Manetualain dale lilo Na, de Ana talalu kasian neu' ita. Yesus Kristus mate, boe ma Ana nasoda selu'. De kalu Kristus fee ita tasoda selu', sona ita hapu soda bebeu' sama leo' ita nana boki natafali'. Ita tamahere taroo Kristus, huu fo ita tamahena ma tamahere tae, neu' ko Ana naboi-nasamao natalolole ita. 4 Nai dae-bafo' ia, kalu ama' esa mate, sona foa ela ria hata-heton neu' ana nara. Leo' naa boe, Yesus peda-fua ela ita posaka' nai lalai. Tehuu posaka' ria ta bisa purun, ta bisa nalulutu' ma ta bisa sapu-lalo. 5 Emi mamahere mae, Manetualain nanuu kuasa tulu-fali emi. Ana naboi-nasamao emi ma nanea emi, ela boso' hapu esa tao nalulutu' emi. Ma kalu dae-bafo' a noe, neu' ko natudu eno na leo bea' Ana po'i-tata na emi.

6 Huu ria naa, emi dale mara ramaho'o leo mae besa' ia mameda maan bera' a, nana huu emi muste hapu susa rupa'. 7 Manetualain nataa' ita hapu sosoba' ara, ela uji ita namahere na neu' Ana. Kalu ita lui teme sosoba' a mai sona natudu nae, ita namahere na natea ma roo-tetu'. Ita bisa tararaa' ana no lilo pilas. Ita muste tatanoe lilo pilas neu' ai-pila', ela ono heni kekeo na dei, besa' ko ita hapu lilo pilas tea' a. Sekonaa te, tuka Manetualain dudu'a-aafin, sona ita namahere na beli na lena lilo pilas. De kalu ita namahere na lui neme sosoba leo naa' a, sona fai fo Yesus Kristus natafali mai, neu' ko Manetualain io ita, boe ma Ria so'u-fua ita naden ma Ana hada-horomata neu' ita.

8 Leo mae emi bei ta mita mata' Yesus, tehuu emi sue-lai Ni. Leo mae besa' ia emi ta mita Ni, tehuu emi mamahere Ni. Emi boe mamaho'o-matadale seli uuku', leo mae ta hapu dedea laka' matetu-maraa' ela nafada lahenda la'e-neu' emi dale namaho'o ma. 9 Huu no emi mamahere Ni, de emi seseba-babaem ri' Manetualain po'i-tata na emi meme sala-siko mara.

10 Manetualain mana nesi mata fai ulu nara parisa' lutu-lutu' nau bubulu' ratalolole, Manetualain po'i-tata leo bea' lahenda ra reme sira sala-siko nara. Mana nesi mata sira bubulu' mema' la'e-neu' Manetualain natudu dale malole na neu' emi, nana huu Ana sadia mema' nau po'i-tata emi. 11 Kristus Dula-dale Na noi-tao nai sira dale nara, fo nafada nae, neu' ko Kristus hapu susa ma Ana muste doidoso tao leo bea'. Basa sira dei, besa' ko Manetualain so'u nadedema Ni. Huu ria naa, mana nesi mata ra nau ratatane fai hida' hihii-nanau' ia ra dadi. 12 Kristus Dula-dale Na nafada mana nesi mata sira nae, ara ta rita fa, tehuu emi ri' mita hihii-nanau' sira. Besa' ia emi mamanene hihii-nanau' ia ra boe, huu fo Manetualain Dula-dale Malalao-malalafu Na neme nusatetu-ikutema' a mai pake lahenda feke', fo tui-beka Manetualain Tutui Malole Na soa-neu' emi. Sekonaa te Manetualain eila'o-limalopen rai nusatetu-ikutema' a boe, rahii' rita hihii-nanau' ia ra.

13 Huu ria naa ita muste sadia, ela talela' tatalolole basa hihii-nanau' ia ra. Manea matalolole fo emi du'a-afi roo-tetu'. Sadia ao mara fo mamahere maroo Yesus Kristus losa' Ana natafali mai. Nana huu ledo-fai ria, te Ramatua' a natudu Ria dale malole Na neu' emi. 14 Emi muste mamania-mamanene neu' Manetualain, sama leo' ana' ara ramania-ramanene neu' ina-ama nara. Maulu na, emi bei ta bubulu' Manetualain eno masoda roo-tetu Na. Tehuu besa' ia emi bubulu'. De emi boso' boe masoda tuka emi hihii-nanaum fo tao tadalu' bali. Huu fo ria nana emi eno masoda paraam. 15 De besa' ia emi muste lalao-lalafu'. Huu fo Manetualain malalao-malalafu'. Ria ri' naloo emi fo dadi ana nara. Huu ria naa, emi masoda ma katema' muste lalao-lalafu'. 16 Nana huu mana dui' nai Susura Makamoi' a nae, “Emi muste lalao-lalafu', huu fo Au lalao-lalafu'.”^a

17 Emi mahii' dedea mo Manetualain sama leo' Ria nana emi Amam. Ria dadi Mana Ee Dedea', fo neu' ko parisa' lahenda ra esa-esa' ko nonoi-tataon. Tehuu Ria ta sama leo' mana ee dedea feke' ara. Ana naetu' lahenda dedean no matetu' ma ta nabenu'. Huu ria naa, emi muste masoda besa-besa. Emi sama leo' lahenda mana mai leo lalai nai dae-bafo' ia.

18 Emi bubulu' Kristus tifa etu ela soi-tefa emi meme masodam fo ta nanuu huu-peda'. Emi sipo masoda rupa leo naa' a, neme bei-ba'i mara mai, sama leo' hata posaka'. Tehuu mafarerene', te Yesus tifa-bae emi ta pake lilo pilas, do doi lilo fula' fo ri' neu' ko sapu-lalo. 19 Tehuu Ana tifa-bae pake Ria daa mabeli bera Na! Ana mate sama leo' ara hala bibi-lopo ana' sala taa', fo tao tutunu-hohotu'.

20 Tepo' fo Manetualain bei ta adu dae-bafo' ia, te Ana bubulu' mema' basa-basan fo ri' neu' ko Kristus tao. Tehuu maulu na, Manetualain bei ta natudu Kristus neu' lahenda nai dae-bafo' ia. Besa' ia, besa' ko Ana natudu Kristus fo dadi ua-nale' soa-neu' emi. 21 Huu no Kristus noi-tao leo naa', de emi bisa mamahere Manetualain. Huu fo Ana fee Kristus nasoda selu', ma so'u nadedema Ni. Manetualain tao leo naa' ela emi mamahere Ni, ma mamahehena' Ana tao tuka hata fo ri' Ana helu mema'.

22 Emi tao tuka matetu na. De besa' ia emi bisa moi-tao mela-maku soa-neu' Ramatua' a. Ria ri' tao na emi sue-lai matetu' toranoo' lahenda kamahere' ara. Emi muste tebe-tebe masue-malai ao, huu fo emi dale mara lalao-lalafu'. 23 Besa' ia, emi hapu masoda bebeu'. Masoda bebeu' ia, emi ta hapu neme emi ina-amam fo ri' neu' ko mate si rai dae-bafo' ia, tehuu emi hapu neme ita Aman masoda' manaetu-manabasa taa' nai nusatetu-ikutema'. Emi masoda bebeu ma hapun nesi' Manetualain Hara-dasin. Ria Hara-dasin neni masoda roo-tetu' manaetu-manabasa taa'. 24 Huu fo Manetualain Susura Makamoi Na mana dui' nae,

Manetualain Hara-dasin, nana Tutui Malole fo ri' ami tui-bekan soa-neu' emi.^b