Au dui' susura' ia, haitua fee emi lahenda Yahudi manatai-manatapa' nai basa mamana', fo ri' tuka Ramatua Yesus.^{a b}

2 Toranoo kara emin! Au nau afada leo ia': Kalu emi hapu susa-lela rupa', sona dale mara boso' ramonda-ramaa. Sipo' no dale namaho'o, huu fo neu' ko buna-boan malole a. 3 Ita bubulu' kalu emi manenete nai susa-lela losa po'i ma aom meme' sosoba' a mai, kalu emi bei mamahere maroo neu' Manetualain, sona dale mara boe-boe tama, leo mae emi hapu sosoba' feke'. 4 Huu ria naa, emi boso' heo' meme susa-lela a mai. Emi muste manenete nai susa-lela a losa' babasan. No ria naa, emi namahehere ma dadi tetu-tema', losa ta kura-kai hata esa boe'.

5 Kalu neme emi ruma mameda maan ta hapu eno kalua neme' susa-lela mai, bisa matane neu' Manetualain. Ria ri' bubulu' basa-basan ma bisa natudu eno kalua soa-neu' emi. Ana soi eno' no namaho'o ma ta namanasa, kalu emi hule neu' Ana. 6 Tehuu kalu emi hule neu' Ana, sona boso' madale dua. Muste mamahere tebe-tebe mae, neu' ko Ana fee hata fo ri' emi hule. Lahenda fo hule no dale kadua', ria sama leo' nafa ani a to'o neu-mai de matetu-maraan ta'a. 7-8 Lahenda bea dale na kadua' leo naa', sona dale na ta tea' a. Boso' namahena hapu hata neme Manetualain mai.

9 Lahenda manato'a-manataa' fo ri' ramahere Ramatua Yesus, ara muste ramaho'o-ratadale, nana huu Manetualain so'u si dadi Ria kileo-bobokin.

10-11 Ma lahenda kamasu'i' fo ri' ramahere Ramatua Yesus, sira boe muste ramaho'o, nana huu Ramatua' a nanori si fo boso' koao. Besa' ia, ara bubulu' rae, neu' ko sira hata-heto nara sapu-lalo, sama leo' buna nura rabuna lole na seli, tehuu ta doo bea boe' te ledo a haan boe ma mamale heni si. Leo' naa boe lahenda kamasu'i ara. Leo mae rasapute no sira nonoi-tataon nara, tehuu neu' ko sapu-lalo boe .^c

12 Lahenda fo nanenete nai sosoba' a, losa' lui na aon, dale na namaho'o nana huu ana sipo seseba' masoda' fo ri' Manetualain helu nae feen neu' lahenda fo sue-lai Ni. Ana sipo seseba na sama leo' lahenda fo hapu juara a sipo beker.^d

13 Mafarene matalolole! Kalu emi ruma hapu sosoba', losa' nau tao sala', sona boso' neo mae, “Manetualain soba au!” Boso' leo naa', huu fo Manetualain ta tao sala'. Ma Ana ta parnaa soba lahenda, ela tao sala'. 14 Sala' a mema' kalua neme lahenda dale nara mai. Ria dale na nahii' tao tadalu', de ana afi neu-mai fo tao nonoi tadalu'. 15 Kalu tuka dudu'a-aafi makekeo-makakanu', sona boki sala-siko' ma sala-siko' a boki mamates.

16 Toranoo susue kara emin! Boso' emi nanatipu-nanadai' la'e-neu' basa ia ra.

17 Manetualain ta kalua fee tadalu'. Tehuu Ana fee basa ua-nale malole, ma basa hihii-nanau' malalao-malalafu' ara. Ria adu na ledo a, bula' a ma ruu' ara. Basa sira lali-lali rai lalai, ma salao nara kati-kati la'o naroo. Noi Manetualain ri' ta nararali. 18 Manetualain dale hihii Na soa-neu' ita leo ia': Ana fee Hara-dasi roo-tetu Na neu' ita. Ana pake Hara-dasi' ria fo po'i-tata na ita. Neme basa-basan fo Ana adu na si rai dae-bafo' ia, Ana here na ita dadi teu' Ria puleulu-boasosa Na.

19 Toranoo susue kara emin! Mafarerene' dedea-nafada' ia: Nenene matalolole lahenda feke' a dedea-nafadan! Dodoo matalolole dei dedea. Ma boso' malale mamanasa. 20 Kalu mamanasa, sona lahenda ta bisa tao hihii-nanau' malole tuka Manetualain hihii-nanaun.

21 De emi muste hotu heni emi sala mara katema'. Sama leo' lahenda naosa makamomoi oka-tinen, boe ma hotu heni kadafu nara. Maloe-madae ao mara fo sipo' Manetualain Hara-dasin, sama leo' bini-kee manasele' nai emi dale mara. Kalu emi tao leo naa', sona neu' ko Manetualain po'i-tata na emi meme naraka a mai, ma sipo' na emi ela hapu soda' manabasa taa'.

22 Kalu emi sipo' Manetualain Hara-dasin, sona muste tao tukan. Boso' moi mamanene' a! Kalu emi moi mamanene' a tehuu ta tao tuka, sona emi edi-fule selu' ao mara. 23-24 Lahenda fo namanene Hara-dasi' ria, tehuu ta tao tuka ni, ria sama leo' lahenda fo titiro aon nai tiro-ao a. Basa de nasadea tiro-ao ria, boe ma nafarene heni mata-idun tuti'. 25 Tehuu emi boso' tao leo naa'! Emi muste parisa' matalolole Manetualain Hara-dasi roo-tetu Na, huu fo sira bisa po'i-tata na lahenda reme sala-siko nara. Manetualain neu' ko fee ua-nale' nai basa hihii-nanau' fo ri' emi tao, sadi emi mamanene ma tao tuka Hara-dasi' ria. Boso' losa Hara-dasi' ria maso' nesi' ridoo ii ma, boe ma kalua nesi' ridoo ona mara!

26 Lahenda fo nameda aon malalao-malalafu' tehuu ana ta nanea nala maa na, sona lahenda ria edi-fule selu' ao-ina heheli na. Leo mae ana do'o-tabe boe, sosoa-raraa' ta'a. 27 Dodo'o-tatabe i'io-o'oa matetu' nai Manetualain matan, nana ri': lahenda tiro-dama ma tulu-fali inafalu-anamaa' manato'a-manataa' ara. Ma Ana nanea ao-ina na ela malalao-malalafu' nai dae-bafo' ia.