Kristus lahenda nara muste rasoda raadale'-to'etei'
4
Kristus lahenda dae-bafo' sama leo' ita. Huu no Ana doidoso dodou', emi boe muste sadia doidoso sama leo' Ria. Tehuu mafarerene', te lahenda bea sadia hapu susa, nana huu nabua-naesa no Kristus, ana naetu' naan ta nau tao sala' so'. 2 Leo mae ana bei nasoda nai dae-bafo' ia, tehuu ana ta tao selu' sala' sama leo' lahenda dae-bafo feke' ara. Huu fo ana tao tuka Manetualain hihii-nanaun.3 Maulu na emi tutu'u ledo-fai fo tao tadalu rupa', sama leo' lahenda fo ta nalela' Manetualain. Conto leo-leo': ara tao rafarara'u, ara hohoke, ara tuka sira dale nahii' tatao tadalu nara, ara rinu mafu', ara tao nabua-naesa' fo raa-rinu nanaa-nininu hohoro-lalane'. Ara tao nabua-naesa tadalu'. Ara soko-taku fo bisa tao ra ita ao na maninis. 4 Ara dedea ramumulu-ramamae' emi, nana huu ara ta bubulu' rae ubea' taon de emi ta epo-seo' mo sira tadalun fo ri' seli uuku' a.
5 Tehuu mafarerene', te neu' ko ara muste reu rataa Manetualain, Mana Ee Dedea'. Ara muste rafada Ni rae ubea' taon, de ara tao tadalu leo naa'. Boso' mafarene henin, te basa lahenda muste reu rataa Ni. Leo mae lahenda fo bei nasoda, do lahenda mana mate ara. 6 Tebe! Manetualain saka' parisa' lahenda mana mate' ara, sama leo' Ana parisa' lahenda dae-bafo feke'. Huu fo Ana nau nita sira leleo-lala'o maulu na. Huu ria naa, Yesus neu tui-beka fee si Manetualain Tutui Malole Na, ela sira boe bisa rasoda roo-tetu' fo tao tuka Manetualain hihii-nanaun.
Ita muste taboi-tasamao tatalolole basa-basan fo ri' Manetualain feen neu' ita
7 Dae-bafo' a nonoe na nanenea' so. Huu ria naa, emi muste du'a-afi loa-naru' ma manuu dudu'a-aafi makaneu', ela emi bisa hule-haradoi no malole. 8 Penting na ri', emi muste masue-malai ao. Leo mae lahenda feke' a tao sala' dodou', tehuu emi bei bisa matia' kalu emi sue-lai ni.a 9 Lahenda neme mamana feke' mai tuli emi uma-loom, sona sipo' ana no namaho'o. Tehuu mafarerene', boso' sipo' no muu-daus.
10 Lahenda ra esa-esa' ko sipo' babati-papalan neme Manetualain mai, de ana muste pake babati-papala' ria ela nalalau' toranoon lahenda kamahere' ara. Maboi ma pake matalolole babati-papala' ria, te ria nanuu sosoa-raraa' soa-neu' Manetualain. 11 Conto leo-leo': kalu hapu babati-papala' manori-mafada lahenda, sona mafarerene', emi muste mafada lahenda pake Manetualain Hara-dasin. Kalu hapu babati-papala' malalau' lahenda, sona malalau' pake mapii-bara'ai' fo ri' Manetualain fee. No ria naa, basa lahenda rita rae emi nana Yesus Kristus lahendan. Huu ria naa, ara io-oa Manetualain. Huu fo Ria marela-masa'a! Ma Ria nanuu kuasa homu pareta losa doo na neu! Tebe!
Ita hapu doidoso nana huu dadi lahenda Kristen
12 Toranoo susue kara! Boso' heran kalu hapu sosoba' mabera. Huu fo ria uji ita namahere na. Boso' afi mae, noi o mesa' ko hapu sosoba leo naa'. 13 Tehuu emi bisa mamaho'o-matadale, huu fo emi hapu doidoso sama leo' Kristus boe hapu doidoso. Ma fai fo basa lahenda ra rita Kristus marela-masa'an nai emi doidoso mara, ria ri' tao naa emi mamaho'o-matadale matetu'. 14 Huu no emi mabua-maesa moo Kristus, de fai fo lahenda dedea radadae emi, emi maua-manale nana huu Manetualain Dula-dale marela-masa'a Na nai emi dale'. 15 Tehuu kalu emi muste hapu doidoso, sona boso' huu no emi mana maisa lahenda, do na'odaa, do lahenda tadalu', do sososo' leo lahenda feke' a urusan. 16 Tehuu kalu lahenda hapu susa, nana huu ria dadi Kristus lahendan, ana ta mae' hata esa boe'. Malole lena', ara io-oa Manetualain nana huu sira dadi lahenda Kristen.
17 Losa ledo-fain fo basa lahenda ra reu rataa Manetualain. Ana mulai parisa' Ria lahenda nara masodan. De moi dodoo' a leo! Kalu Ana mulai parisa' ita lahenda Kristen, sona lahenda fo ta nau sipo' Ria Tutui Malole Na, leo bea' bali? Tantu sira huhuku na bera lena, hete! 18 Huu fo mana dui' nai Manetualain Susura Makamoi Na dale' nae,
“Kalu lahenda fo nasoda roo-tetu' boe kura bai' ta hapu soda',
sona lahenda fo ri' ta tao dale' neu' Manetualain, leo' bea bali?
Ma lahenda fo ri' tao sala', leo' bea?”b
19 De kalu Manetualain nataa' Ria lahenda Nara hapu susa tuka Manetualain hihii-nanaun, sona ara bisa ramahere rae, neu' ko Ana nanea-nasala'e si. Huu fo Ria adu naa si. Ria boe tao tuka hata fo Ana dedean a. Huu no Ana nanea si leo' naa, de ara bei bisa tao malole la'o naroo.