Lelea-nonore' soa-neu' saoina-saotou' ara
3
Sao ina' ara! Bisinaa' a au ae ita muste tamania-tamanene neu' lahenda mana homu kuasa. De emi muste mamania-mamanene neu' sao mara. Mafarerene', te sao tou' ruma ta nau tao tuka Manetualain Hara-dasin. Leo mae ara ta nau ramanene emi dedea ma, tehuu neu' ko ara ramahere Manetualain, nana huu emi masoda ma.a 2 Huu fo ara rita emi tao basa-basan no dale roo-tetu' ma lalao-lalafu' nai Manetualain matan.3 Ina' ara lole-napun, nana ta neme hata fo nananita' nai dea'. Conto leo-leo': ralane rupa' laka-doo nara, do barias seli uuku', pake lilo-henu, do pake kakao-papake mabeli manori taa'.b 4 Tehuu bisa tao na ina' ara napu' mesan nana ri': sira dalen fo ta nananita' neme dea' mai. Conto leo-leo': dale balaroe-balanau', ma hara taa'. Huu fo lole-napu' rupa leo naa' a ta sapu-lalo, leo mae ina' a namalasi. Tuka Manetualain uuku-susudin lole-napu' rupa leo naa' a, beli' mesan. 5 Fai a ulu na, ina' dale lalao-lalafu' fo ri' ara ramahere Manetualain, sira lole-napun leo naa'. Ara ramania-ramanene neu' sira sao nara. 6 Hai conto neme besa Sara. Ana namania-namanene neu' saon Abraham. Ria boe nataa' sao na ator ana. Emi ina' ara boe muste tao tuka Sara leleo-lala'on, fo tao malole ma ta manuu dale bibii'.c
7 Sao tou' ara! Masoda dale' esa mo sao mara. Dodoo-tatai ma hata malole ubea' soa-neu' sao ma sona tao tukan. Fee hada-horomata neu' ana nai basa hihii-nanau' ara, nana huu ina' a bara'ai na ta sama no tou' a bara'ai na. Emi basa sipo bela' posaka' fo ri' Manetualain feen neu' emi. Ri' sipo bela' masoda bebeu' fo Manetualain feen neu' emi neme Ria dale malole Na mai. Tehuu emi sao tou' ara muste masoda dale' esa mo sao mara, ela kalu emi dua so'u dale mara hule-haradoi, fo hule hihii-nanau' esa neme Manetualain mai, sona Ana namanene emi.d
Leo mae emi tao malole boe, neu' ko emi hapu susa
8 Toranoo susue kara! Mate'e na, au nau afada hihii-nanau' esa. Emi basa muste masoda dale' esa. Kalu lahenda esa susa-lela, do namaho'o sona emi feke' ara muste mameda leo naa' boe. Sue-lai lahenda fo ri' ramahere Kristus. Matudu dale balaroe-balanau' esa no esa. Boso' matutua-madedema ao mara, emi muste manuu dale balaroe-balanau'. 9 Boso' balas tadalu' no tadalu'. Kalu lahenda do'i-ali emi, sona boso' balas meni' dodo'i-aali'. Tehuu hule fo Manetualain feen ua-nale'. Manetualain naloo emi dadi Ria lahendan, ela emi bisa sipo ua-nale' neme Ria mai. 10 Huu fo mana dui' nai Manetualain Susura Makamoi Na nae,
“Lahenda bea saka soda' malole,
ma saka teu-fai loa-naru',
lahenda ria muste nanea bafa na fo boso' dedea tadalu',
ma boso' dedea napuputa'.
11 Ria muste saledale-tu'etei na ma boso' tao sala' bali,
tehuu natafali fo tao malole.
Ana muste nanori fo mole-dame no basa lahenda,
ma saka eno' ela malole no si.
12 Huu fo ita Ramatua na relu-natanae
lahenda fo ri' nasoda roo-tetu'.
Ma Ana nau namanene sira huhule-haradoi na.
Tehuu ita Ramatua na soa' naroo
lahenda fo ri' tao tadalu'.”e
13 Kalu emi makate tao roo-tetu', sona bea nau tao tadadalu emi bali? Ta'a, hete? 14 Leo mae esa tao nasususa' emi, nana huu emi tao malole tehuu emi maua-manale. Kalu lahenda fo ta nalela' Kristus, ana bii' nana huu hihii-nanau' esa, sona emi boso' bii-mamata'u leo' naa. Emi dale mara boso' doda' ma boso' susa sama leo' sira.f 15 Matatama emi dale mara nana huu emi sipo' Kristus nai dale mara, de dadi neu' emi Ramatua Malalao-malalafu ma.
Uni' ko leo lahenda hule emi fo mafada namahere ma, ma ubea' taon de emi mamahena mae, neu' ko Kristus tao na basa-basan dadi malole, sona emi muste sadia mataa si.g 16 Tehuu emi muste mataa meni' dale balaroe-balanau' ma fee hada-horomata neu' asa, ela ara bubulu' emi tao malole neme dale lalao-lalafu mara. Leo mae emi tao malole leo' naa, tehuu tantu ruma dedea ratuda emi, nana huu emi mabua-maesa mo Kristus. De kalu emi tao malole maroo, sona sira fo ri' ramumulu-ramamae' emi neu' ko ara mae'. 17 Kalu tuka Manetualain hihii-nanaun, sona boso' mafarene henin, te malole lena' emi hapu susa nana huu tao malole; boso' huu no emi tao sala'.
18 Huu fo Kristus mate lai' esa,
nana huu ita lahenda dae-bafo' a tao sala'.
Ria fo ri' roo-tetu',
mate soa-neu' ita lahenda makekeo-makakanu'.
Ana mate ela emi bisa malole selu' mo Manetualain.
Kristus, lahenda dae-bafo' sama leo' ita boe.
Lahenda raisa Ni,
tehuu Manetualain Dula-dale Na feen nasoda selu'.
19 Dula-dale' ria boe no Ni neu nanori-nafada dula-dale' fo mana ena' rai mamana' esa, sama leo' bui a. 20 Sira nana, si' fai a ulu na lahenda fo ta nau ramanene neu' Manetualain. Tepo' ria ba'i Noh tao ofa bau-ina'. Manetualain nahani nau nita lahenda ra tao tuka Ria hihii-nanaun, tehuu ara ta nau tao tuka. Huu ria naa, nai faa ina' ria noi lahenda falu rasoda.h 21 Faa ria dadi conto esa, sama leo' fai fo ri' sarani emi. Oe sarani' ria natudu nae, Manetualain po'i-tata na emi meme sala-siko mara, nana huu Yesus Kristus nasoda selu'. Fai fo ri' ara sarani emi, ara ta radiu emi oe ela tao makamomoi emi ao-ina mara. Huu fo matetu na ri' emi helu neu' Manetualain, fo nau tao lalao-lalafu emi dale mara. No ria naa, emi bisa masoda ma tao roo-tetu'. 22 Besa' ia Yesus hene-ae fali' leo nusatetu-ikutema' a neu so. Nai naa Ana natuu' neu' mamana hada-horomata nai Manetualain boboa ona Na. Eila'o-limalope rai nusatetu-ikutema' a, katema' kuasa ra ma mana homu kuasa ra, muste ramania-ramanene neu' Kristus.