Lelea-nonore' soa-neu' mauli-malaka jama'at ara
5
Mauli-malaka esa aun boe. Maulu na, tepo' fo ri' Kristus doidoso, au ita mata'. Kalu basa lahenda ra rita Manetualain marela-masa'a Na, neu' ko au ita mata' hihii-nanau' sira boe. De au nau fee lelea-nonore' neu' mauli-malaka feke' ara leo ia': 2 Emi sama leo' mana foo a naboi bibi-lopo nara. De emi muste maboi-masamao matalolole lahenda fo ri' Manetualain fee si reu' emi. Urus asa no malole. Boso' urus nana huu emi nonoi-lakam, tehuu no emi mahii' tao leo naa'. Urus asa tuka Manetualain hihii-nanaun. Boso' saka oonto', tehuu makate moi-tao ela tulu-fali Manetualain lahenda nara.a 3 Boso' pareta mafarara'u, fo tao bera-bau' soa-neu' lahenda fo ri' Manetualain fee emi urus asa. Tehuu emi muste dadi conto malole, ela matudu si eno-dala'. 4 Yesus sama leo' Malaka Mana Foo. Kalu Ana natafali mai, sona Manetualain fee emi seseba-babae', nana huu emi urus emi lahenda mara no malole. Seseba-babae' ria ta purun, tehuu ria natea-namepe naroo.Lelea-nonore' soa-neu' lahenda muri-ana' ara
5 Lahenda muri-ana' ara! Emi boe muste mamania-mamanene neu' mauli-malaka jama'at ara. Emi basa boso' matutua-madedema ao mara. Huu fo mana dui' nai Manetualain Susura Makamoi Na nae,
“Manetualain soa' lahenda matutua-madedema ao' ara,
tehuu Ana natudu dale malole Na neu' lahenda dale balaroe-balanau' ara.”b
6 Huu ria naa, emi basa muste mafarene Manetualain kuasa Na, ela emi boso' koao. Boe ma naraa la'e ledo-fain te Manetualain io emi.c 7 Basa hihii-nanau' fo ri' tao teisusa-dalehedi emi, so'u dale mara ela Manetualain ri' urus. Huu fo Ana tao dale' neu' emi.
8 Besa-besa! Du'a-afi loa-naru'! Manea matalolole, huu fo ita musu na ri' nitu ra malaka na, ana nau tao nalulutu' emi. Ana nau odo na emi, sama leo singa esa namanasa naan seli', de ana saka banda ela sii fo naa. 9 Tehuu boso' bii'. Emi muste soa' nitu ra malaka na. Emi muste tebe-tebe mamahere maroo Manetualain. Huu fo emi bubulu' emi toranoom lahenda kamahere' rai basa mamana' nai dae-bafo' ia, hapu susa leo' emi boe. 10 Tehuu mafarerene', te Manetualain nahii' natudu dale malole Na neu' ita. Ria naloo emi dadi lahenda nara, nana huu emi sipo' Kristus. Huu ria naa, Ana nau so'u nadedema emi, ela emi bisa masoda maroo mo Ni. Tehuu kalu emi hapu susa nai dae-bafo' ia, sona noi hatemata' fo Manetualain tao natalolole selu' emi. Ana nau natetea emi, ma tao na emi manenete. Ria boe nau nafoa emi nai fanderen tea-mepe'. 11 Ita hule ela basa kuasa rai Manetualain lima Na losa doo na neu. Tebe!
Petrus dui' nate'e susura na
12 Silasd dui' fali au susura eetu ana' ia. Ria nana ita toranoon lahenda kamahere', ma au lima boa ona ka. Au fee emi lelea-nonore', ela emi tea-mepe' mahere, huu fo Manetualain nahii' natudu naroo Ria dale malole Na neu' ita. De emi muste mapadei mahere ao mara boso' heo'.
13 Lahenda kamahere' fo rabua rai kota Babel, ara haitua haraoe soda-mole' soa-neu' emi boe. Manetualain teka-here si, sama leo' Ana teka-here emi.
Au ana ki Markus boe haitua fee emi haraoe soda-mole'.e
14 Kalu emi maneta, sona mate'a pake dede'i lalao-lalafu' ela natudu emi susue-lalaim.
Au nau emi basa fo ri' mamahere Kristus, bisa masoda no tetu-tema', mole-dame ma tesatei-tamadale'.
Soda-mole',
Petrus